Hans gugg in die Luft
oder d Millenium-Sunnefinschternis

D Stärngugger hän s scho lang verkindet
und au mit Fakte grad begrindet. 
E mega Sensation gäb s gly,
am 11. Augschte soll si sy.
D Sunne well - s isch nit zem Lache -
mit em Mond Versteggis mache.
Dr Nostradamus het vor vyle Johr
scho gwarnt - es käm e groossi Gfohr
verbunde mit däre Finschternis
uff uns Mensche zue - vernichti is!
Au d „Prophete“ in unsrem Land
grohte usser Rand und Band
und zaichnen is fascht unisono
en Ändzyt-Angschtszenario.
D Uriella, die Fiatlux-Madonna
het au e Visieenli gha.
Ihri Uuserwählte seht si scho
in corpore zem Hailand go.
Jesus Chrischtus heg ere gsait
si käme gly in d Ewigkait.
Doch laider blybe die uff Ärde.
Syg nonig Zyt zem selig wärde.

Trotz prophezeytem, schwärem Los
isch dr Wärberummel riisegrooss.
Ass men an Himmel gnaisse ka
muess men e schwarzi Brille ha.
„S het solang s het“, haisst s iberal,
doch wottsch Du aini - s isch fatal -
hän vor dir dausig andri scho
im Lade wo s hätt, aini gno.
So hän halt vyl Familie miesse
mit ainer Brille s Schauspiil gniesse. 
Dr Vatter, als dr wichtigscht Maa,
het si nadyrlig lang, lang gha.
Frau und Kind mien sich begniege
mit eme Mini-Gnaissvergniege.
So git s am Schluss e Riisemais
e Familiegnaiss-Psychoverschleiss.
Wär ka, dä seggled zue de Schwoobe,
denn die heersch ihre Standort loobe.
Nur bi ihne gsäch me s richtig,
fir Himmel-Gnaisser e Verpflichtig.
Aber statt Sunnefinschternis in top
git s do und dert e glaine Flop.
Statt s Mondrund vor dr Sunneschybe
seesch laider numme Wolggedrybe.
Nur dunggel wird s e kurzi Zyt.
Vo dr Sunnefinschternis sehsch nyt.

Das Riisegschyss isch jetz verby.
D Ärde stoht no - merggsch es gly.
Mer läbe wyter ohni Schade,
d Hällseher hän is schwär verlade.
Doch au im däglige Lääbe gits
Sunne und Finschternis ebitz.

Bi de Nazi-Dame uff de Schy
isch ebbis nimme, wie s sott sy,
es isch e neye Trainer ko,
me het der Peter Müller gno.
Die sunnig Stimmig isch bald umme,
d Dame heersch nur schimpfe, brumme:
„Dä Müller isch en Ergernis -
schigged en in d Finschternis!“
Doch pletzlig het s e Liechtbligg gä.
„Mer kennte d Maite Nadig näh“,
maint me denn im Schyverband
„die nimmt die Sach sicher in d Hand.
Bi ihrem heitere Gmiet wird gly
d Stimmig wider sunnig sy“.

Dr Gilbert Gress strahlt wien e Sunne
D Schwyz het wider emool gwunne.
Jetz maint dä glaini Sunnekeenig:
„Als Trainer, do verdien ych z wenig“!
Doch uff sy Glanz fallt jetz e Schatte,
der Verband wott s halt nit gstatte
ass me sy Ghalt uffbessre duet.
Als Trainer syg är zwor rächt guet,
doch d Nazi haig vyl Pinggt verschänggt
und so het s nit an d EM glängt.
Är säch doch y, ass es nit goht
ass er meh heb als e Bundesroot.
Me wott drum jetz en andere Ma
wo nit meh koscht und glych vyl ka.

Dr Blocher stoht scheen in dr Sunne:
„Mir hän am maischte Stimme gwunne!“
Maint är no de Nationalrootswahle.
Dr SVP-Stärn isch am strahle.
Pletzlig seht dr Blocher root:
Bi dr Wahl vom neye Bundesroot
Dr Ogi wird zwor glanzvoll gwählt,
doch dr Blocher het s bees hinderegstrählt.
im Schatte stoht är und d SVP.
„Mir wärden is bi Philippi gseh!“
So donnret är vom Reednerpult,
denn am Änd isch sy Geduld.
Er hofft jetz, bi die näggschte Wahle
dät dr SVP-Stärn wiider strahle.
Au bi de Schwoobe, do het s Wolgge
am Polithimmel - und e Dolgge
im Parteibuech vo dr CDU git z dängge,
die lehn sich Millieenli schängge.
Im Dunggle blybt, wo s aane goht
das Gäld - doch in dr Zytig stoht.
Dr Kohl, dä sunnig „Strahlemaa“,
heb bi dr CS „schwarzi Konte“ gha
vo de Meedie wird drum ungeniert,
sy strahlend Bild bees demontiert.
So seht me halt wie s aim ka go.
Nit allewyl kasch in dr Sunne stoh.

Drum, liebe Läser, mergg Dr s guet:
Muesch s au erlääbe, wie s aim duet,
wemme pletzlig dief im Schatte stoht
und nimme waiss wie s wyter goht.
Denn schetzt me s, wenn no diefer Nacht
und Finschteri wiider d Sunne lacht.

Kemmet an d Ladärneuusstellig uff em Minschterplatz. Ihr kennet dert vom Mändig znacht, em 13. Merze bis am Mittwuche demorge, em 15. Merze alli Ladärne au bi Finschternis strahle gseh. Au alli Zeedel und Schnitzel-bängg, d Blaggedde und dr Rädäbäng ka me dert kaufe. Mr fraien ys uff Eyre Bsuech.