BIN IS ODER BIN IS NIT?

oder

S Wahldrama äänen am grosse Wasser
frey noch em William Shakespeare

Es git e Land wyt wäg vo doo, me sait em d USA,
dert sueche si fir s heggschti Amt das Joor e neye Maa.
S git Zwai – si haisse Gore und Bush – wo Presidänt wänn wärde,
die zaige sich denn allem Volgg – mit wichtige Gebärde,
verspräche wemme si wähle dät, welle si derfir luege,
ass es de Lyt megaguet gieng, heebe d Wält fascht uus de Fuege.
Si raise gryz und quer dur s Land und dien sich presentiere,
gän em letschte Gleezi d Hand, das duet si nit geniere.
Si hän e riise Ratteschwanz vo Trabante und Supporter,
verzapfe zigmool dr glych Värs de wartende Reporter.
Si segglen umme Daag und Nacht und finde nie kai Rueh.
Das syg dr Wahlkampf sait men is, das gheer halt dert drzue.
Was das ächt koschtet, dängge mir, doch Gäld spiilt schynts kai Rolle
wenn s drum goht ass si im beschte Liecht glänze, die zwai Tolle.
Ai Strytgspreech nonem andere draage si am Färnseh uus.
Dr aint sait do zem andere: „Loos, du kunnsch doch nit druus!
Dy Wahlprogramm isch nit vyl wärt, esoo hesch doch kai Chance
die Wahl no z gwinne – nur bi mir, isch alles in Balance.
Bi mir sin d Budgetzaale schwarz und d Wirtschaft proschperiert,
wenn ych an d Macht kumm, glaubet mir, wird s Land total saniert.
S Granggsy ka sich jeede Birger ohni Kummer laischte
und jeede het sy Huehn im Dopf – oder fascht die maischte."
Dr ander sait: „Es isch zem Hyle, was du do verzellsch,
das isch doch alles Quatsch mit Soosse – nai, wie du d Lyt au prellsch.
Wähler, gänd m i r Eyri Stimm, y c h mach das alles besser!"
Si gän aa wien e Wald voll Affe – baue luftigi Schlesser.
D Wahl ruggt neecher, s spitzt sich zue, d Wahlschlacht, die verbaali.
D Stimmig isch e bitzli graizt, s rutscht gly ab ins Banaali.
Denn isch er ändlig do dä Daag, wo alli dien druff warte.
S Volgg goht an d Urne, d Wahl goht los, d Hochrächnige, die starte.
CNN und NBC sände rund um d Uhr.
Alli sin gspannt wies uusekunnt, eb Stedter oder Buur.
Au s Schwyzer Färnseh miech do mit, het dr „Schällenursli" gfunde.
E Diskussion die ganzi Nacht, in kompetänter Runde,
wird gsändet fir die Intressierte, s schnuure gscheyti Lyt,
Dr Klapprot laitet d Diskussion – und schliesslig isch s so wyt –
s kunnt d Mäldig uus Amerika dr George W. Bush haig gwunne.
Am Bildschirm gsehsch dä freelig wingge, är stoht in dr Sunne.
Aber halt, so schnäll goot s nit, denn d Differänz an Stimme
zem Al Gore isch ganz minimal, dr Bush dä frait sich nimme.
Es wird verlangt, ass me jetz gieng, z Florida vo Hand go zelle.
Dr George W. het sich scho als Presidänt, fyre losse welle.
Jetz frooge sich baidi, Bush und Gore: Bin is oder bin is nit?
S wird zellt, verworfe, wider zellt – s git doch nyt, wo s nit git –
denn d Lechli wo d Maschine nit het kenne regischtriere,
mien d Lyt jetz sueche stundelang. Wohii ka das no fiere?
Bush und Gore gehn wäggselwys bi de Gricht go klaage.
Wär wird denn jetz ächt Presidänt? Im Momänt kaas niemer saage.
Denn d Lyt wo zelle, gseht me gly, sin maasslos iberforderet.
Neyi Lyt wärde drum jetz z Florida zem Zelle abbeorderet.
Zue däm syg s au nit esoo klar, wird nodinoo publigg,
wie d Wähler hätte stimme miesse, driebt gsi syg ihre Bligg.
Pletzlig hänggt s alle zämmen uus, d Richter dien e Machtwort reede:
Fertig zellt, dr Presidänt haisst Bush! – Aber das gseht jo e Jeede,
ass es Bschiss isch, denn esoo, wird mänggi Stimm nit zellt.
Vyl Wähler mache d Fuscht im Sagg, hän s Gfyl me haig si gschellt.
Doch was soll s, s muess wyter go, dr Bush isch halt jetz gwählt.
S isch z hoffen ass äär s Profil no grieg – das won em hitte fählt.
Es wird sich zaige, eb das alles wohr wird, won er het versproche.
He nu, es wird em denn scho glinge, das Sippli ordlig z koche.
Au bi uns het s Wahle gä, z Bärn in Bundesroot.
D SVP will wider e Sitz, wenn dr Ogi goot.
Si stellt zwai Kandidaten uff, e Frau und au e Maa,
doch isch do pletzlig en andre koo, wo schynt s no ebbis kaa.
Schmid haisst er und het gueti Chance, bi de Wahle z gwinne.
D Frau Furrer oder dr Eberle sin drum no lang nit dinne.
Zuedäm het s au no andri Lyt, wo Bundesroot wänn sy.
Me strytet sich drum um dä Sitz und de merggsch es gly,
s kennt hart wärde in däm Stryt, me waiss nit, was s no git.
Und d Kandidate frooge sich: Bin is oder bin is nit?
Am Wahldaag bim erschte Urnegang isch no alles offe.
Au bim zwaite Stimmezelle, isch s Renne noonig gloffe.
Doch denn, im Lauf vo dääre Wahl, zaichnet sich s dytlig ab,
s bruucht kai Zelle wie in USA, denn d Wahl isch nit so knapp.
Mit vyl Stimme und ganz glaar, het dr Sämi Schmid denn gwunne.
Er waiss: Y bi s, jetz isch s verby! Sy Gsicht strahlt wien e Sunne.
Dr Blocher het e Schlappe zooge, syni Lyt sin nimm im Renne.
Er schwätzt vo Opposition – doch y glaub, wie mir en kenne –
het er sicher au scho ghert, ass es dr „schwarz Peter" git
und er wird sich sicher frooge: Han en oder han en nit?
Drum maine mir, Ihr liebe Lyt, e Wahl isch immer delikat.
Wie me s drait – s gwinnt halt nit allewyl dr gwinschti Kandidat.
Doch wissed Ihr was mir zem Schluss, Eych no hän saage welle:
S Wähle isch gar nit so schwäär – doch sott me kenne zelle!

Nit lang abzelle muess me zem Uusefinde, ass d Ladäärnen-Uusstellig au das Johr wiider
vom Fasnachtsmändig, em 5. Merz znacht bis am Fasnachtsmittwuch, em 7. Merz zmiddag
uff em Minschterblatz z bschauen isch. Me ka dert au die ganzi Buschle Zeedel kaufe.
Mer fraien is uff Ihre Bsuech.