€URO-VISION

O €uro my, o €uro my,
mit Francs und D-Mark isch’s verby.
Schilling, Gulde und Peseete
gehn jetz wägem €uro fleete
und au d’Lire isch verschwunde,
numme d’Brite, die hän gfunde:
„Our Pound is very good,
is good for business and for food”
und si danze us dr Raihe.
’s isch glar, ass das jo nit ka fraie
d’EU-Partner - ’s isch fataal.
Me hofft, ass äänen am Kanaal
dr Toni Blair halt doch no kennt
– bevor ’s im EU-Hysli brennt –
bald zer Iberzygig ko,
ass es nit guet syg, absyts z’stoh.
Und bi de Schweede, bi de Dääne –
das mecht y do doch au erwääne –
zahlt men allewyl no mit Kroone.
Y mainty halt, es wurd sich loone,
ass si au im Norde noochedängge
und uff en €uro-Kurs yschwängge.
Rund um unser Schwyzerländli
waggst ganz haimlig jetz e Wändli,
d’Schwyz wird en Insle sozuesaage.
Vyl Schwyzer ligt das uff em Maage,
si mechte gärn zer EU go.
Es hett au sonigi, wo no
mit em Bytritt mechte warte.
Si wänn e neyi Umfroog starte:
Was ächtscht au dr Schwyzer maini?
E glari Linie git’s e kaini.
Doch halt, do isch no d’SVP,
fir die git’s kaini Frooge meh.
Dr Christoph Blocher zieht Bilanz:
En EU-Bytritt syg doch ganz
en abverheyti, schlächti Gschicht:
„Eynen EU-Beytritt gibt es nicht!!!“
Als Bebbi find ys gar nit schlächt.
Ai EU-Währig? ’s isch mer rächt!
Wenn y ins Badisch gang go ässe
kan y ’s Gäldwäggsle glatt vergässe,
denn €uro han y sowiso.
Die han y scho fir ’s Elsass gno,
won y als my Minschterkääs,
mit Kymmi und so richtig rääs
und waich ass er fascht duet fliesse,
mit Edelzwicker gang go gniesse.
Oder rais y an d’Riviera,
lueg mer in Livorno ’s Meer a
und wott e Vino rosso näh,
kan y jo au €uro gäh.
Im Herbscht do flieg y no Sevilla,
lueg mer dert e Stierkampf a.
An dr Kasse zahl y bar
au mit €uro, dasch jo klar.
Me frogt sich scho, wie lang ’s no goht,
bis d’Schwyz vor dr Entschaidig stoht
ändgiltig ze der EU z’go.
Denn irgendwenn wird’s halt scho ko.
E bitz dät’s mer allwäg scho weh,
hätt y kai Schwyzer Frangge meh.
Au wenn dr €uro isch umstritte,
nimmt me doch bi uns scho hitte
do und dert die Wäärig aa.
Syg’s bim Metzger oder Keschtenemaa,
bi de glaine, satte Mysli,
mit rote Liechtli an de Hysli,
bi dr Dolly an dr Bar,
in dr guete Baiz, das isch jo glar.
Gosch an Barfi zeme Bijoutier,
denn dert hesch in dr Montere gseh,
en Uhr wo De drmit wotsch praale,
kasch sicher au mit €uro zaale.
O €uro my, o €uro my,
au d’Belgier sin jo derby,
d’Grieche, d’Eestrycher, d’Portugyse.
Kasch iberal dert en Auti lease
mit €uro – oder in d’Ferie go.
Dr €uro wird im Hotel gno,
in de Läde, uff em Märt,
hett numme no dr €uro Wärt.
Gosch aber no Amerika,
sottsch allewyl no Dollar ha.
Nur an dr Wall Street wird er ghandlet –
dr €uro – und in Dollar gwandlet.
Und d’Moral vo däre Gschicht:
„Ohne €uro geht es nicht!”
D’SVP – mer hänn ’s scho gheert –
isch die, wo sich gege d’EU speert.
Mien mr jetz em Heer Blocher dangge,
ass mer en bhalte, unsre Frangge?

Unseri Ladäärne, aber au alli andere Fasnachts-Kunschtwärgg,
sin wie jeedes Joor uusgstellt uff em Minscherblatz
und zwar vom Fasnachtsmändig znacht, em 18. Hornig
bis am Fasnachtsmittwuche demorge, em 20. Hornig 2001.
Dert ka men au dr Rädäbäng, die ganz Buschle Zeedel und d’Blagette kaufe...
sicher numme geege Schwyzerfrangge.