Unseri Clique

Es isch am Sylveschter 1988 z Rieche im Sarasin-Park gsi, wo mir unseri glaini Clique grindet hänn.
Wie so hyyfig sinn au mir 's Produggt von ere Cliqueschpaltig gsi.

Zwai Joor hänn mir denn als wildi Clique Fasnacht gmacht. Irgend ebbis hett is aber gfählt: Isch es nur 's Sujet, 's gmainsami Goschdym, d' Ladärne oder amänd sogar dr Cortège gsi, won is gfählt het?
1991 hänn mir is bim Comié aagmäldet und hänn unseri erschti Cortège-Fasnacht in Aagriff gnoh.
D Vorberaitige sinn unter emene unguete Stärn gschtande. Anschtatt d' Vorfraid z' gniesse uff dr Morgetraich, hett me gar nid gwisst, eb 's iberhaupt e Fasnacht gäh wird, will me wägenem "Bruune Gold" e Krieg gefiehrt het.
Und denn hänn mr au none Sujet gha, wo wäge däne Eraignis ganz schwirig worden isch. Uss "de Märli vo duusig und ainere Nacht" sinn Diskussione worde, eb mir esoo iberhaupt an e Cortège kenne go.
Mit ere guete Idee in letschter Minute hänn mir us unserem luschtige Sujet e bsinnligs gmacht, wo in dr Präss sehr guet aakoo isch (die Bricht wärde mr speeter doo abbilde).

D Joor druff sinn nimmen eso kritisch gsi. Wie in allne Clique sinn Frind koo und gange. Dr Optimismus und 's gmainsami Fasnachtsfieber hänn is aber jetzt scho über 25 Joor erhalte.

Im Momänt bestoht unseri Clique uss drey Vorträbler, fümf Pfyyffer und aim Drummler.