FA S N A C H T 2 0 0 6
DIE
SCHNÄÄDERFRÄÄSSIGE
Draumjob 'Fasnächtler'
Dr Göttervatter Zeus isch muff
im Olymp, und reggt sich uff:
„Was fallt denn däne Menschen y,
was soll das fir e Furz jetz sy?
E Draumjob bietet ainen a,
es isch e superryche Maa.
Doch was haisst denn Draumjob do,
dr ainzig Draumjob han y c h jo.
Ych herrsch mit unygschränggter Macht,
mit Glanz und Gloria und Pracht
iber d’Götter scho sit Ururzyte,
kai Mensch ka doch my Macht bestryte.“
Doch dr Marquart kimmeret das nit,
är findet sy Idee e Hit.
’s Färnseh macht nadyrlig mit,
denn au die finde’s e Hit.
Me losst aadanze d’Kandidate,
wo vor dr Diir sehnsichtig warte,
bis si e Glägehait denn griege
sich de stränge Regle z’fiege,
d’Uffgoobe wo me stelle duet
schnäll z’leese und das meeglischt guet.
Doch d’Konkurränz die isch knallhart
und me merggt’s, gly noonem Start,
nur die Beschte kemme wyter.
Fir mänggi wird’s gly emool schyter,
sy fuulen uuse us em Renne
will si sich nit behaupte kenne.
Me wert sich zwor mit Händ und Fiess,
denn dä Draumjob wär zue siess.
Doch ’s KO-System verfiegt
Ass nur ain am Schluss denn d’Krone griegt.
So sehsch die Kandidaate plaane,
si sprinte do und derten aane,
si organisiere, dispidiere,
si kreiere, praktiziere
si kurblen aa und spannen y
wär grad fir si kennt nutzbar sy.
D’Uffgoobe sin mänggmool verzwiggt,
ass aim nit grad e Leesig gliggt.
Nur ’s Resultat isch wichtig und
entschaidet eb me wyter kunnt.
Ai Kandidatin oder Kandidat dä het
am Schluss denn ’s Gligg – y mach e Wett –
wenn är sy Draumjob aatritt fir e Johr,
kunnt är sich wie dr Zeus denn vor.
Mir Schnääderfräässige hän is dänggt,
wenn dr Markquart e Draumjob verschänggt,
so kennt me doch im Fasnachtslääbe
au no der Volländig strääbe.
Wie bim Draumjob kennt me jo versueche,
dr Draumfasnächtler afoo sueche.
Was sott dä fir e Profil denn haa?
’s kennt e Frau sy oder e Maa.
Är miesst nadyrlig – das seht men y –
vo dr Fasnacht aagfrässe sy.
Es sott die Frau oder dä Maa
dr Fasnachtsvirus in sich haa.
’s Johr duure fiebere uff die drey schneenschte Dääg,
denn an dr Fasnacht immer zwääg.
Am beschte wär’s, är miessti nie
ins Bett go – drey Daag duurezieh.
Iber d’Fasnacht und ihri Gschicht
kennt är brichte us objektiver Sicht.
Wurd sich nit geege d’Obrigkait Comité stelle
und allewyl Äxtrawirschtli welle,
wurd nadyrlig an sym Mantelgraage
e goldigi Blaggedde draage.
Wurd während em Cortège – ’s isch nit zem lache –
nie sy Larve uffemache.
Gieng gärn emool aine go schnabbe,
hät aber nie „ain uff dr Kabbe“.
Wurd nur in Basel wohne welle,
wurd uff e Petrus immer zelle,
ass dä an jeedere Fasnacht
allewyl Superwätter macht.
Wie dr Traumfasnächtler kennt uusgseh,
wänn mir Eych zaige – jo persee.
Unsre Drummler isch ’s Modäll
und es merggt e jeede schnäll,
so schygg und vornähm – ’s lychtet y –
ka nur dr Draumfasnächtler sy.
Nit lang sueche muess me d’Ladärne-Uusstellig. Si isch
allewyl no uff em Minschterblatz vom Fasnachtsmändig,
6. Meerze znacht bis am Fasnachtsmittwuch demorge,
8. Meerze 2005. Dert ka me au dr Rädäbäng, die ganz
Buschle Zeedel und d’Blaggedde kaufe. Mer fraien is
uff Ihre Bsuech.