Basel isch e scheeni Stadt,
historisch interessant und glatt.
Au s kulturelle Agebott isch grooss
do isch z Basel ebbis los.
Me ka ins Theater go,
im Kunschtmuseum sich erkläre lo
modärni oder alti Kunscht.
Nit numme das, es git au sunscht
no vyl anderi Meegligkaite.
Klassischi Muusig ergänzt das braite
Agebot an Underhaltig
und sinnvoller Freyzytgstaltig.
Wär klassischi Muusig nit so mag,
dä kennti jo emool e Daag
in ains vo de vyle Kino go.
Au fir Sportfan gäbt is jo,
e Grund emool no Basel zko.
Tennis und dr FCB
kasch in St. Jakob unde gseh.
Au dr EHC spiilt dert,
doch was aim an däm Club halt steert
isch dass er allewyl verliert
und so s Tabällenändi ziert.

So gseh isch Basel attraktiv
und aigedlig jo ganz aktiv,
doch gits halt in dääre Stadt
au Lyt die findes gar nit glatt,
wenn znacht men ihre Schloof duet steere
und si dien sich drgeege wehre.
Kultur jä, aber ohni Steerig
in dr Nacht, haisst s voll Empheerig.

Zem Byschpyl s Kulturfloss uf em Rhy
ka aigedlig numme zoobe sy.
Die Muusig isch halt ebbe luut,
doch goht s de Junge under d Huut.
D Stimmig isch toll, doch laider, laider,
hän d Baizer am Rhy dert dr Verlaider.
Si dischpidiere, proteschtiere,
interveniere, reklamiere.
S Gschäft lauft zwor guet, doch ainewäg,
bringes d Baizer schliesslig zwäg,
ass s Kulturfloss schliesse muess – dasch doof –
schloof Basel, schloof!

S Basel Tattoo isch en Event
Wo me wyt iber unsri Stadt uus kennt.
S bringt Basel Ruhm, em Julliard Gäld.
Bloosmuusige us dr ganze Wält
mache bi däm Tattoo mit,
s isch immer uusverkauft – e Hit!!
E Fyrwärgg gheert halt au drzue,
das steert e baar in ihrer Rueh.
Si lyten a uf d Bolizey
und maine; S syg e Sauerey
dr friidlig Birger znacht so z steere!
Drum dien si sich drgeege wehre.
Ain wo am lytschte schreyt – dasch s sinnige –
dä wohnt nit z Basel sondern z Binnige!
S Fyrwärgg wird nit diräggt verbotte,
doch dr Julliard dänggt: Mir sotte
uf s Fyrwärgg allwäg verzichte,
zem in däm Mais e weenig z schlichte.
So knallt s nimm im Kasärnehof:
Schloof Basel, schloof!

Gosch zoobe emool an d Clarastrooss,
dänggsch dert isch sicher ebbis los.
Fir vyl Gäld het me die Strooss saniert,
damit me dert läädelet und flaniert.
Au zoobe sott dert Lääbe sy,
doch wenn de dert bisch, merggsch es gly.
Die wo do hän flaniere welle,
die kasch an zwai Händ abzelle.
Mit em flaniere isch es nit wyt häär,
e Betonwieschti – trischt und läär –
isch zoobe als die Clarastrooss
und wie gsait, es isch nyt los.
Und bletzlig merggsch, s fähle jo au d Baim,
voller Fruscht goosch denn halt wider haim.
De dänggsch: S isch schad fir d Zyt und doof:
Schloof Basel, schloof.

Mir Schnääderfräässige dängge do:
Zem Gligg gits z Basel d Fasnacht no!
Ab em Fasnachtsmändig, frieh am Morge,
kenne mir denn ohni Sorge
mit Drummle und mit Piccolo
vergniegt dur d Basler Stroosse go,
amtlig bewilliget und nit verbotte.
Falls sich Lyt dra steere sotte,
solle si unsri Stadt verloo
und halt in d Karibik go!
Isch d Fasnacht umme, denn isch s wider
z Basel zoobe still und bider
uf em Blatz, der Strooss, im Hof:
Schloof Basel, schloof!

Drugg: Walz + Co., Inhaber Werner Walz, im Glaibasel

Wenn u doo unde uff dr Lingg gliggsch,
griegsch dr Zeedel no als PDF!

Dr Schnäädi-Fasnachtszeedel 2008