Dr Zeedel 2009

E jeede Schwyzer Birger het
aigedlig nit underem Bett
sy Gäld, won är als spaare duet,
nai, sy Bangg, die hietet ʼs guet.
 Au Aktie kauft er bi dr Bangg,
wenn die guet schafft, no kan er dangg
der Bangg e rächte Gwinn verbueche,
doch hitte heersch die maischte flueche.
Die Aktie sin nyt meh Wärt,
kai Wunder ass me sich beschwärt
bi däne, wo ʼs Gäld sotte hiete.
DʼAaleeger lehn sich das nit biete,
si wättere iber dʼChefetage
und iber däne ihri Gage.

Die hän us luuter Gyr und Macht
jeedi Art vo Gschäfter gmacht.
Falsch inveschtiert und denne no
saftigi Boni drfiir bikoo.
DʼFinanzkryse bringt bi de Bangge
die ganz Finanzstruktur ins Wangge.
DʼChefetage foht aa klage
ʼs Finanzloch liggt ere uf em Maage.
Dr Bund muess hälfe mit vyl Moneete
Sunscht gehn emänd Sparylage fleete.
ʼs Banggewääse isch uff em Hund,
me waiss nit, wennʼs wiider besser kunnt.

Doch e Dail Edelrassehind hän scho
ʼs sinkend Banggschiff gly verloo.
In ihri goldige Hundehitte
hän si sich verkroche hitte.
Dr goldig Fallschirm sorgt drfiir,
ass au s goldige Frässgschiir
nie läär wird bi de Privilegierte –.
Doch bi däre Sach sin die Laggierte,
die wo bange mien um ihre Job
bi däm Mega-Riiseflop.

Dr Wärt vo vyle Hyser singgt,
me waiss nit wohär Rettig winggt.
ʼs Private Banking isch au betroffe,
vyl Aaleeger hän sich verloffe,
fyle sich ganz allgemein belooge
und hän ihr ganzes Gäld zruggzooge.

Em glaine Biger gohtʼs an Kraage
Är muess die ganzi Lascht jetz draage.
DʼUnsicherhait die wiegt rächt schwäär,
sogar bi mänggem Millionär,
wo nit jeede Frangge miessti kehre,
doch au die dien sich jetz wehre.

Die wo Mega-Salär gha hän,
gän aa, ass au si jetz wänn
ans Finanzloch ihre Bytrag laischte,
doch isch dʼRuggzahlig fir die maischte,
fir das wo die zooge hän, vyl zʼglai:
e Dropfe uff e haisse Stai.

Was sicher gsi isch, gilt hit nimme,
ebʼs ächt je wird wider stimme
mit dr Berse und de Gwinn,
im Momänt ligt nyt meh dinn.
Wenn de mechtisch Gäld verliere,
kaschʼs au ihn Spiilgäld inveschtiere.
Im Casino hesch immerhii drno,
e bitz Luxus drfir bikoh.

Was hit Not duet isch doch klar,
ass die mit Superhonorar
sich uff dʼBeschaidehait dien bsinne,
es kennte alli drby gwinne.

Mir bruuche kaini Superhind,
die schaffe sich doch numme Find.
Mit ihrer Gier no Macht und Gäld,
schade si dr ganze Wält.

E Bärnhardiner wär jetz guet,
wo de Mensche hälfe duet,
wenn si in Schuldelaschte stegge,
wo si als wie meh zuedegge
wien e Lawine gross und schwär.
In so Fäll do kämt denn är.
Er grabt si uus, er macht ʼne Muet,
ʼs giengt däne Mensche wiider guet.

Die Kryse bloggt is als wie meh,
ʼs Änd vom Tunnel wänn mer gseh.
Fir uns alli ischʼs e Gwinn,
wenn dʼBangge wiider sicher sin.
 

Dʼ Ladärne-Uusstellig isch wie allewyl uff em
Minschterblatz und zwor vom Fasnachtsmändig
znacht bis am Fasnachtsmittwuche demorge.
Me ka dert jo au die ganz Buschle Zeedel, dr
Rädäbäng oder dʼ Blagette kaufe. Dʼ Wääge und
Requisyte sin au das Johr wiider uff em Kasärneareal
uusgstellt. Mr fraien ys uf Ihre Bsuech.