Mir stauben ab !

E Vulkan – das waiss me jo –
ka mänggmool halt zem Uusbruch ko,
denn speyt er , Fyr und Äschen uus,
s kunnt gliejendhaissi Lava druus.
D' Wolggen us Staub drait
's umenand,
deggt alles zue in Stadt und Land.

So isch es
's letscht Johr z' Island gscheh.
Me het die groossi Wolgge gseh
wyt iber halb Europa uuse.
De Fluggsellschafte foht
's a gruuse,
denn dä Staub – zwor glai und fyn,
me seht en guet bi Sunneschyn –
schadet em Flugzyg ganz infaam
und leggt dr Flugbetriib ganz lahm.
Dä Vulkan in Island speyt enorm.
Me het das in dääre Form
fascht nie erläbt, es isch e Gruus,
me ka dert nimme us em Huus.
Isch dr Uusbruch denn verby,
setzt 's grooss Abstaube derten y.
s goht lang bis alles suuber isch
und d' Luft wiider rain und frisch.

„Mir stauben ab“ – haisst au normalerwys,
d' Butzfrau isch do, em Staub goht 's mys.
Er wird vertriiben us em Huus,
d' Staublimpe schittlet me zem Fänschter uus;
das sott me aigetlig nit mache,
doch git 's halt allewyl so Sache,
die sin als schlächte Bruuch no doo –
Däm undedra gfallt' s nit esoo.
D Butzfrau, verstoole und ganz schych,
macht 's drotz dr schlächte Gwohnet glych.

„Mir stauben ab“ – het au en andere Sinn!
D' Bangge mache wiider Gwinn,
vergässe isch die groossi Kryse,
won e baar riise Verlischt uuswyse
und dr Staat in d' Däsche längt,
Milliarde wärde dert versänggt.
Doch verby isch eebe sälli Zyt
und hit isch 's wiider esoo wyt,
ass d' Dräggspatze in dr Chefetage
munter vergreessere ihri Gage.
Si stauben ab wo' s numme goht,
dr Birger seht drum dunggelrot,
es jaggt en gwaltig us de Sogge,
sait nimm abstaube, nai, abzogge!
Er maint me sott ne 's Handwärgg leege
und wott sich wehre dodrgeege.
Doch 's nutzt em nyt, si mache 's glych
und wärde nodinoh scheen rych!

Abgstaubt het au dr FCB
das het me 's letscht Joor dytlig gseh.
Dr Cup hän d' Bebbi wider gwunne,
scho dert hän d' Fans e bitzli gspunne.
Doch d' Abstauberey goht wyter,
fir die andere Clubs isch 's schyter,
denn dr FCB wird souverän
Maischter, do isch jede Fan
zem Hysli uus, er frait sich riisig
und hofft, dass es das nit gsi syg.
In dr Champions-League git 's denn e Hit.
Dert spiile d' Bebbi ganz scheen mit.
Si staube d' AS Roma ab,
gwinne dr Match – und das nit z' knapp.
Laider het 's denn doch nit wyter glängt,
nochhär hän si Pinggt verschänggt.
Dr Draum vo dr Champions-League-Ändrunde
het sich in Staub uffgleest – und isch verschwunde.

D' BaZ haig drotz Farbe Staub aagsetzt,
dr oberscht Chef wird drum ersetzt,
das wänn die neyje Inveschtore.
Au dr Blocher wirblet unverfrore,
dä BaZstaub uff, setzt neyji Norme.
Doch oha lätz, drotz de Reforme,
wänn d' Inveschtore jetz uusstyge,
me heert do und dert si syge
,nimm intressiert und wänn verkaufe,
s ganz droht uus em Rueder z' laufe.
Do mäldet sich e neyje General,
me kennt en z' Basel iberaal
er het friehner e Fluglinie gha,
Moritz Suter haisst dä Maa.
Dr uffgwirblet Staub butzt är ewägg
als General – es isch kai Schlägg.
E neyji Grundlaag will är gä,
die Ufgoob wott em niehmer nä.
Drotz dr entstaubte BaZ isch jo
e riise Schuldebärg no do.
Mr hoffe, 's sitzi dr ney Boss,
nit z' hoch oobe uff sym Ross,
ass er bletzlig oobenaabe kunnt,
wenn em die ganzi Sach wird z' bunt.
Mir finde 's ganz Theater gspunne.
Erfolg ha, wär em Moritz z' gunne!

„Mir stauben ab“ soll 's Motto sy
au bi unserer Armee, denn gly
isch die vyllicht nur no halb so grooss,
verstaubti Traditione sin mer los.
E frische Wind und au Reforme
solle d' Armeestruktur umforme.
E diräggte Find isch nienen umme,
drotzdäm verschlingt d' Armee Unsumme.
Sparkurs isch aagsait, Effiziänz,
Neyji Flugi kemme nit in d' Gränz.
andri Zyl leese die verstaubten ab,
denn 's Gäld isch au bim Ueli knapp.
So wird allwäg d' Armee bald ney,
vom staubige Balascht ganz frey.

Wotsch meh vo de Schnääderfrässige wisse oder vyllicht sogar
mit uns emool Fasnacht mache, denn lueg doch unseri
Schnäädi-Hompage im Internet aa! D' Internetadrässe heisst:

http://www.schnaeaedi.ch