Kasch ebbis nimme bruuche,
isch s drzue no zimmlig alt?
Dien di d Gedangge ans Furtgheye schluuche,
wills dir aigentlig no rächt guet gfallt?
Denn kenntsch drmit zem
Broggehuus laufe
oder s uff em Flohmi go verkaufe.
Kasch es au uff s Trottoir stelle
und scho gly - ohni s ebberem verzelle -
fahrt e Peugeot uss em Elsass aane.
Uss em Kofferruum luege schone baar alti Fahne.
Bi dämm Gedangge kunnsch in
Truur:
So goht me nid um mit Wältkultu(h)r!
Sell das alte tiire Stigg si
Wärt erhalte,
wottsch es trotzdäm sälber nimm verwalte,
gits no ai Idee, e ganz famoosi:
Ins Museum gheert daas Stigg, daas grossi!
Fir e Bild, ka me s im
Kunschtmuseum go versueche.
Gheersch scho vo Wytem dr Diräggter flueche:
‚E Neubau hämmer gly, e super Modärne.
Waas i ussstell, stooht aber in de Stärne.
S Gauguin-Bild wird keini vo dääne Wänd verziehre.
Mir mien sofort unseri Plään aafoo redimensioniere!‘
Bi dämm Gedangge kunnsch in
Truur:
So goht me nid um mit Wältkultu(h)r!
Ischs en alts Buech, holsch
uss dr Garage di Kaare.
Wotsch schnuerstraggs zur Unibibliothek aanefahre.
Kuum hesch dr Motor vom Auto aagschalte,
duet di scho e Schugger schroff aahalte.
Är droht dir mit ere Buess, enere groosse.
Duu haigsch geege s ney Verkehrsregime verstosse.
S Buech wird eso im Käller verschwinde.
Ganz imene Egge hinde wirds niemerds me finde.
Bi dämm Gedangge kunnsch in
Truur:
So goht me nid um mit Wältkultu(h)r!
Wältkultu(h)r sett me nid
naim go verstaue.
Nid mit em Naagel an e Museumswand aanehaue.
Wältkultu(h)r muess jede Daag lääbe!
Denn isch si fir alli Mensche e Sääge.
In Basel gits aini vo dene
Wältkultu(h)re ganz lääbig.
Fir die bruuchts au kai gross aaglegti Wärbig.
Obwohl scho alt, het si no kai Bitzli Schimmel.
Regiert wird die Wältkultu(h)r grad uss em Himmel.
Pfyffe vom Feynschte und au Värsli singe,
drummle und Kritischs uff e Liinwand bringe,
schränze, Zeedel verdaile und au intrigiere.
D Frau Fasnacht gniesst und duet sich amüsiere.
Uns muess d UNESCO nid in
anderi Sphäre heebe!
Ohni Verohrnig, ohni Buesse, ohni Gsetz
dien mir im Fasnachtshimmel schweebe.
Drey Dääg lehn di vergässe s bleede Alldaagsghetz.
Dr Waggis, dr Blätzli, dr Harlekin und die Alti Dante
ghöre nid uff Siile au nid hinter Museumsschrangge!
Oh, i lueg grad uff mi
Armbanduhr:
D Zaiger dien sich scho richtig Vieri beweege.
Uff uns wartet aimool meh dr Fasnachtsseege.
S isch Zyt: Mir sinn Wältkultu(h)r!
Wältkultu(h)r puur:
Die gits vom Määndig zoobe bis am Mittwuch demorge
uff em Minschterplatz an dr Ladäärne-
ussstellig und uff em Kasäärneplatz bi dr Waage-
und Requisiteussstellig