Blägg Breggfescht
Vor em Dinner
wyssgle mir zwai Zimmer
Me sait, si gheere zue de Beschte,
die vyle Lyt mit wysse Weschte.
Doch wenn y an dä Aaloss dängg,
wo an Disch und uff de Bängg
am Rhy alles so Wyssi sitze
und am Summeroobe schwitze,
han y halt myni Bedängge,
muess das Bild ebitz yschrängge.
Nit alli wo wyss aagleggt sin,
hän allewyl nur guets im Sinn.
Y dängg do an FIFA-Diräggter,
es dunggt mi halt im Drägg do stäggt er.
Er sait zwor immer und mit Stolz:
Han e wyssi Weschte und bi us rächtem Holz,
ha mir au nyt Schlimms vorzwärfe.
Ihr gehnd mir ganz scheen uff d Närve,
mit eyrem Ghetz geeg, my Person.
Haiss Blatter und bi e Walliser Sohn.
Au andri sunne sich in ihrem Glanz,
doch dääre Sach drau ich nit ganz.
Si brüschte sich mit wysser Weschte,
wänn fir s Glaibasel numme s Beschte,
doch was s Glaibasel macht bekannt,
torpediere si mit fyser Hand.
S Basel Tattoo zem Byschpyl gryffe si a
me sott doch Stolz sy so ebbis z ha.
Die wänn sich doch nur profiliere,
in dr Allgemeinheit präsentiere.
Drby het s anders wo z beachte wär,
wo im Glaibasel wiegt sehr schwär.
Do gäbt s halt Flägge in die wyssi Weschte,
so dängge die Lyt es sygi s Beschte,
wenn me uff ebbis ummeryte duet
wo aim persee nit basse duet.
Wyss isch e Farb wo glänze duet
und au e mänggem stoht si guet.
Wyss syg au d Unschuld sait me jo,
doch wenn me wurdi aane go
und alles under d Lupe näh,
wurd s allwääg sehr vyl Dolgge gä.
Draage Lyt e wyssi Weschte,
gheere si wäg däm nit zue de Beschte.
Drum sag y lieber: Der zue stoh
und mit de Fähler dur s Lääbe goh.
Au bi de Mooler isch wyssi Farb bekannt.
Me bruucht si in Stadt und Land.
Zem d Wänd wiider scheen wyss z bikoo,
strycht me Wyssgi driiber und drnoo
isch alles zuedeggt was aim steert
und was nit an e Huuswand gheert.
Ihr Sprayer lehnd eych das nur saage:
Me heert so vyl Huusbsitzer klaage,
wenn ihri Huuswand isch versaut
ame Huus, wo frisch isch baut.
E wyssi Weschte hän ihr sicher nit,
ihr Sprayer – und s isch gar kai Hit,
was ihr do machet, y find s nit guet,
wenn men eych nit verwitsche duet.
Mir Schnäädis maine zue wysse Weschte,
an dr Fasnacht isch s doch s Beschte,
ass me under em Goschdym nimm ka saage,
eb d Lyt e wyssi Weschte draage.