Daas sait me nit!
E keschtlig Guet isch unsri Sprooch,
doch 's dänggt halt niemer driber noch,
ass mr gwissi Uusdrigg hän,
wo d'Kritiker hit nimme wänn.
Si schreye Zettermordio:
Eso kenn 's nimme wyter go.
In unserer Sprooch haig 's Uusdrigg din,
wo aidytig rassistisch sin.
E Moorekopf, e siesse Gnuss!
Grad dä Uusdrugg schafft Verdruss.
E Farbige – dä armi Dropf –
miess aaneheebe mit sym Kopf
fir e soone Getterspyys.
Dää Uusdrugg, dää syg obermyys,
miess us em Werterbuech verschwinde,
dien d'Kritiker entsetzt verkinde.
E Lääbe frey in dr Natuur.
Do dänggt me zerscht halt an e Buur.
Doch die Lyt, wo mir do maine,
fligge Kochdepf, flächte Zaine,
schlyffe Mässer, no vo Hand
und ziehn frey dur 's ganzi Land,
wohne im Waage uf me Fäld,
hän gwehnlig au nit so vyl Gäld.
Zigüner haisse doch die Lyt,
doch darf me halt in unsrer Zyt,
dääne gar nimm esoo saage,
suscht wurd men is emänd verklaage,
uf Grund vo däm Rassismusgsetz.
Fahrendi, so haisst das jetz.
Zem butze holt me sich ins Huus
e Butzfrau, denn die kennt sich uus
im suuge, bloche, Fänschter butze.
Dää Uusdrugg darf me nimm benutze!
Butzfrau haig e schlächte Ruef,
Ruumpflägere haissi jetz dä Bruef.
Ass me nimm darf Butzfrau saage,
do driber dien d'Huusfraue klaage:
„ 's isch glych, wie men e saage duet,
d'Hauptsach isch, si butze guet!“
Me sait doch en ere junge Frau
Fräulein oder Jumpferen au
hämmer dänggt, doch daas isch 's Dumme,
d'Zyte, die sin nämmlig umme,
wo me daas no saage darf
und d'Fraue reagiere scharf:
„Fräulein – nai, wie kaa men au –
saage Si mir bitte Frau!“
Dää Uusdrugg, dää isch halt vom Disch
fir e Frau, wo nit g'hyrooten isch.
D'Groosseltere hän als eme Maa,
wo gwehnlig kunnt us Afrika
Neger oder Nääger gsait
und das bi jeeder Gläägehait.
Wenn me daas so hit wurd saage,
dääte si aim glatt verklaage.
Das Wort Neger isch umstritte
und gilt als rassistisch hitte,
drum muesch dr's hinder d'Ohre schrybe,
s Wort Neger, daas losch lieber blybe.
Mir Schnääderfräässige dängge halt:
Die Kritiker, die lehn is kalt!
Mir reede gärn so frey und frisch,
wien is dr Schnaabel gwaggsen isch.