Dr Zeedel 2019

 

Aadie MUBA

 

Wenn „Es war einmal“ am Aafang stoht,

nimmt men aa, dass es um Määrli goht.

Doch die Gschicht do isch real und schlimm,

kai Määrli vo de Briedere Grimm.

‘s isch d Gschicht vo unsrer MUBA und

wie’s bald zu ihrem Ändi kunnt.

1916 beschliesst d’Regierig jo,

Basel soll sy Waaremäss bikoo.

Im Casino isch dr Startschuss gfalle,

au bim Badisch Bahnhof in ere Halle.

Scho bim Start het d’Mäss vyl Echo gha,

drum muess si e rächte Namme ha.

Me findet au e Namme gly,

Schwyzer Muschtermäss, so soll er sy

und dr Basler Groossi Root befindet:

‘s wird au e Gnosseschaft grad grindet.

 

D’Mäss waggst rasant, dr Blatz wird gnabb.

Es zaichnet sich drum bald au ab,

ass me d’Vergreesserig sott plaane,

es mien jetz neyji Hallen aane.

Me baut fimf Halle als Ersatz –

dails us Holz, das schafft meh Blatz –

dert, wo d’Mässhalle hit no stehn.

Doch was gly kunnt isch nit scheen.

2 Johr speeter sin die neyje Halle

em eme Riisefyr zem Opfer gfalle.

 

No däm Groossbrand seht me gly,

das Fyr kennt au e Chance sy.

D’Mäss kan e groosse Ussbau blaane,

si stellt bald neyji Hallen aane.

Dr Uffschwung spyrt men iberaal,

vor allem bi dr Bsuecherzahl.

Au bim Baue git’s kai Rueh,

D’Hallezahl nimmt ständig zue,

will d’Ussteller halt Blatzwinsch hän,

sich besser presentiere wänn.

‘s lauft bländend, ‘s isch die beschti Zyt,

d’Muschtermäss stoht im Zenith.

Si isch e Hit – ‘s Mässfieber paggt

im Friehlig d’Stadt, si wird beflaggt.

D’Lyt kemme us em ganze Land,

z’Basel an d’Mäss im Sunndigsgwand.

‘s wird nit nur gluegt, me kauft au y

mit Mässrabatt Meebel und Wy.

D’Deguschtation isch e Magnet,

wär me dert nit alles gseht.

D’Mäss isch daas Basler Friehligsfescht,

mit dausige guet gluunte Gescht.

 

Ass me global d’Mäss besser kennt,

wird si ins Kirzel MUBA umbenennt.

 

Nodisnoh spyrt d’MUBA Drugg

und Bsuecherzahle, die gehn zrugg.

Dä Drugg kunnt vo de Sonder-Mässe,

me darf dä Umstand nit vergässe.

D’«ART BASEL» isch die Mäss fir Kunscht,

‘s git aber au no Mässe sunscht.

Es git e Mäss fir «HOLZ» und «BAU»

und die fir «SCHMUGG und UHRE» au.

Anderscht wird bi dr MUBA au no meh,

us ere Gnosseschaft wird en AG.

In dr Schwyz mischt me bi andere Mässe mit,

glaar, ass es e neyje Namme git.

MESSE SCHWEIZ so haisst me jetz,

und het e groosses Mässenetz.

Au bim Bauen isch dr Deyfel los,

‘s git neyji Halle protzig, grooss.

 

Dr MUBA-Abstiig goht no wyter,

s Druurspiil nimmt sy Lauf, ‘s isch schyter.

Au z’oberscht isch ‘s zem Eclat ko,

dr Chef – dr René Kamm – muess go.

Denn fallt d’Entschaidig, ‘s isch enorm.

D’MUBA in dr gwohnte Form,

Soll’s ab däm Johr denn nimme gää,

‘s haisst vo dr MUBA Abschiid näh.

‘s isch druurig, aber das isch’s gsii:

«Aadie MUBA – mr vermisse dii!»

 

D’Ladäärnen-Uusstellig isch allewyl no vom Fasnachtsmändig zoobe bis

am Fasnachtsmittwuch demorge uf em Minschterblatz. D’Requisyte und

D’Wääge sin uf em Kasäärneblatz uusgstellt. Uf em Minschterblatz und

an de drey Verkaufsständ (CINS) in dr Stadt ka men au die ganz Buschle

Zeedel, dr Rädäbäng und d’Blageddde kaufe. Mr fraien is uf Ihre Bsuech