Ebs wirgglig nitzt isch
egaal:
D Hauptsach es isch CO2 neidraal
So wie s friehner gsi isch, isch es hitte
nimme.
Soll hit alles das, wo friehner richtig gsi isch, nimme stimme?
Frogsch d Klimapäpschtin Greta, maint si numme:
„Dr CO2-Usstooss isch z grooss und mit de Klimasinde ischs jetz umme!
Iberal uf dr Wält kenn me als Spur vo unsre Klimasinde,
dä schregglig groossi CO2-Fuessabdrugg finde!“
Mir maine: „Hämmer all die Johr jetz unsri Umwält esoo bschisse?
Weeles sin denn unsri Klimasinde, wämmer wisse!“
Wenn men als wott wyter furt in d Ferie
goh,
hett me bis hitte – ohni Froog – halt s Fluugzyg gnoo.
Doch d Fluugzyg stoosse schynts – es kennt aim gruuse –
No de Umwältaktivischte vyl z vyl Abgaas uuse.
Drum maint au d Greta – s isch nit glooge:
„Fir in d Ferie z goh wird nimme gflooge!“
Wenn den iberen Alpwaid gosch gsehsch d
Kieh, die scheene, bruune,
si hänn zwor hitte mänggmool kaini Herner meh und du wirsch stuune,
die stoosse schynts bim hindenuuse Luft abloh,
enormi Abgaas uus – esoo kas nimme wyter goh!
Drum schafft me d Kieh ab und es haisst mir sotte
kai Flaisch meh ässe – das wird au verbotte.
D Vegetarier aber au d Veganer lache sich ins Fischtli und
saage numme: „Lueget doch, mir sin jo drotzdäm gsund!“
E Tannewald, das isch e Gschängg vo dr
Natuur.
D Baim nämme Schadstoff uf, gän suubri Luft ab und es isch Erholig puur.
Im Määrli isch dr Hänsel mit dr Gretel ungescheniert,
frehlig dur dr Tannewald zem Häxehuus spaziert.
Doch hit nämt allwäg d Greta dr Hänsel us em Määrli an dr Hand
und wurd em zaige wie d Natuur kaputt goht – s syg e Schand.
S isch guet gits Määrli, wo me sich no driiber fraie kaa,
denn d Wirggligkait die holt aim y, me ka kai Fraid dra haa.
Dr Santiglaus dä dät doch us em
Schwarzwald stamme.
Vo dert uus gieng er zue de vyle, vyle Kinder amme.
Sy Beglaiter isch dr Eesel, dä drait au die groossi Gschängglilascht.
Doch giengts no dr Greta Thunberg – glaub y fascht,
die wurd au em Santiglaus sy Eesel glatt verbiete,
zem em Eesel syni Abgaas hindenuuse jo z verhiete.
E wytere Beglaiter gheert zem Santiglaus au no drzue.
Es isch dr Schmutzli, doch dä het vo sym Job jetz gnue.
Sy Namme git de Klima- und den Umwältschitzer z dängge.
Si wänn d Wyterverbraitig vo sym „Schmutz“ yschrängge.
Si ergere sich und dien in Manifescht verkinde.
Dr Schmutzli wird nimm duldet, dä muess ganz verschwinde.
Kryzfahrte uf em Meer mit Schiff, wo
ganzi Glaistedt sin.
Bi vyle Lyt sin die beliebt und in de Ferie „in“.
Luegt me die Sach mit dääne Schiff aber emool neecher aa,
isch klar, ass dr Greta allwääg an däm gar kai Fraid ka haa.
Die Schiff bruuche zem Fahre allewyl extrem vyl Energie.
Das ka ganz sicher gar nit guet fir d Umwält sy.
Au dr Usstooss vo däm CO2 isch riisegrooss,
drum goht d Kritik an dääne Schiff so richtig los.
Verbiete sott me si, maine drum d Klimaaktivischte alli,
au wenn das halt de Liebhaber von ere Kryzfahrt gar nit gfalli,
S Auti isch, das ka me glaub scho saage,
bi de maischte Lyt beliebt, e Jeede fahrt gärn in sym aigne Waage.
S bruucht aber halt au Trybstoff, ass die Auti fahre kenne,
do wird kritisiert, ass d Auti Dysel und Benzin verbrenne.
Me prangeret was hindenuuse kunnt an CO2 bi däänen Auti aa.
Haut dr ganz motorisiert Verkehr in d Pfanne, wo me numme kaa.
Es git zwor hitte Auti, wo elektrisch fahre, doch das isch nit d Masse,
drum verteyflet me dr gwehnlig Autifahrer und bittet en zer Kasse.
D Umwältschääde wo dr Klimawandel bringt,
die sin scho grooss,
Drum schleen die junge Aktivischte – agfiehrt vo dr Greta – richtig los.
Doch muess me denn grad alles, wo mir als hän kenne druf vertraue,
a priori an ere Demo und me Streik esoo verhaue?
Dr Abfall isch au e Probleem, do fallt is
d Basler Fasnacht y.
Dert fallt vyl Abfall aa, s ka gar nit anderscht sy.
D Waggis wärfe Räppli, au Orange und Mimoose.
Ebben emool goht soone Wurf halt au in d Hoose.
Er kunnt nit ganz bi sym Empfänger aa,
syg das e Frau oder sygs e Maa.
Au Verpaggig, Schachtle, Grienzyg landen uf dr Strooss.
Am Donnschtigmorge sin die Abfallbärge riisegrooss.
D Stroossewischer wische denn die Iberblybsel vo dr Fasnacht uf.
D Klimaaggtivischte wärde sicher als ab däänen Abfallbärge muff.
Si wurde dängg – zem die enorme Abfallbärg z verhiete,
am liebschte d Fasnacht au no grad verbiete.
So luege mr jetz halt, wies no wyter goht
und wies in e baar Johr denn um unsri Umwält stoht.
Lehnd is an de drey scheenschte Dääg mit de Verbott in Rueh.
Mir mache aggtiv Fasnacht jetz, drum blooset is in d Schueh.