Alles isch im Wandel hit.
s isch so vyl wo aim z' dängge git.
Me het Angscht und macht sich Sorge,
wacht uff mit Sorgen als am Morge
und hofft dr Daag gieng guet vorby
s kenn ändlig alles besser sy.
Doch laider isch es nit esoo,
s isch neys Unhail fiire ko:
D' Medie schlachtes greftig uus
und mache Horror-Storys druus.
No stehn mr under schwärem Schogg,
will em Donald Trump sy Blogg
s Wysse Huus in USA
gstirmt het und verwieschte ka.
Dr Wärt vo dr Demokratie
stoht in Froog – wie kaa das sy?
Men undersuecht zwor alles gnau,
doch macht 's is Sorge 's kennti au
in der Schwyz so ebbis gschee,
das duet em ächte Schwyzer weh.
Ganz bletzlig het dr Putin
welle,
dass wiider soll
zue Russland zelle
d'
Ukraine, 's Nochberland.
Er foht e Grieg aa – 's isch e Schand.
Dä Grieg isch schlimm und macht is Sorge,
es kennt jo sy, dass am e Morge
Atomwaffe zem Ysatz käme,
Angschthaase dien sich schregglig gräme
und schreye: „Sehn er das nit y,
s ka nur e Wärgg vom Deyfel sy!“
Scho so lang schlehn mr is jetz umme
mit Corona und die Dumme
behaupte no, 's kenn gar nit sy,
das syg nie e Pandemie.
Doch ständig heert me driiber brichte
und ständig git's au neyji Gschichte.
's isch nyt sicher, vyl erfunde,
me het Angscht und wott erkunde
was wirgglig wohr isch und was glooge,
doch 's blybe numme ganz vyl Frooge.
Corona
isch nit 's ainzig jo,
won is Sorge macht 's git no
dä Ängpass doch, bi Strom und Wasser,
d'Regierig bestimmt und macht 's no krasser.
Me soll nimm bade, numme dusche.
D' Angschthaase dien denn au grad kusche,
mache kai Liecht und ässe kalt,
d' Energie wird
gnabb jetz halt.
Luegt
me gnau aane, isch es halb so schlimm,
me draut unsrer Beheerde nimm.
Hochgjublet
wird au d' Datsach hit,
dass es e Rohstoffmangel git.
's Gas wird gnabb, mr grieges nimme
vom Putin, anderi bestimme
wo 's härkunnt, d' Ehlhaizig soll wägg,
d' Sunne
soll aane zue däm Zwägg.
D' Menschhait waggst, es het bald nimme
gnueg Wohnruum, me duet drum bestimme,
,Heer und Frau Schwyzer solle sich yschrängge,
s aige Huus an Naagel hängge.
Do lache d' Hiehner, doch d' Angschthaase
kusche und spaare halt in dääre Phase.
Tipps zem Spaare git's e Huuffe,
ass mr in Vorschleeg fascht versuuffe.
Die wo Angscht hänn, glauben alles,
lääbe fromm, denn ass im Fall es
emool z' Änd im Lääben goht,
mecht me doch wisse, wo me stoht.
Zem Deyfel mecht me nit in d' Hell
drum isch me brav – an dääre Stell –
mechte mr aber jetz no saage:
„Kopf hooch und nit immer klaage“.
Alli Fakes und Falschprognose,
gehn vyllicht emool in d' Hoose.
Denn hänn die Rächt, wo allewyl
saage: „Haltet doch nit z'vyl
vo so Prognose, läbet froh,
es ka jo nur no besser koo“!