Vor ebbe siibehundert Joor -
nai, lachet nit, denn es isch woor -
hänn Schlesser unsri Landschaft ziert
und so d Macht representiert.
Kennig, Firschte, Minnesänger,
Hofnaare, Hängger, Miessiggänger
alli die hesch derte gsee
und hitte findsch si niene mee -
dänggt jede - doch lueg und 's wird dr klar
's isch hit no glych "wie's früher war":

 In dr Wirtschaft herrsche hit nur Keenig -
ihr "Outfit" koschtet au nit weenig.
Luftschlesser gseesch derte-n-im Bau
e Byschbyl drfir: dr alt SBV.
Dr Keenig Ospel hett syni Auge gschlosse
und sich blindlings iber e Disch zieh losse.
Zämme duet me d'UBS-Hymne singe
vyyl Zwärgli mien iber d'Klinge springe.
Personalchefs wärde ze Inquisitore,
d'Probleem waggse-n-e scho iber d'Ohre.
Doch kuum stoht 's Luftschloss - goht's scho los
's git e Schlänz in d'Muure - riisegrooss.
Dr Chabiavaletta nimmt dr Huet -
wird arbetsloos - doch däm goht's guet,
e Landsitz hett er im Graubinde
scheen abgschirmt kasch en derte finde.
Dr Ospel brobiert dr Schlänz jetz z'fligge,
sunscht dien 's emänd au no in d'Wieschti schigge.

 Bim Keenig Bill isch's ganz anderscht gange,
er blybt am Burgfrailain Monica hange.
Fir d'Draim vom Bill luegt si so guet
ass dä dr Gummi vergässe duet.
Fascht bricht's em 's Gnigg, däm groosse Maa
Nur wäägem Flägge uff em Glaid vo dr Monica.
Kai Gummi gno - das bringt em Bill groossi Sorge
Dr Kongräss will en absetze um's verworge.

 Do gseet me, wie-n-e Schlessli uus Luft
ohni groosse Uffwand ganz aifach verpufft.
Het's glepft lehn d'Keenig ihr Volgg im Stich
und reede sich uuse mit groosse Sprich.

 Im Luftschlessli z'Rieche hesch wäg'ere-n-uralte Idee
uff dr Wiise vor luuter Stoff d'Baim nimme gsee.
Dr Firscht Christo und sy Hofdaame Jean-Claude
verkaufe d'Idee als ney und verhille alles wo goht.
Dr Schlossheer Beyeler macht e lang Gsicht -
wo-n-er uffwacht isch vyyl zfrieh fertig die Gschicht.

 Luftschlesser, Draim und Illusione
bringe nyt und koschte nur Millione.
D'Berse in Asie isch ganz schwär uff em Rumpf
und Russland versinkt allewyl mee im Sumpf.

 In New York schiesst me-n-ab dr d'Amato
dä zieht jetz in L.A. schynt's Tomato
und duet si greftig dope mit Gülle.
Wotsch 's Doping-Rezäpt? Frogsch am beschte dr Zülle!
Keeniglig isch dr Ytritt bim FCB.
Wenn die wyter so schuutte - koscht's aber gly gar nyt meh.
D'CIBA wott fusioniere mit de Clariante,
dr Zolli griegt drfir 3 Elifante
und de Schwoobe isch's jetz sicher wohl:
E Joordausigwäggsel ohni Kanzler Kohl.
Em Kanzler Schröder isch es nimm um's Lache:
statt kritisiere muess är jetz ebbis mache.

 's greescht Luftschloss find ych - ohni Hohn -
isch doch unsere Stadt-Kanton!
Im Färnsee duet me-n-iber d'Stadtflucht brichte,
frogt d'Lyt, worum si uff's Land dien flichte.
Die Gfrogte sin frindlig, wirgge betroffe
lehn aber mit dr Antwort alli Frooge-n-offe:
Vyl schwätze nyt saage isch dr beschti Trigg
so kunsch au grooss uuse in dr Politik.
Eb Cornaz, Schaller, Vischer, Schild,
alli plaudere wie wild.
Was nutzt zem Byschbyl em Glaibasel
mit syner Kriminaliteet das Gfasel.
Mee Schuugger wämmer uff de Stroosse gsee.
Das isch kai Luftschloss - jo persee.
Kai Luftschloss isch au 's "Klein-Istambul".
Oh Bebbi, do isch doch ebbis fuul.

 Der Schwyzerische Schyyverband
baut e Luftschloss fir d'Schyyass vo unserem Land.
Als Sponsor het er kenne d'SWISSAIR griege,
mit däre solle d'Schyyass an d'Spitze fliege.
Doch d'Luft isch duss, es hett nyt gnutzt,
de Schyyass hett's bees d'Fliigel gstutzt,
si beleege maischtens die hindere Blätz.
Dr Draum isch uus jetz - ohalätz.

 D'Elsbeth Schneider vom Kanton Baselland wurdi gärn
als Bundesreetin fir ihri Partey no Bärn.
Me präsentiert si in Zytige, Radio
und au am Färnsee isch si ko.
Doch pletzlig blatzt die ganz Idee.
Nie wirsch d'Frau Schneider im Bundesroot gsee.
Sie zieht sich zrugg und schiggt sich dry:
"'s isch ja nur es chlyses Träumli gsy!"

E-n-US-Balloonfahrer - ha-n-i vernoo -
het e Luftschloss baut - um d'Wält soll's goo.
Doch d'Chineese mache do nit mit.
Iber China fliege darf dr Balloonfahrer nit.
Är muess aabe, dr Draum isch uus.
Me kaa do au ebbis leere druus:
Wotsch z'hooch oobe-n-uuse mit kiehnem Muet,
goht das mänggmool gar nit guet.
Wenn'd mainsch heigsch dr Wäg zeme Heeheflug gfunde -
bisch ganz pletzlig wider am Bode-n-unde.

 So goht's halt im Lääbe bim Luftschlesser baue,
me kaa sich do mänggmool ganz bees verhaue.
Doch dr Draum vom Gligg und vom groosse Gäld
beheerscht ebe hitte die ganzi Wält.
Mir Schnääderfräässige maine do derzue,
Luftschlesser-Architäkte heeb's mee als gnue.
Luftschlesser sin jo hit grooss in Mode,
doch mir blybe denn halt doch lieber am Bode.