Nodäm is dr Petrus zwai Yoor e Bitz im Stich gloo het, isch daas wättermässig e Joorhundertfasnacht gsi. Drey Dääg 's scheenschte Wätter het jedem Bebbi sii Härz none Bitz heecher lo schloo.
S Wätter het d' Schtimmig in dr Clique fascht zem blatze brocht.
Es isch e bsunderi Eer, wenn me am
Morgestraich Geburtsdaag kaa fyyre. Unser Geburtsdaagskind het dä denn am erschte Halt
grooss gfyyrt: Mit Schämpis und Kueche - d Kääswaie und d Mählsuppe hänn fir aimool
miesse warte.
Dr Schämpis het uff jede Fall no gholfe bim Ableege vo de letschte Hemmige, wo no vor
wenige Minute drfir glueg hänn, ass die richtige "Aa" aifach nit us em Picollo
hänn welle. Jetzt aber hets heerlig deent und daas bis am Donnschtig am Morge am Vieri.
E glaine Ydrugg vo dr letschtjährige Fasnacht sellen e paar Bilder vermittle, wo unsere kanadische Frind an siinere erschte Fasnacht gschosse hett. Drzue kunnt dr Zeedel, wo mir s letschte Joor uff Diskette am Cortège verdailt und im Internet aazaigt hänn.