Liebi Fasnächtlerinne, liebi Fasnächtler
Mir fraien is, ass Dir dr Wäg ins Internet zu unserem Fasnachtszeedel gfunde hänn.
Mir winschen Eych viel Schpass bim Läse vom Zeedel.

Dear Fans of Basle Fasnacht
It's a pleasure for us that you are visiting our hompage of our Clique.
On Monday morning, 26th February 1996 at 4 o'clock, in Basle (Switzerland) starts the Fasnacht.
This a carnival tradition as Carnival in Rio or Mardi Grass. If you are interested in Fasnacht, there is another
Fasnachtsserver in Internet, where you can also see pictures of our Fasnacht.
Our Clique is a group of about twenty you people, who are drumming and pipeing.
 In our homepage you can read our Zeedel, in which we describe our sujet (theme) of our group.
This Zeedel is written in Basel-Deutsch a German Dialect.
Probably you won't understand this Zeedel, but we thank you very much for visitinbg our homepage. 
Perhaps we'll see you next Fasnacht at Basle 

Cheers

The Schnääderfräässige

Als Neandertaler hesch no d'Keule gschwunge
und soo dr Reschpäggt vo dr Frau erzwunge.
De hesch se paggt uff niechtere Maage
oder ere a baar an d'Biire gschlaage.

Mit däne Zyte isch 's ändgiltig verbyy,
denn als Maa darfsch numme none Softy syy.
Anstatt e Keule schwingsch hit d' Computer-Muus
und kasch das nit, denn kunsch nit druus!

Drum het dr "Ober-Softy" Billy Gates,
e ney Programm erfunde, - e wirgglig gscheyts!
Windows 95 haisst si neischte Hit
und 's mache alli blindlinggs mit.

Mit Wäärbe-Spots und Fäärnsee-Shows
bis 's aifach everybody knows,
kriegsch gsait wo 's no Win95 het.
Drum: "Kaufe - hai go - ab ins Internet!"

Im Internet-Kaffi luegsch Home Pages aa,
was wirgglig jeede Duubel kaa.
Und wenn aine ebbis z'verzelle het,
denn seerft er gschwind duurs Internet.

E Richter-Bschluss git's bi de Schwoobe:
De Porno-Fans het me so e Riigel gschoobe.
Die Maischte finde 's dr greeschti Schtuss,
denn Internet-Sex bringt dr safeschti Schuss.

Ohni Computer bisch hit klääglig verloore,
drum het me d'Eleggtronigg zem Gott usserkoore.
'S waiss fang jeedi Huusfrau wie die Kischte goot
und wo si Hilf griegt in irer Noot.

Es kunnt dr Bsuech - s'git Filet-Stiik (Steak!)
Kai Problem fir di als Computer-Friik (Freak!):
Wie das Stigg Flaisch muesch duurebroote,
duet's CD-ROM-Kochbuech dir verroote.

'S Perseenlige verschwindet als wie mee.
Bim eleggtronisch reede bruchsch enand jo nimme gsee.
'S normal Delifon wirfsch doch glatt in Rhy,
denn nur mit emene Händy bisch no derby.

Usser d'Computer dien no anderi uff is luure
und hinterleen ganz himmeltruurigi Spuure.
Muesch Angscht haa vor däne eel-triefende Gleen,
wo statt Mensche scho am Fliessband steen.

Wie ganz guet trainierti Super-Affe
dien d'Roboter fir is s'Dopplete schaffe.
Denn gheersch zwor zu de Arbetsloose.
Derfir kasch dr ganz Daag Techno loose.

Mit dr Frau Fasnacht wärde mer denne noodisnoo
an d' Latenight-Fasnet-Techno-Party goo:
Am Monday Morning at 4'o clock wird si starte
und uff d'Adräggtschens muesch nimm lang warte:

Drummel- und Pfyyffer-Roboter steen in ainer Raie,
und dien bi jeedem Taggt e bitz Eel in d'Mängi saie.
Au d'Waggis-Roboter schmaisse mit voller Kraft
statt Orangsche numme no mit Orangschesaft.

Bevor me das Zyyg nymm ka kontrolliere,
mien mir jetzt ebbis Neys brobiere.
Oh, wenn mir 's doch numme wie friener hätte!
Drum lehnd is jetz alli zämme bätte:

Unseri Satelite, wo ihr doo schwäbet im All.
Ghailigt seell wäärde eyri wachsendi Zahl.
Eyer Ryych seell no besser und greeser wäärde,
fir das eyre Wille gscheh im Himmel und uff Äärde.
Unseri däägliche Informazione mien mir haa,
denn ohni die sinn mir ganz mies draa.
Bitte vergänd is, wenn mir iber Computer klaage.
Mir vergänn eych derfir eyri Ussfäll fir Daage.
Und fieret is nit in Versuechig mit Sex,
wo mir finde bim seerfe im Inter-Netz.
Drum diend is befraie vo all dämm Beese,
wo mir kennte mit däne Computer ussleese.
Denn eych gheerts Ryych vo de Ryyche und d'Graft,
won is alli zämme schafft,
erlyychtet is mit eyrer Heerligkait.
Hit und in alli Ewigkait.
Amen.

Unsere Fasnet-Computer, wo mit em Fasnachts-Virus infi(s)ziert isch,
ka me zämme mit viile andere Ladäärne vom Fasnachtsmändig z'nacht
bis am -mittwuch demorge uff em Minschterplatz go bschaue.
Apropoo - mit bitzeli seerfe, findsch dä Zeedel jetzt im Internet!