'S WICHTIGSCHT UFF AI BLIGG
Do isch
e Lischte vo de wichtigschte
Linggs uff unserer Homepage und im
Internet:
Dr Bummel 2024
Dr
Fasnachtsmittwuch 2024
D Ladäärneussstellig 2024 bi
Nacht
D Ladäärneussstellig 2024
bi Daag
Dr
Fasnachtszyschdig 2024
Dr
Mändigscortège 2024
Dr
Morgestraich 2024
'S
Ladäärneyypfyffe 2024
'S Värslibrinzle 2024
An dr Luzärner Fasnacht 2024
Am Vogel Gryff 2024
D
Vorfasnacht 2024
D' Homepage vom Fasnachtscomité
Vyyl z'schnäll sinn die drey Dääg wider verby gange.
Dangg däm, ass mir nümm vo Halt zu Halt hänn miesse renne, hänn mir während de lange Pause vyyl Fasnacht könne miterlääbe. Trotzdäm hämmer glych no nid alli Clique gseh, wo mir gärn emol hätte wölle seh.
Es isch aimool meh e tolli Fasnacht gsi. Aimool meh het uns dr Petrus zeigt, wien är mit de Wätterprognoose vom Färnseh und de verschhiidene Wätter-Äpps umgooht: An dr Fasnacht luegt är fürs richtige Wätter!
Jetzt mien mir zimmlig lang warte.
Villicht hilft s einte oder andere Bild vo dr Fasnacht bi dr Motivazion für die näggschti Fasnacht in deere lange Wartezyt.
Zum Aastand vo gwüssne Zueschauer geegenüber allne aggtive Fasnächtler, dueni mi nid üssere. Es basst zu dr Zyt!
Aber ai grossartigs Detail möchti erwähne und es bedrifft unseri teilwyys gschundene Bangge. Am Banggeplatz hänn zwei grossi Bangge iri Fassade grossartig dekoriert. Die einte ziegt scho länger an dr Fasnacht uff ihrer Terasse d Blagedde in 3D. Vis-à-vis isch daas Joor en anderi Bangg drzue koo, wo ihri Fassade mit Fansachtfiguure herrlig dekoriert het. Eifach fantastisch! Daas gits numme in Basel. Merci vyylmool und wyter eso! Mir hänns gseh und sehr gschätzt.
Es het e baar Föteli uff dr Homepege :-) Die meischte Bilder vo dr Ladäärneussstellig sinn jetzt au sortiert.
Mit enere Raadpanne het dää Mittwuch bi uns gstartet. Ei Ladäärnepneu isch völlig kaputt gsi. Zum Glügg hämmer en Ersatzpneu gha, wo mir fascht in dr glyche Zyte wie dr Raadwäggsel amene Formel 1-Renne hänn könne wäggsle.
Alles guet? Fascht! Nach em Nachtässe hämmer denn der näggscht Raaddefäggt amene andere Raad vom Ladäärnewaage entdeckt. Und jetzt hämmer kei Resärveraad meh gha. Dangg dr Hilf vonere Charivari-Fründin vo uns, hämmer d Ladärne könne gschützt parkiere bis an Ändstraich.
Und erscht kurz vor em Ändstraich het au dr Petrus em Rääge miesse Tribut zolle. Am Nommidaag uff em Cortège und au Zoobe het uns dr Petrus aber sii Verbundeheit zu de Fasnächtler zeigt.
Und mir hänns gnosse.
(Doo dr Link zu de Bilder)
Und in dr Nacht verwandlet sich dr Münschterplatz noonemool. Fascht zweihundert Ladäärne funggle in d Nacht vom Fasnachtszyschdig. Waas sich gmoolt oder immer meh au plottet präsentiert isch aimoolig. Und daas alles für die Nacht reschpeggtiv für 72 Schtund Fasnacht.
D Details uff de Ladäärne findet me an däm Oobe nid uff allne Ladäärne. Für daas het me denn dangg de Foteli nach dr Fasnacht Zyt.
(Doo dr Link zu de Bilder)
Sunneschyyn und aagnähmi Temperature sorge uff em Münschterplatz an dr Ladäärneussstellig vor allem am Nommidaag füre riise Druggedde. Wieso me in deere Druggede in de änge Gasse zwüsche de Ladäärne no de Bekannte, wo me numme an dr Fasnacht drifft, immene improvisierte Kaffikränzli muess verzelle, wieviel Liigistiehl in de Leschte Mallorca-Ferie am Swimmigpool scho am nüni am Morge bsetzt gsi sinn, bliibt mir e Rätsel.
Eigentlig stööhn doch an däm Daag d Ladäärne im Zentrum und wenns vyyl Lüüt het, wärs schön, wenn sich alli wurde beweege. Fürs Kaffikränzli jetzt jo gnueg Baize rund um die grossartigi Ladäärneussstellig.
(Doo dr Link zu de Bilder)
S meteorologische Zwüschehooch sorgt füre grandiosi Stimmig an däm vogelfreye Fasnachtszyschdig. Kinder, Grüppli und Gugge sorge für e borzig volli Stadt (eso borzig voll wie ammigs s Wartezimmer vom Doggter FMH).
Dr Rümmeliplatz und d Ladäärneusstellig sinn für uns - au wenn mir mache was mir wänn - an däm Daag e Must.
S erschte Mool simmer daas Joor durch d Fasnachtsgass gässlet und s letschte Mool bi dr Lotti zum Nachtässe yykehrt.
(Doo dr Link zu de Bilder)
Noonem Morgestraich warte nid numme d Gugge und d Wääge uff ihre Uffdritt am Cortège. Au d Clique könne jetzt ihri Sujet richtig ussspiile.
Als glaini Grubbe stelle mir immer no fescht, ass e mängi Stammclique uffs Drummle und Pfyffe am Cortège verzichte. Wenn me weiss, wieviel in deene Clique giebt wird, finde mir daas e Bitz schaad. Aber jeede söll an dr Fasnacht daas mache, was är wott. Das het s scho dr Shakespeare propagiert.
(Doo dr Link zu de Bilder)
Dr Petrus het für d Fasnächtler kämpft und het numme e baar Räägedropfe am Morgestraich miesse uss de Wolgge duurelooh.
Neu simmer daas Joor am Rümmelplatz mit emene lange Halt gsi. Dört hämmer vyyl vo de farbige Sujets uff de Laäärne gseh. Dr Morge vo de Ladäärne isch herrlig gsi.
(Doo dr Link zu de Bilder)
Die letschte Joorzähnt hämmer s Yypfyyffe sälber mitgmacht. Was in dr Innestadt an däm Oobe abgooht, hämmer numme vo wytem ghört.
Daas Joor hämmers Yypfyyfe in dr Innestadt miterläbt: D Stimmig isch in gwüsse Momänt mystisch und zwüscheduure au scho zimmlig feschtlig gsi. Uff em Münschterplatz hets fascht eso vyyl Lüüt wie am Morgestraich gha :-)
Jetzt goohts numme none baar Schtund.
(Doo dr Link zu de Bilder)
Numme no e baar Schtund bis zem Morgestraich. Und mir sinn barat.
Am Samschtig vor dr Fasnacht fooht sich d Fasnacht in dr Stadt aa zeige: In de Pausehöf vo de Schuelhüüser und sunscht uff Vorplätz zeige sich die erschte Ladäärne.
Eigentlig isch es dr Samschtig vom Värslibrinzle. Will aber schon alli Värsli uff dr Ladäärne sinn, beschrängge mir uns uff s Cordon-Bleu.
(Doo dr Link zu de Bilder)
Wie 's sich ghört, foohts am Frytig aa gääre. S Adrenalin styygt aa.
Daas Joor ändet d Frauenoobe-Tradizion bi dr Lotti. E letschts Mool hets (kei) Polizeyschtund gäh.
Doo s Klingeli sit mehrere Joor scho nümm git, sinn d Herre daas Joor wider amene andere Ort gsi: In dr Eintracht.
S het alles passt.
(Doo dr Link zu de Bilder)
Für uns isch es zum d Vorfreud steigere. In Luzärn isch es dr Abschluss vonere fanatsievolle Fasnacht, wo vom Petrus mit emene grandiose Fasnachtszyschdig belohnt worde isch.
Mir hänn wider tolli Sujets und Goschüüm gseh.
(Doo dr Link zu de Bilder)
S Charivari und s Drummeli ghööre zu den Fasnachtstradizione. Anders isch anders oder neu.
Mir hänn die Zyt uff jeede Fall gnosse und sinn jetzt barat für die drey scheenschte Dääg.
Infos zu unserem Sujet hets au uff dr Homepage.
(Do dr Link zu de Vorfasnachtsbilder)
Doo wartet me e ganzes Joor - d Wäägeler sogar no vyyl länger - uff d Fasnacht und kuum goohts Liecht am Mändig am Vieri ab, legt sich 72 Schtund spöter wider die mystischi Rueh über d Stadft. D Fasnacht het sich wider uss dr Stadt zruggzooge und es heisst wider: Waaaaaaaaaaaaaaarte!
Es isch e Draum-Fasnacht gsi: Dr Petrus het wider gluegt, ass s Wätter mitgmacht het! Merci!! Und in dr Stadt hets scho lang nümme eso vyyl Zueschauer an ere Fasnacht gha wie in däm Joor.
Mir hänn dää Zauber gnosse. Übrig blyybe sinn d Erinnerige, wo uff unserer Hompage mit vyylne Bilder aagreggt wärde. Aber Waaaaaaarte mien mir halt glych wider.
Dr zweit Cortège het uff is gwaret und doodrmit au eins vo de Cortège-Highlights in däm Joor.
D Queen, wo jetzt mit dr Frau Fasnacht im glyche Zimmer wohnt, isch vo de Schnurrebegge imene Prachtszug geehrt worde.
Ass im Fasnachtshimmel jetzt dr Gintonic yygfiehrt wird, wird dr Fasnacht sicher nid schaade - im Geegeteil.
Als Alti Garde isch dr Marschstress uff em Cortège wägbloose und mir könne em Stroossedriibe mehr zueluege und ab und zue au dr Durschte lösche.
(Doo gits Bilder vom Mittwuch bis zum Ändstraich)
Trotz Energiespaare hän si uff em Münschterplatz in dr Nacht wider gfungglet: D Ladäärne.
Unverständlig - ober ebbe au nid, wenn me d Fasnächtler*inne-Dichti in unserer Regierig aaluegt - isch, ass die Prachtskulisse nid wie sunscht mit em belüüchtete Münschter krönt worde isch.
Um die ganzi Ladäärnepracht uff eim z wirgge loo, muess me die Kunschtwärgg am Daag und in dr Nacht go aalugege.
Mir hänn daas gschafft. Und durum gits daas Joor doo äxtra zwei Syte mit fascht allne Ladäärne.
Wenn duu alli Bilder genau wottsch studiere, isch allwäägs scho gly wider die näggschti Fasnacht.
D Fasnacht läbt hüt und in de näggschte Joor. Es machts dr Aaschiin, wenn me dr Fasnachtsnochwuggs hüt in dr Stadt het könne beobachte. Und die, wo numme mit em Plastiggsagg in d Stadt göhn, zum Siessigkeitet und anders go sammle, sinn in dr Minderheit.
Zoobe denn hänn d Gugge ire grosse Uffdritt gha.
Für uns isch dr Fasnachtszyschdig dr Fähridaag.
(Doo gits Schnäädi-Zyschdigs-Bilder)
Nach emene Draum-Morgestraich wartet die erschtig vo den beide Pararde durch d Stadt.
Ändlich dörfe au d Wääge und die überig bliibene Chääse sich wider zeigt.
Für foohts als Alti Garde e neui Ära aa:
Mir mien nümm eso wyt laufe und könne dr Cortège mehr gniesse. Mir könne au no länger am Morgestraich bliibe und es längt sogar no für e kleini Pause deheim.
(Was me alles uff em Cortäge
und um Mändig Zoobe e könne gseh, zeige mir doo)
Es isch kiehl gsi an däm Morgestraich. Aber s Funggle vo de Ladäärne, d Kläng vo de Piccolo und Drummle an däm Morge hänn uns aber yygheizt.
Dr Morgestraich ka nüt anders ersetze. Eifach numme draumhaft.
Au unsere ANGSCHT-Macher - dr Deyfel - het in de dunggle Stroose glychtet.
(Was mir no alles an däm Morge gseh hänn, seht me doo)
No e kurzi Nacht und denn isch es e sowyt.
Dr Winter isch zrugg. Daas ka aber d Vorfreud nid driebe.
Mit em Yypfyffe erreicht das Fasnacht d Basler Stroosse und me spührt's:
"S ligt eifach öbbis in dr Luft!"
Gly isch es eso wyt.
(Doo sinn d Bilder vom Ladäärneyypfyffe)
Im Migros stööhn scho d Schoggioschterhaase Spalier und dusse entdegge mir scho die erschte Oschterglogge.
Aber es isch Samschtig vor dr Fasnacht. An däm Daa wartet d Ladäärne uff ihri Värsli.
Nach zwei Stund dichte und schlyyffe sinn den d Värsli uff dr Ladäärne gsi.
(Doo gits Bilder vom Värslibrinzle)
D Zyt vor em Morgestraich wird immer kürzer.
Am Frytig vor dr Fasnacht sinn dr Damen- und Herrenoobe e Tradizioon.
D Dame sinn bi dr Lotti iikehrt und d Männer sinn die neui Sunne go teschte.
(Doo gits e baar Bilder vo däm Oobe)
Draumwätter bim Urknall am Schmudo, Sunne puur am Güüdismändig und Friehlig am Monschtercorso. Es muess s Wätter an dr Fasnacht sii - au in Luzärn.
Me hets gmerggt: Für die Fasnacht het me sich wider e ganzes Joor könne vorbereite.
Ass sich d Fasnacht wyterentwigglet isch offesichtlig an in Luzärn: D Katzemuusig isch eine vo de letschte Gugge mit de typische groose Grind, wo friener in Luzärn no wyt verbreitet gsi sinn.
Zwei Sache hänn sich in in Luzärn könne halte, wo in Basel enere 'Leischtigsorientierig' e Bitz zum Opfer gfalle sinn: D Gugge sinn gröschteteils no richtigi Gugge, wo falschi Tön zum guete Ton ghöre. Un d Einzelmassge muess me nid sueche, will si überall in dr Altstadt unterwöggs sinn.
Öbbis verdient e bsunderi Erwähnig: Ei Gugge vo Luzärn het sich d Basler Fasnacht vom 2020 zum Süschee gmacht, will d Luzärner no Glügg gha hänn und d Basler uff d Fasnacht hänn kurzfrischtig miesse verzichte. Het's schonemol in Basel e Süschee zur Luzärner Fasnacht gäh?
(Doo gits Bilder vom Güdiszyschdig und em Monschtercorso in Luzärn)
Zimmlig genau zwei Mönet duurt daas Joor d Vorasnachtszyt. Und in deere Zyt bruuchts e gueti Mischig vo Pressiere und Gniesse.
D Goschdüüm sinn in Rekordzyt gnajht gsi.
Zum Gniesse simmer an verschiidene Vorfasnachtsveraastaltige ko. Sygs im Pfyfferli, im Charivari, im Fasnachtshuus oder im Rootstaab-Cabaret in Lieschtel. Überall het me d Vorfreud uff die erschti Fasnacht ohni Corona-Diskussione gfreut.
Nach all dääne Vorfasnachtshighlights sinn mir jetzt uff d Fasnacht gspannt.
(Doo gits verschiideni Vorfasnachtsbilder uss em 2023)
No Zwei Wuchen alt isch s neue Joor alt gsi. D Blagedde isch scho im Verkauf. Aber s erschte Mool e Bitz Fasnacht schmegge, kasch am Vogel Gryff: Zoobe bim Rundgang mit de Olymper pfyffts und ruessts s ersche Mool eso richtig im Glaibasel.
Und au dr Petrus sändet en erschts Signal: Au wenn's Zoobe e kurze heftige Räägeguss gäh het, sich dr Vogel Gryff drogge gsi.
(Doo sinn e baar Bilder vom Vogel Gryff 2023)
No isch noonig emol Wiehnachte und au bis zum neue Joor goohts au none baar Dääg.
Aber ebbe: Isch die einti Wiehnacht verby, wartet scho d Basler Wiehnacht uff uns. Und wär weiss, was no an Unplaantem uff uns wartet. Dururm mache mir de Homepage für daas barat, wo me wyter under am Rhy "die neui Session" nennt und bi uns eifach "die näggschti Fasnacht" heisst.
Mir sinn in de Startlöcher.
Vyyl z schnäll gooht dr Draum verby.
I hoff aber, ass d Erläbnis vo däm Joor genau dr Joorhunder-Morgestraich vom näggschte Joor - wo denn hoffentlig alles e Bitz normaler sött sii - dien vorbereite.
Eins isch klar: Ohni Fasnacht goohts nid!
Und mir wänn nie meh länger als e Joor uff dr näggscht Morgestraich warte.
(Doo sinn d Bilder vom Fasnachtsmittwuch)
D Ladärneussstellig isch grad bi däm tolle Wätter dr Bilderliiferant Nummer 1 für döö daa.
Ass alli - öb passiv oder aggtiv - en enorme fasnächtlige Nochhoolbedraf hänn, zeigt sich zoobe am Guggestärnmarsch.
Ass d Wäägler dört mitgmacht hänn, isch toll gsi und zeigt allne, ass si zur grosse Fasnachtsfamile ghöre.
Über die drummelnde und pfyffende Glöön, wo s Gfühl hänn, si miesse an däm Zyschdigoobe nid Ruggsicht näh uff d Gugge, ka me nid vyyl schlaus saage. Zimmlig sicher hänn si Trychlerbluet in ire Bluetbahne und im Kopf vyyl leere Platz.
(Doo sinn d Bilder vom Fasnachtszyschdig)
Au ohni Cortège ka me e tolli Fasnacht gniesse.
Sinns denn grad alli Fasnächtler, wo das mache, duet s Stadt richtig beebe.
(Doo sinn d Bilder vom Fasnachtsmändig)
Âimoolig! Mehr weissi gar nid z saage zu däm Sensazions-Morgestraich.
Mir hännen bis kurz vor em Mittag richtig gnosse.
(Doo sinn d Bilder vom Morgestraich)
Es isch e draumhaftigi Fasnacht gsi.
Fascht hätte mir vergässe, wie s isch, wenn am Mändig am Vieri demorge s Liecht in dr Stadt abgooht und s numme no pfyfft und ruesst und d Ladäärne in allne Grössene lüüchte.
Dr Petrus het si Beschsts gmacht und uns für die zwei verlohrene Joor mit emene Prachtswätter entschädigt.
Vyyl z schn$ll sinn die 72 Schtund verby gange.
Was bliibt sinn die tolle Erinnerig und e Schwetti vo Bildli, wo an die drey scheenschte Dääg erinnere. D Schwetti entschädigt für die letschte beide fascht bilderloose Joor.
Ändlig! Jetzt stooht deere Nach-Corona-Super-Fasnacht nüt meh im Wääg. Mit sinn barat und freue uns riisig.
Hüt simmer go d Ladärne yypfyffe und hänn denn e wyters feyns Znachtässe gha. Merci vyylmool de Köchinne Inge und Coni und em Koch Mauro.
Jetzt warte mir
numme no e halbi Nacht uff dr Morgestraich!
Ändlig bisch zrugg!!
(Doo sinn d Bilder vom Yypfyffe)
Vor de letschte Vorbereitige am Samschtig hets zerscht no dr Damen- & dr Herrenoobe gäh.
D Stimmig isch scho denn beschtens gsi.
Am Värslibrinzle-Samschtig het me scho am Nommidaag in dr Stadt gseh, ass öbbis bsunders im Aamarsch isch.
Vor em
Värslibrinzle hets e Feyns Znacht gäh.
Denn isch es ans Brinzle gange.
(Doo sinn d Bilder vom Värslibrinzle)
Glych verruggt wie mir z Basel sinn d Fasnächtler in dr Innerschwyz. E bsunderi Verbindig gits zwüsche Luzärn und Basel.
Und durum hämmer wölle wüsse, was die Fasnächtler no mit 10 Dääg weeniger Vorbereitig uff d Bei hönn könne stelle.
Bimene draumhafte Fasnachtswätter - si hänns nodürlig verdient - simmer an Monschter-Corso.
Es het e Bitz weeniger Lüüt gha als anderi Joor und nodürlig au vyyl Charivari-Guggezüüg. Daas het aber dr guete Stimmig gar nid gschaadet.
(Doo sinn d Bilder vom Monschter-Corso)
Fascht zwei Mönet isch daas Joor d Vorfasnachtszyt gsi.
Nach emene Joor fascht ohni Fasnächtligs het me daas Joor wider uss em Volle gschöpft.
Ass dr Vogel Gryff mit Schutzkonzäpt stattgfunde het, isch e Sääge für d Fasnacht gsi. Bis denn hänn nämmlig Vyyli scho gmeint, ass es au daas Joor mit dr Fasnacht schyter wird ussgseh. Dr Vogel Gryff het Hoffnige geweggt.
Zwei Joor lang isch es im Fasnachtshärz vo allne Bebbene und Bebbis gaanz dunggel gsi.
Am 9. Februar 2022
isch es aber hell worde am Fasnachtshorizont.
Es git e Fasnacht!
Und e baar Dääg spöter sinn schrittwyys alli Hindernis gfalle. Es git e
richtigi Fasnacht.
Nur dr Cortège wirds nid gäh, will s Comité dr Meinig gsi isch, ass me
daas de Clique nid het könne zuemuete und die arme Clique völlig
überforderet gsi wäre. Joo, me ka's eso seh und mir dangge em
fürsorglige Comité.
Jetzt luege mir
vorwärts und freue uns uff die drey scheenschte Dääg.
D Nid-Fasnacht isch Gschicht! Was bliibt? I weisses nid. Villicht d Erinnerig an öbbis, wo me nie dänggt hät und d Hoffnig, ass eso öbbis nie wider passiere wird.
Luege mir positiv vorwärts und wünsche mir uns, ass die unsäägligi Corona-Hysterie gly emol uffhört und unser Lääbe wider e Bitz normaler wird.
Mir wänn uns wider druff freue, eimool im Joor drey nid normali Dääg z erlääbe. In 353 Dääg sölle die drey richtig abnormale, die drey eimoolige ebbe die drey scheenschte Dääg in Basel starte.
Eimool het mehr als glängt. Jetzt bruuchts wider die richtigi Fasnacht.
E baar Bildli vo unserne Erläbnis am Nid-Fasnachtszyschdig und vom Nid-Fasnachtsmittwuch gits no uff unserer Homepage.
Adiee Nid-Fasnacht!
Mir wüsse, ass d Frau Fasnacht esone Nid-Fasnacht nie hät wölle.
Me häts bis vor e baar Daag sich nie könne vorstelle: E Fasnacht komplett abzsaage.
Sit am Frytig am 12i zmittag, hänn vyyl s Gfühl, si siige Teil vomene ganz schlächte Horrorfilm.
Spööhtischtens sit am Mändig am Vieri am Morge wüsse mir, ass daas kei Film isch sondern unglaubligi Realiteet.
Uff der einte Syte macht d Konsequänz, wie me die gaanz Fasnacht abseit, Angscht: Me het e unüberwindbaari Hürde innerhalb vone baar Minute überschritte und d Fasnacht eifach für daas Joor liquidiert. Me weiss jetzt, wies gooht und me weiss, ass im Grosse und Ganze d Fasnächtler em Wunsch vo de Behörde entspräche und s Entschiidene aggzeptiere.
Uff die anderi Syte
läbt bi vyyle Fasnächtler s Fasnachtshärz wyter.
Die ruehige und weniger ruehige Manifeschtazionen am Morgestraich
vo de Fasnächtler an verschiidene Ort in dr Stadt, beruehige. Mir wänn
wyter Fasnacht mache und löhn uns die nid liquidiere.
In deene Momänt ruggt me trotz Empfählig, sich vonenander z
dischtanziere, nöcher zämme. Me hebt sich an jedem Strohhalm und isch
froh über jedes Troschtpfläschterli - notabene kei einzigs vom Comité
und kei einzigs vo de Behörde.
Wie d Schnäädis
die Fasnacht, wos hoffentlig numme eimool git, erlääbe dien, seht me uff
de verschidene Syte vo dr Fasnacht vo däm Joor.
Heb di fescht! Denn ei Highight nach em Andere rast durch d Vorfasnachtszyt.
Letschti Wuche simmer am Charivari gsi und geschter an dr Derniere vom Drummeli.
Beides anders und beides vom Beschte.
Bim Charivari wird s Plätzli gsuecht und s musikalische Finale lang in Erinnerig bliibe und bim Drummeli die kreative Uffdritt vo de Stammclique im zweite Teil: Sygs dr Gendarme vo Basel, s wiiderbeläbte Rootliechtviertel vo de Olymper oder der Lion King vom Dupf Club. Gender hi oder här aber d Männerclique hänn zeigt, ass si bsunders kreativi Köpf in ire Reihe hänn.
S absolute Highlight vo dr Vorfasnacht 2020 isch aber d Schuelfasnacht gsi.
Bi herrlichem Fasnachtswätter hämmer gseh, ass mir uns um d Fasnacht kei Sorge mien mache (aber mir mien sii eehre und pfläöge). Was in de Schuelhüüser in de letschte Wuche uff d Bei gstellt worde isch, ich schlicht und eifach dr Hammer.
Die Art vo Demo (Future Thursday) unterstützi voll und ganz und würds denn au aggzeptiere, wenn s Drämmli nid durch d Innerstadt ka fahre.
E Huffe Bilder zeig d Schuelfasnacht in all ire Fassedde.
(Doo sinn d Bilder vo dr Vorfasnacht)
Es isch daas Joor e Bitz lang gange, bis d Homepage barat isch gsi für d Fasnacht in däm Joor.
Mir sinn aber no gnueg frieh dra - joo, mir hänn sogar e Vorsprung, will sit hüt d Goschdüüm scho fascht fertig sinn.
D Bilder vom Goschdüümnaje kömme erscht spöter uff d Homepage. Mir wänn jo noonig z vyyl vom Sujet verroote.
Trotzdäm hets no Neus zum Aaluege uss em letschte Joor uff dr Homepage: S Tattoo, dr Schnäädergrill, d Schnääderreis und die erschti Schnäädi Stadtwiehnacht sinn im Bild feschtghalte.
Finde duesch die Bilder, wenn du s Archiv linggs im Menu uffmachsch und denn s letschte Joor duesch usswähle.
Vyyl Vergniege bim Bilder aaluege.
Zytumstellig, Sunneschyyn, um die 20 Grad und d Stadt voll Baustelle: Es isch Bummelsunntig!
Nach emene feyne Brunch sinn mir in Rhyfälde ins Schloss und hänn dört au no die siibe Rösser vom Prinz Fäld aadroffe. Mir sinn nämmlig zum Fäldschloss.
Zerschte hämmer die riisigi Brauerey uff enere Fiehrig aagluegt und denn hets bi durschtigem Wätter au none obligati Deguschtazion gäh.
Und denn s Highlight: Bi fantastischem Friehligswätter hämmer noonemol en Oobe lang in dr Stadt könne drummle und pfyffe.
(Doo gits e baar Bilder vo däm tolle Bummelsunntig)
Vyyl z'schnäll sinn die drey schneenschte Dääg verby gange.
Was bliibt sinn d Erinnerige an e tolli Fasnacht, wo au dr Petrus im Grosse und Ganze mitgspiilt het.
Jetzt mien mir wider warte - immerhin kei ganzes Joor.
Für die, wo no in de Fasnachtserinnerige wänn schwelge, isch unseri Homepage jetzt gfüllt mit Foteli vo dr Fasnacht. Am Mittwuch hets sogar e Lingg uff e Filmli.
Zem alli Bilder go studiere, nützt me d Lingglischte rächts uff dr Homepage.
Vyyl Vergniege!
'S ka loos go: Bi mehrheitlich guetem Wätter aber mit vyyl Wind hämmer unseri MUBA-Ladärne yypfyffe.
Nochhärd hets wider e sehr feyns Nachtässe im Cliquekäller gäh.
Dört hämmer denn au no dr Zeedel vom Zeedeldichter vordreit griegt. Dr Zeedel ka me jetzt au uff dr Homepage lääse.
Und denn gits au none baar Bildli vo de letschte Vorbereitige, em Yypfyyffe und em Yysirpfle.
(Doo gohhts zu de Bilder vom Fasnachtssunntig)
D Goschdüüm, d Larve, dr Zeedel und d Ladärne sinn für d Fasnacht barat.
Mir noddürlig au.
Mir hoffe jetzt no, ass sich dr Petrus wider uff sîini Basler Wurzle bsinnt und in dr Wätterkuchi s richtige Wätter gooht go vorbereite.
Zem d Zyt bis zum Morgestraich e Bitz z verkürze gits jetzt uff unserer Homepage vyyl Bilder vo de Schnäädi-Vorbereitige: Sygs dr Vogel Gryff, s Goschdüüm-Naje, s MUBA-Gässle, s Iebe, dr Bsuech am Luzärner Monschtercorso und dr Herrenoobe, wo numme mit enere Ussnahmebewilligung het können duuregfiehrt wärde; für alli die Aalöss gits uff dr Homepage meh oder weniger Bilder.
Also eifach aaluege!
Am beschte kunnt me uff die einzelne Bildersyyte über s Menu rächts ('S WICHTIGSCHTE UFF AI BLIGG)
Drey Dääg alt isch s neue Joor. Alles isch früsch. So au unseri Homepage, wo barat isch für d Fasnacht 2019.
In de näggschte Wuche wärde sicht die verschiidene Syte vo unserer 19er Fasnacht (die 31schti scho!) doo uff dr Homepage mit Bildli fülle.
Daas, wo sunscht no neu isch, seht me grad doo uff dr Inahltssyte: Es git jetzt rächts grad e Lingg uff s aggtuelle und s künftige Wätter in Basel. :-)
S alte Joor archiviere ghört au zu de Schnäädi-Uffgoobe uff dr Schnäädi-Homepage.
Es git neui Bilder vo unserne Aggtiviteete under em Joor 2018. Drzue ghört s Schnäädi-Tattoo, d Schnäädi-Reis uff Malage und d Schnäädi-Waldwiehnacht.
Für alli Nostalgiker gits also none Bitz öbbis z aaluge uff unserer Homepage.
Uff die jewyyligi Syte kunnte me über d Linggs gard doo unde dra oder über der Archivbereich 'Fasnach 2018'.
(Doo goohts zu de Bilder vom Schnäädi-Tattoo 2018)
(Doo goohts zu de Bilder vo dr Schnäädi-Reis 2018)
(Doo goohts zu de Bilder vo dr Schnäädi-Waldwiehnacht 2018)
Scho isch dr Bummel wider zwei Wuche här.
Die letschte baar Schtund Fasnacht hänn für uns in der Dalbe aagfange.
Nach emene feyne Ässe simmer go Papier schöpfe und d Gschicht vom Drugge, wo zu Basel ghört wie d Fasnacht, go schtudiere.
Und denn hets uns in d Innerstadt zooge zum noonemool e Bitz go pfyffe und drummle. Und wie jedes Joor hets au daas Joor in de letschte Schtund herrlig dööhnt.
Zum Zyt bis zum näggschte Morgestraich z verkürze gits doo noone baar Bildli vom Bummel.
72 Schtund het me dr Alldaag könne vergässe: 72 Schtund het d Frau Fasnacht Basel regiert - und daas bi wytem besser als die wo daas s Joor duure usseem Roothuus brobiere.
Und denn hänn sich in däm Joor au dr Petrus mir dr Frau Fasnacht verbündet und uns e zwar kalti Fasnacht aber eini ohne ei Dröpfi Rääge oder enere Schneeflogge gschänggt.
Und eso het denn am Mittwuch sogar unsere Moorekopf no mit der Sunne um d Wett kenne strahle.
Und zum Glügg sinn d Narre au nid stumm bliibe: Mir hänn pfyffe und drummlet anderi gsunge und intrigiert.
S Charivari-Beizli isch bi de kalte Temperature für uns e tolle Pauseträffpunggt gsi. Bleikügeli, Holdrio und Griene Frosch sind jetzt au bi uns bekannt.
Un was sunscht no an deene drey scheenschte Dääg vom Joor alles abgange isch, ka me uff de Bildi gseh. Es het am Mändig und Zyschdig au no vyyl Bildli vo dr Ladärneussstellig. Eso ka me d Ladäärne e Bitz länger als an dr Fasnacht aaluege.
Vyyl Vergniege bim Aaluege vo dr Hompage
Es isch kalt worde - saukalt. ABER: Es räägnet nümm.
Und eso könne mir uns mit warme Pulli uff e schöni Fasnacht yystelle und freue.
S erschte Mool hänn d Pfyffer ihri Händsche könne teschte bim Ladärneyypfyyffe.
Und es ligt bi de Piccolokläng wider öbbis in dr Luft.
Uffeweerme könne hämmer uns nochärd wider bimene feyne Nachtässe im Cliquekäller, wo mir denn au no unsere Fasnachtszeedel vom Dichter voorglääse bikoo hänn.
Und jetzt gohts no für e baar Stund unders warme Duvet. Bis es denn loosgooht.
(Doo gits d Bilder vom Yypfyffe)
Wie im Flug sinn die erschte Wuche vom neue Joor verby gange. 7 Wuche hänn miesse länge zum alles barat mache für dr Momänt, wo no 28 Stund uff sich warte losst.
Was mir alles gmacht hänn, in deene Wuche ka me jetzt uff unserer Homepage go aaluge. Sygs unsere Yysatz am Charivari, dr Bsuech am Drummeli oder in Luzärn am Monschtercorso und unseri Teilnahm an dr Schuelfasnacht: Alles isch uff e baar Bilder feschtghalte.
Am beschte kunnt me zu de Bilder, wenn me rächts uff d Linggs druggt.
Daas Joor isch si bsunders kurz: D Vorfasnachtszyt.
Durum isch dr letscht Böller vom Sylveschter-Füürwärgg au der Startschuss gsi für d Vorfasnachtszyt vo de Schnäädis.
Die baar freye Dääg über d Wiehnacht und dr Jooreswäggsel hänn glängt, zum unseri Homepage für d Fasnacht 2018 vorzbereite. In de näggschte Wuche fülle sich denn die einzelne leere Syte mit Bilder.
S Yyneluege wird sich also loohne.
Und will der Drey Königsdaag noonig verby isch, wünsche mir no allen zämme: E Guets Neuis Joor
Es isch wie jedes Joor dr letschti Clique-Aaloss vo de Schnäädis: D Schnäädi-Waldwiehnacht.
Und au daas Joor hämmer mit unserem Outdoor Event Glügg gha. Gräägnet hets bis am Morge und denn wider Zoobe nach dr SWW (Schnäädi-Waldwiehnacht).
Au für dr Buuch hets wider öbbis gäh in flüssiger und feschter Form.
Für warms Ässe het unsere Füürprofi gsorgt.
Und au s Christkindli isch uns no ko bsueche.
(Doo gits e baar Bilder vo dr SWW)
Es wird wider friener dunggel und die erschte Bäum griege scho gääli Bleeter.
E Zeich, ass dr Summer z Änd gooht und dr Herbscht scho vor dr Düüre stooht.
Und au d Summer-Events vo der Schnäädis sinn verby.
Gly fööhn d Sujet-Sitzige aa und d Iebigsstunde wärde intensiver.
Es längt aber no zum uff dr Summer zrugg z'luege:
Uff d Tattoo-Parade, dr Tattoo-Grill, d Tattoo-Derniere. E Wuche spöter dr Tattoo-Grill. Und Ändi Auguscht denn d Schnäädi-Reis uff Mallorca bi herrligschtem Wätter und emene warme Meer. Und kulinarisch simmer au uff d Rächnig koo.
Vo all deene Aalöss gits jetzt Bilder uff unserer Homepage.
Vyyl Vergniege bim aaluege.
(Doo goohts zum Schnäädi-Summer)
(Doo goohts zur Schnäädi-Reis)
Der erschti Daag mit dr Summerzyt 2017 isch glychzyttig dr letschti vo dr Fasnachtsaison 2017 gsi.
Bi herrligem Wätter hänn d Schnäädis zerscht bim Brunch und spöter uff emene Bildigsussfluus ihre Bummel gnosse.
Nach enere Steergig sinn mir denn s letschte Mool daas Joor pfyffend und drummelnd in d Gasse vo Basel gange.
Und Lüüt hets gha wie .... an dr Fasnacht. :-)
(Doo gits none baar Bummelbildli)
Scho sinns wider e baar Schtund här, sit dr Ändstraich d Fasnacht 2017 beändet het.
Es isch eimool meh e ganz scheeni Fasnacht gsi. Dr Petrus het daas Joor d Fasnächtler wölle teschte, zum Luege wie si reagiere, wenn ärs emol e ganze Daag losst heftig räägne. S Verhalte isch aber eso grandios gsi, ass är de Bebbi am Zyschdig und Mittwuch wider Fasnachtswätter, wies sichs ghört, gschänggt het.
D Schnäädis hänn d Fasnacht wie allewyyl mit emene scheene Morgestraich ääne an dr Brugg im Glaibasel gstartet. D Piggy het zwar in Räägeschutz miesse aber d Amselgass het au mit neuer Belychtig herrlig glychtet.
Am Nommidaag sinn mir denn uff dr verräägnetschi Cortége sit Joore gange. Daas het aber d Stimmig vo de Schnäädis nid können drugge. Und d Drootwaramsle hänn nid emol e Räägeschutz bruucht.
Dr Zyschdig denn - eigentlig nääbenem Morgestraich dr scheenschti Fasnachtsdaag - isch grandios gsi. D Ladärnusstellig isch am Daag und in dr Nacht yydrügglig gsi. Und Wätterkapriole hänn drfür gsorgt, ass no am vieri demorge dr Rümmelplatz uss allne Nööht blatzt isch.
Vyyl z'schnäll isch wider Mittwuch gsi. Jetzt mit emene droggene Cortège und emene tolle Mittwuchzoobe.
Wos im Änd zuegange isch, het au d Frau Fasnacht ihri Trääne nümm könne zrugghalte.
Hüt am Morge am vieri isch e ganz tolli Schnäädi-Fasnacht z Änd gange. Und wär weiss, öb s näggscht Joor am einte oder andere Daag wider e Drottwaramsle vo de Schnäädis unterwäggs sii wird.
Mir freue uns uff jede Fall scho uff die näggschte Fasnacht, wo jo zum Glügg in weeniger als emene Joor wider startet.
(Bis denn ka me alli neue Bildli aaluege:
Die vom Morgestraich
Die vom Mändig
Die vom Zyschdig - au mit de Ladärne
Die vom Mittwuch)
Wie 's sich ghört bi däm Sujet isch en Abstächer bim Yypfyffe in d Toleranzzoone nodürlig e Must.
S Wätter isch in Ornig gsi - daas an dr Fasnacht und mir sinn zfriide.
Nach em Yypfyffe hets e tolls und feyns Nachtässe gäh und am Schluss isch denn au no dr Zeedel vordreiht worde.
(D Bildi vom Daag gits doo.)
(Und au dr Zeedel ka me doo lääse.)
D Ladärne isch montiert und mit Värsli gschmüggt.
Mir sinn also barat für die drey scheenschte Dääg und freue uns riisig druff.
D Schnäädi-Familie isch vereint und isch am Warte.
(Do gits Bilder vom Värslibrinzle.)
S gooht nümm lang!
D Vorfasnachtszyt isch fertig. Und jetzt warte mir numme none baar Stund uff d Fasnacht.
In die letschte Dääg vor dr Fasnacht ghört dr Damen- und Herrenoobe, d Cliquekällermarschiebig, dr Drummeli- und Charivaribsuech und last but not least unsere Bsuech in Luzärn am Moschtercorso.
In dungglere Zyte wärde d Goschdüüm au in Luzärn wider farbiger. Und dr absolut Hammer sinn die drey Gruppe gsi mit em Motto 'Vo Luzärn geege Waggis zue'. E grandiosi Idee und mir freuen uns druff, die Luzärner Gruppe am Cortège z gseh.
Uff allne Vorfasnachtssyte hets jetzt neui Bildi.
Also iineluege und gniesse.
Dr Winter isch zwar spooht koo, het aber in de letschte zwei Wuche au unseri Region wyyss yyzuggeret.
Und eso isch denn s Pfyfferwuchenänd daas Joor zuemene Wuchenänd im Schnee worde. Au e Schnäädi-Schneemaa het durum nid dörfe fähle.
Und as denn am Sunntig der Roger im warme Teil vo dr Ärde wider zuegschlaage het, isch s Düpfli uff em I vo däm glungene Wuchenänd gsi.
Nodürlig sinn mir vo unserer Hüttewartin au wider beschtens verpflägt worde. Niemerds het miesse Hunger liide.
Und au giebt hämmer.
D Fasnacht ka langsam koo.
(Do gits Bilder vom Pfyffer-Wuchenänd.)
Wenn dr Vogel Gryff kunnt und d Nahjmaschine füüre gnoh wärde, merggt mes: D Fasnacht isch nümm eso wyt ewägg. Und s wichtigschte Indiz, ass es nümme esoo lang gooht, sinn nid d Schaufänschter in der Stadt, wo schone Wagges uuseluegt oder d Bricht vo de Vorfasnachtsveraastaltige in dr Zytig sondern ...............
D Schoggioschterhaase in de Lääde!!! :-)
Mir sinn in de Vorberaitige scho wyyt voraakoo:
D Goschdüüm sinn scho fascht fertig. D Larve sinn aabroobiert. Dr Zeedel isch scho gschriibe und druggfertig und au d Ladärne isch am Entstooh.
Mir sinn im Plan und hänn durum gnueg Zyt gha, zum au an gröschte Fyrtig vom Glaibasel amene Frytig dr 13. z gho. No immer isch dr neu Vogel Gryff e Bitzli gwöhnigsbedürftig aber es het alles passt. Und dr Winter het sich an däm Daag im Rahme ghalte.
(Vom Vogel Gryff gits doo e baar Bilder.)
(Und vo unsere Vorbereitige hets doo e baar Föteli, wo no nüt vom Sujet verroote.)
Wie jeedes Joor isch dr Santiglaus am Donnschtig vor dr Wiehnacht zu de Schnäädis an d Waldwiehnacht in dr Hard koo.
Und dört hets denn nääbe de Gschängli au dr tradizionelli Gliehwyy und d Schnitzelbroot Walliser Art gäh.
Eso im Dunggle mit em Füür und em belüüchtete Wiehnachtsbaum kunnt eim in Sinn, ass es gar nümme eso lang gooht bis zem Morgestraich.
Zerscht wünsche mir jetzt aber allne e guete Rutsch ins neue Joor.
(Und doo gits none baar Bildli vo dr 11. SWW)
S Joor gooht em Ändi entgeege. Zyt zum Uffruume.
Und i ha e none baar Bildli vo däm Joor gfunde. Tattoo und Zermatt sinn daas unseri zwei Highlights gsi.
Und doodrzue gits jetzt e baar Bildi.
(Doo goohts zu de Tattoobildli.)
(Und doo goohts zu de Zermattföteli.)
Achtung: Alles wo doo stooht isch KEI Aprilscherz! :-)
I ha no e Bitzli Zyt vor dr Abfahrt und durum bini no am Friehligsputze.
I bi dur d Föteli vom Bummel und laad die jetzt no uffe, denn .... si sinn eifach dr Hammer.
Wenn me meint, Fasnächtler heige numme dr Morgestraich im Kopf bewyyse die Bilder s Geegeteil.
I ha uns grad aagmolde für dr Sports Award 2016 für esthetischi Körperhaltig.
S Bowle isch unseri richtigi Schnäädi-Liideschaft!! :-)
(Doo goohts zum Bewyys)
Kei Räägeschutz, e tolli Stimmig, kei Stau - 3 Dääg Fasnacht puur.
D Schnäädis hänn zämme tolli und schöni Stund an dr Fasnacht erläbt. Daas ka me uff de vyyle neue Bildli vo dr Fasnacht gseh.
Drnääbe gits aber au no Erinnerige an Cortège und an d Ladärneussstellig. Herrlig sinn si gsi: D farbige Kunschtwärgg.
Unsers glaine Ladärnli, wo am Daag White Dinner kompatibel gsi isch und Znacht au farbig glüchtet het, isch vom Kinschtler grad sälber begleitet worde.
Jetzt mien dr Erinnerige für e Joor wider länge. D Fasnachtsbildli hälfe villicht e Bitz.
Ersch am 6. Merz 2017 isch dr näggschti Morgestraich.
Geburtsdaag, Valentinsdaag, Fasnachtssunntig! Was will me meh?
Aagfange hämmer mit em Yypfyyffe vo dr Ladärne bi fascht droggenem Wätter. Nach em Halt im Schärme sinn mir zrugg zem Cliquekäller, wo's wider e feyns Znacht gäh het.
Au dr Zeedel hänn mir no s erschte Mool ghört.
Jetzt wartet die kurzi langi Nacht vor em Morgestraich.
Ab goohts jetzt für drey Dääg in Fasnachtshimmel.
(Doo gits d Bildi vom Daag)
Hüt zmittag hets noonemool boohrt, gschruubt und ghämmeret. Und jetzt simmer barat.
D Ladären isch zoobe mit Värsli verziehrt worde und dr Käller isch für s Yypfyyffe und Yysirpfle barat.
Jetzt göhn mir e letschts Mool richtig Energie go tanke und pfuuse none gueti Rundi.
Für die, wo noonig mied sinn het none baar Bidli vom hütige Daag.
Lang isch es daas Joor gange, bis d Schnäädi-Homepage barat isch für d Fasnacht.
Es het aber no glängt.
Durum hets jetzt au e Schwetti vo Bildli vo dr Fasnachtsvorberaitige uff unserer Syte.
Öb Pfyfferwuchenänd und Larveaabroob, Goschdüümnaje und Requisit baschtle und vom DTK aber au von ere spezielle Marschiebig und vo Luzärn ... vo all däm hets jetzt Bildli.
Vyyl Vergniege.
Scho stööhn d Wiehnachtsbäum in dr Stadt und d Wiehnachtsbelüüchtig isch au scho uffghängt. Wiehnachtsguzzi gits scho guet zwei Mönet in dr Migros. Und i wart scho uff dr erscchti Schoggi-Oschterhaas.
No wartet d Waldwiehnacht uff is. Aber nochhärd goohts den rassant uff die ganz kurzi Vorfasnachtszyt zue.
Es isch Zyt zum s Schnäädi-Joor Revue passiere z looh.
S Tattoo und dr Schnäädi-Gill sinn daas Joor im glaine Rahme abghalte worde.
Drnääbe sinn mir no in Epesses gsi.
S absolute Highlight isch e grandiosi Schnäädi-Reis uff Sitges und Barcelona gsi. Grandioses Wätter, e tolle Strand und kulinarischi Höhepünggt mache die Reis unvergässlig.
Und zu all deene Aalöss het jetzt Bildli uff dr Homepage.
Keini Lämpe? Durum hämmer jo zu däm Thema kei Sitzig sondern e Fasnachtsanalyse. Un daas Joor het die amene bsundere Ort stattgfunde: Emene für d Schnäädis heimelige Ort: Uff dr Fähri.
Bimene feyne Fondue hämmer die näggschte Termin veryybaart. So wirds Warte uff die näggschti Fasnacht nicht ganz eso soooooo lang.
Es stooht einiges uff em Programm und dr Höhepunggt isch denn dr 16. Februar 2016: Dr näggscht Morgestraich.
Zerscht aber warte no Eppesses, s Tattoo, Barcelona, dr Schnääderfraas und die 10.!! SWW.
(Doo hets e baar Bildli vo dr Fasnachtsanalyse uff em Basler Krüüzfahrtschiff)
Dr letschti Aggt vo dr Fasnachtszyt 2015 isch unsere Bummel gsi am letschte Sunntig.
Alles het gstumme: S Programm, s Ässe, s grandiose Fähri-Wätter und d Stimmig. Und sogar im Mister Wong hänn si für uns noonemol d Kuchi uffgmacht.
Uff de Bilder läbt dr Bummel noonemool uff, wo e fantastischi Fasnacht 2015 abgschlosse het.
(Doo hets e baar Bummelbildli)
Wie im Flug sinn sii verby gange: Die 72 Stund Fasnacht.
Gstartet hänn si mit emene grossartige und droggene Morgestraich. Erscht, wo s häll worde isch, hets leider e Bitz aafoo räägne.
Am Nommidaag hets denn uff em Cortège gly mit de Wasserspiil uffghört.
Vo denn isch es mit em Wätter uffwärtsgange. Und d Fasnacht isch aimool mehr gradios worde.
Dr Zyschdig mit de Kinder, dr Ladärneussstellig und de Gugge - bsunders de Poca Hontas Schränzer - isch e Highlight gsi.
Und am Mitwuch simmer denn no vo dr Sunne verwöhnt worde.
Alles isch eso guet gsi, ass es ebbe wider vyyl z schnäll verby gsi isch.
Und jetzt foohts Warte wider aa.
Zum Erinnere und zum Warte isch d Homepage jetzt gfüllt mit vyylne Bildli vo dr Fasnacht 2015.
(Doo sinn die vom Morgestraich)
(Doo sinn die vom Fasnachtsmändig)
(Doo sinn die vom Fasnachtszyschdig)
(Doo sinn die vom Fasnachtsmittwuch)
Es gooht nümm lang!
S ligt aifach ebbis in dr Luft. Au wenn d Sunne hüt nid durch d Wolgge duuregluegt het, hört me d Piccolotön vom Ladärneyypfyffe au im Fasnachtshimmel.
Au die glai Schnäädiladäärne het hüt s erschte Mool Fasnachtsluft gschnupperet.
Nochhärd hänn mir uns e letschts Mool vor em Morgestraich im Cliquekäller richtig gsterggt bimene feyne Nachtässe.
Und was uff em Zeedel stooht wüsse mir jetzt au. Und jetzt warte mir none baar weenigi Stund.
(Doo goohts zu de Bilder vom Ladärneyypfyffe und -yysirpfle)
(Und doo ka me dr Zeedel go lääse)
Und jetzt isch au d Ladärne barat.
Hüt zoobe het si no dr letscht Pinselstrich mit de Ladärnevärsli griegt.
Und fürs Kopfweh an dr Fasnacht hänn mir e neus homeopathischs Medikamänt entwigglet:
DRAMAHNSCHMI :-))
Nääbe de Föteli ka me dr Oobe abschliesse mit de Stiggli vo dr Vorfasnacht im Tele Basel.
(Doo isch dr Wääg zu de Ladärnevärslibrinzli-Foteli)
Goschdym najhe, Iebigswunchenänd, Vogel Gryff, Programmverkauf am Charivari, Kinderfasnacht, Drummeli, Marschiebig und e Bsuech an dr Luzärner Fasnacht...
All daas ghört zu de Fasnachtsvorbereitige vo de Schnäädis.
Und jetzt am Samschtig vor dr Fasnacht sinn alli die Vorbereitige abgschlosse.
Uff verschiidene Syte vo unserer Homepage gits e Tour d' Horizon durch alli unseri gmeinsame Erläbnis.
Also: Ab gooht's zu de Bilder. Und bim Aaluege vergooht au d Zyt bis an Morgestraich none Bitz schnäller.
No stooht dr Wiehnachtsbaum und no lüchtet d Wiehnachtsbelüchtig in der Stadt.
Aber sit hüt fooht d Frau Fasnacht ihri Wiehnacht im Februar 2015 aa vorbereite: D Blagette mit Sujet isch dusse und gly wärde d Nahjmaschine grüschtet und d Piccolo göölt.
Und will im 2015 alles Schlag uff Schlag goht, isch au unseri Homepage scho für d Fasnacht 2015 vorbereitet.
In de näggschte Wuche wärde die no leere Syte sich mit Bilder vo unsere Vorbereitige fülle und an der Fasnacht denn gseht me uns im Bild bi unserne Fasnachtsaggtiviteete.
Euch wünsche mir vyyl Spass bim Luege und zerscht emol 'e guete Rutsch ins Neue Joor'.
Vyyli ruume in dr Altjoorwuche ire Bürotisch, archiviere d Unterlaage vom Joor 2014 und bereite sich fürs neue Joor vor.
Mir nütze die Wuche au, zum s Schnäädijoor 2014 abzschliesse. No stöhn vyyl Bildlil uss vo unserne Aggtiviteete nach em Bummel bis zum Ändi vom Joor 2014, wo wider in dr Hard gändet het bi dr Waldwiehnacht (daas Mool sogar ohni Rääge).
Alli Bilddokumänt sinnn jetzt uff dr Homepage abglegt und sölle einersyts d Erinnerige ans bald vergangene 2014 ufffrüsche und anderersyts d Vorfreud uff daas, wo im 2015 uff uns warte wird, e Bitz steigere.
(Doo gits none baar Bilder vo dr 9. Schnäädi-Waldwiehnacht.)
(Doo gits none baar Bilder durch s Schnäädijoor 2014.)
(Doo gits none baar Bilder vo dr Schnääderreis 2014.)
(Doo gits none baar Bilder vom Schnäädergrill 2014.)
(Doo gits none baar Bilder vom Schnäädertattoogril 2014.)
Und au daas isch scho wider e Wuche här: Dr Schnäädi-Bummel 2014. Är isch dr würdig Abschluss gsi vonere grandioose Fasnacht, wonis dr Petrus mit siim Wätter schlicht und eifach sensazionell verwöhnt het. Alli Fasnachtsdääg und dr Bummel bi herrligschtem Sunneschyyn - wär mag sich an e soone Fasnacht erinnere?
Mir saage 'Danggscheen' und hänn denn zoobe in dr Stadt mit Versteergig noonemol unsers Beschte gäh als neudiplomierti Kaffi-Expärtinne und -Expärte.
(Doo gits none baar Bilder vo däm Summernbummel.)
Dr Draum isch verby!
Sit am viere am Morge sinn die scheenschte Dääg verby.
Und daas sinn si im wohrschte Sinn vom Wort gsi.
Schöns Wätter, e gueti Stimmig in dr Clique und in dr Stadt. Was wott me meh?
Jetzt also warte mir wider: Zum Glügg nid emol e ganzes Joor!
Bis denn schwelge mir in de Erinnnerige unterstützt zum Byspiil mit de Bildli vom Fasnachtsmittwuch.
(Doo sinn si au wider uff zwei Syte.)
Brandaggtuell d Bilder vom Zyschdig.
(Doo sinn si uff zwei Syte.)
Wie s aagfange goohts wyter:
Sunne puur und e tolli Stimmig bi de Schnäädis uff em Mändigs-Cortège. Besser goohts wirgglig nümme!
Zoobe denn hämmer en erschte Bligg uff d Fasnachtsladärne könne wärfe. Und daas no fascht ohni Lüüt. Am Zyschdig wirdsch den mehr Köpf als Ladärbe gseh.
(Doo sinn d Mändigs-Bilder uff zwei Syte - ganz bsunders für die, wo anstatt Fasnacht dörfe mache in Züri mien schaffe.)
I find kei anders Wort als eifach numme: SENSAZIONELL!!!
Dää Morgestraich mit de 6 glaine Schnäädis isch eifach dr Hammer gsi!
(Bilder aaluege und noonemol gniesse!)
Dr Fasnachtshimmel het uffgmacht und alli uss däm Himmel luege jetzt drey Dääg uff d Stadt am Rhy.
Und dört am Rhybord hets hüt zmittag bim Yypfyffe ussgseh wie sunscht numme im Hochsummer. Eso vyyl Lüüt hets nonie amene Yypfyffe gha.
E Friehligsdaag uss em Bilderbuech het die 6 Glaine Schnäädis uff ihrem Yypfyff-Pacours begleitet.
Nach em Yypfyffe het uns d Sabine und d Arlette kulinarisch verwöhnt.
Jetzt göhn mir go schloofe. Daas wird e langi Fasnacht gäh. Jedi Minute im Bett isch an deere Fasnacht ei Minute zweenig dusse an dr Joohrhundert-Wätter-Fasnacht.
(Doo gits d Bilder vom Yypfyffe und Yysirpfle)
Im Färnseh nääbedra lauft dr Querschnitt durch d Vorfasnachtsveraastaltige. Au d Schnäädis hänn ihre Vorfasnachtsquerschnitt.
Jetzt ka me si aaluege: Vyyli Bilder vom Goschdyymnaie, vo de Marschiebige, vo unserne Vorfasnachtsbsuech, vo unserem Uffdritt an dr Kindergartefasnacht und als Highlight d Bilder vo unserem Charivari-Programm-Verkauf.
Alli die Bilder gits uff dr Homepage.
Dr miend e Bitz surfe. D Links uff d Syte gits linggs oder rächts doo uff dr Hauptsyte.
Vyyl Spass bim Luege und bim Warte uff dr Morgestraich.
Au uff unseri glaini Ladärne sinn mir Schnäädis stolz.
Und au uff die ghöre nodürlig Värsli.
Am Samschtig vor dr Fasnacht wärde die brinzlet und denn uff d Ladärne gschriibe.
Und mir freue uns jetzt riisig uff e grandiosi Schnäädi-Fasnacht mit tolle Wätterusssichte.
(Doo sinn d Bilder vom Värslibrinzle)
Jetzt gits in Basel sogar e Gsetz für daas, wo bi de Schnäädis scho lang umgsetzt isch: Am Frytig vor dr Fasnacht fyre mir dr Quoteoobe!
Aber schon e baar Schtund spöter sinn d Schnäädis widervereinigt.
(Doo sinn e baar Bilder vo däm Oobe)
Daas Joor hets dr Petrus mit de Luzärner nid eso guet gmeint. Fascht die ganzi Fasnacht sinn d Fasnachts-Träne uff d Gugge-Fasnacht in Luzärn dropft. Au am Monschter-Corso-Oobe hets zum Teil rächt gschüttet. Aber mir hänn de Bluetsverwandte uss dr Innerschwyz wider unseri Referänz erwiise und unser Fasnachtsbluet schon e Bitzli uffgweermt.
(Doo sinn d Bilder uss Luzärn)
Ändlig sinn d Bildli vo unserem Iebigswuchenänd au doo.
Es het gfäggt: Eso vyyl giebt wie no nie hämmer und nochhärd hänn mir uns denn kulinarisch verwöhne looh.
D Kalorie hänn mir bim YMCA wider ussegschwitzt und bi dr Vorstellig, wie warms in Afrika muess si. Daktari spiilt jo dörte.
Zum Lache bruuche mir zwar kei Hilf aber dr Dick & Doof hänn no richtig yygheizt zum Lache.
(Doo sinn d Bildli vom Iebigswuchenänd)
Mit e Bitzli Verspöhtig kömme si ändlig: D Bilder vom Vogel Gryff.
Mit em Pfyffe und Drummle schmeggts an däm Daag en erschts Mool in däm Joor in dr Stadt e Bitz nach Fasnacht.
Au daas Joor het dr Vogel Gryff wider rächts Wätterglügg gha. Numme am Nommidaag hets e Momänt grägnet. Sunscht isch es drogge gsi.
Was d Schnäädis am Vogel Gryff gseh und erläbt hänn, gseht me uff unsere Bildli.
(Doo sinn d Vogel Gryff Bildli)
E Guets Neus Joor wünsche mir allne Schnäädis und de Schnäädi-Supporter!
D Blagette isch bekannt und nach em letschtjäährige gedrängte Vorfasnachtsprogramm, goohts daas Joor no 66 Dääg bis zem Morgestraich. Also no gaaaaaanz lang.
Zyt gnueg, um uns uff die Drey Scheenschte Dääg vorzbereite.
D Homepage isch barat für d Vor- und d Fasnacht 2014, wo für d Schnäädis e spezielli wird wärde.
Uff dr Homepage ka me in de näggschte Wuche luege, wie mir uns uff d Fasnacht vorbereite, wie mir uns in dr Vorfasnacht engagiere und wie mir denn d Fasnacht erlääbe.
E Bligg uff d Homepage lohnt sich also immer wider emol.
Und scho zum zweite Mool in Folg sinn d Schleuse vom Himmel an der Schnäädi-Waldwiehnacht offe gsi - und daas notabene nach genau drey Wuche herrligschtem Spoohtherbschtwätter.
Numme: S Wätter ka uns an dr Fasnacht nid verdrybe und nodürlig au nid uss dr Hard, wenns Christkindli kunnt.
Daas Joor het är sich nid nur per SMS gmoolde sondern isch wohrhaftig und musiggkalisch in d Hard koo. Es git en also doch: Dr Santiglaus uss em Schwarzwald.
Und ganz ehrligg: Es isch nid numme e Gliehwyy-Fatamorgana gsi.
(Doo gits e baar Bilder vom letschte Aalooss vo jedem Schnäädi-Joor.)
Dr Schnääderfraass isch in unserem Ehrekodex scho vor 25 Joor erwähnt worde uns isch dr Cliquegeburtsdaag vo de Schnääderfräässige.
Und daas Joor isch es e ganz bsundere gsi:
Dr 25. Geburtsdaag isch inere würdige Umgääbig bi herrligem Ässe und Dringge gfyyrt worde.
Nääben em Ässe und Dringge hets none baar anderi Highlights gäh:
'S Gääle vom Ai' het is mit emene fantastische Ständeli überrascht. Und spöhter am Oobe hänn mir 25 Joor Cliquegschicht multimedial erläbt.
Dr absoluti Höhepunggt isch aber dr Bsuech vo dr Nicole und em Adrian vom Fasnachts-Comité gsi. Mit enere Urkunde sinn mir für 25 Schnäädi-Fasnachte gehrt worde und denn hets no öbbis ganz bsunders drzue gäh ... öbbis aimooligs!
(Daas Aimoolige ka me mit andere Bilder vom Oobe doo gseh.)
Scho isch es wider e Wuche här.
D Schnääderreis in däm Joor het is zu kulinarische und kulturelle Hightlights in Norde vo Dütschland brocht.
Die drey Dääg in Hamburg hämmer voll gnützt und sinn am Sunntig Zoobe todmied und mit emene Ruggsagg voll ganz verschiidene Yydrügg heime ko.
Sigs dr Haafe, d Reeperbahn, die Grossi Freyheit, d Ritze, dr Erwin, d Modällyysebahn, dr Labskaus, dr Michel, d Franzen, dr Fischmärt: Alles hämmer gseh und daas erscht no - eimool mehr in däm Joor - bi beschte Wätterbedingige.
(Doo gits zur Erinnerig uff vier Syte Hamburger Bildli vo de Schnäädis. Au daas vo dr Olivia!)
Dusse isch Mässbetrieb und dr Migros verkauft scho Wiehnachtsguzzi. Höggschti Zyt also zum dr Schnäädi-Summer Revue passiere z loo.
Und obwohl är gar nid eso aagfange het, isch daas e Hammer-Summer gsi: Vom 1. Juli bis Mitti Auguscht fascht kei Räägedropfe, e Weermi wie in Süditalie und am und im Rhy e Stimmig wie in Rimini.
Beschti Bedingige für s Basel Tattoo und dr 1. Auguscht. Und doo sinn nodürlig au d Schnäädis wider aggtiv gsi:
(D Bildli vom Schnääder-Tattoo gits doo und
d Bildli vom Schnääder-Grill sinn doo.)
Ei Joor vor em Morgestraich 2014 hänn d Schnäädis d Jubileeums-Fasnacht mit em Bummel abgschlosse. Emene super Bummel - ebbe emene Jubileeums-Bummel!
Und au s Wätter het mitgspiilt!
Was ligt nöcher, als bi unserem Sujet dr Wääg an Flughafe in Klote z sueche.
Bimene fantastische Bligg uff d Startpischte hets zerscht en Apéro und denn, wo d Überseeflieger gstartet sinn, s Mittagässe gäh. Jede vo uns het brobiert, dr bescht Schnappschuss mit siim Handy z mache.
Am Nommidaag hänn mir denn e tolli Fiehrig durch dr Flughaafe könne mache - dangg enere grosszügige Spänd vom eim vo unserne Passive!! Merci vyylmool!!!! Mir hätte sunscht au verpasst s Zueluege, wiene A340 uss Tokio am Gate duet aadocke! Und mir sinn 10 Metter drnääbe gstande. En eimooligs Erlääbnis!
Zoobe denn hänn mir no die letschte Schtund vo dr Fasnacht 2013 bim Gässle in Basel gnosse!
E herrligi Jubileeums-Fasnacht isch vyyl z schnäll verby gange! Und jetzt warte mir 365 Dääg uff dr näggscht Morgestraich!
(Doo sinn d Bilder vom Bummel und von Gin deguschtiere)
Mit de Fotene vom Marcel runde mir unseri Fasnachts- und Vorfasnachts-Berichterstattig ab.
Über 150 neue Foteli verteilt über alle Sytene vo unserer Fasnachts-Homape zeige d Schnäädis vor allem vo vorne.
Dangg em Marcel könne mir jetzt au dr Zug vo de Schnäädis am Zyschidig und Mittwuch als Bildli gseh.
Nach 72 Stund Fasnachtsherrligkeit isch dr Schnäädi-Air Dreamliner zrugg in dr Alldaags-Wält.
Vorhärd hämmer aber noonemol e schöne Fasnachtsmittwuch erläbt.
Und dr Urbasler Petrus het zwar d Heizig an deere Fasnacht nie richtig zum Laufe griegt uns aber au am Mittwuch e guete Daag ohni Rääge bscheert.
Jetzt bliibe nur no d Erinnerige. Und doodrfür gits au d Homepage und die vyyle Bildli.
(Doo sinn d Bilder vom Mittwuch)
Zwar bini mit dr Brichterstattig völlig hinder dri gsi.
Aber jetzt gits d Bilder vomene herrlige Fasnachtszyschdig. Zerscht sinn die Kleinschte d Stars gsi, spöter denn d Guggene und d Ladärne.
Und mir hänn uss unserem Dreamliner e tolli Usssicht gha uff dr ganz gross Fasnachtsdaag.
(Doo sinn d Bilder vom Zyschig uff zwei Syte)
Bi Prachtswätter sinn mir am Mändig uff dr Cortège.
Herrlig!
Leider het is s Comité s Jubileeum nid eso ganz möge gunne und hets gschafft uns an drey Comité kei Blagette z gäh!
Daas duet dr Stimmig kei Abbruch.
Und zoobe isch d Ladärne an ihre Prachts-Uffenthaltsort, wo si jetzt bis am Mittwuch Demorge stooht.
(Doo sinn d Bilder vom Mändig uff zwei Syte)
Dr Schnäädi-Air Dreamliner isch bi Prachtswätter zu siim Jungfereflug abghoobe. Drby hänn duusigi Lüüt zuegluegt und er Monaschter-Feschtorcheschter het am vier am Morge gmeinsam dr Start musikalisch begleitet.
(Doo sinn d Bilder)
Dr Schnäädi-Air Dreamliner stooht barat für die schönschti Reis vom Joor.
S Inscheniöör-Team het problemloos dr Flieger uss em Hangar gno und zunere letschte Teschrundi unterstützt vo Piccolokläng dr Wääg durs Glaibasel gmacht.
Nochhärd hets in dr Schnäädi-Air Business Lounge e fantastischs Dinner gäh.
Jetzt sinn mir barat zum abheebe und dien durum none baar weenigi Momänt warte.
(Zum die letschte Minute könne warte, gits doo d Bilder vom Daag)
Gly goohts loos!
Es isch e Wuche voll Höhepünggt gsi: Luzärner Monschtercorso, Ladärne laggiere, letschti Marschiebig, Damen- und Herrenoobe und Värslibrinzle.
Vo all deene Aalöss und vo unserne Fasnachtsvorbereitige gits jetzt vyyl neue Bilder (über 260).
Die letschte Schtund vor em Morgestraich könnet dir euch also verbygooloo, wenn ihr rächts eifach die jewiilige Syte dient aakligge!
Viel Spass ... und eigentlig sinn die Bilder jo scho Erinnerig an daas, wo no kunnt!
Scho isch es wider e Zytli här, wos in Basel amene herrlige Samschtig mit stahlblauem Himmel kurz nach em halbi elfi aafoo donnere het. Nai, kei Gwitter! Dr Lai isch dr Bach aabe koo und isch bim Glaine Klingedaal vom Wilde Maa und em Vogel Gryff (und em Guy Morin - dää ghört aber noonig zum Spiil) in Empfang gnoo worde.
E herrlig schöne Vogel Gryff het dört gstartet und erscht zoobe, wos winterlig kalt worde isch, uffghört.
Mir sinn drby gsi und wohl s letschte Mool im Schalander.
(Doo gits d Bilder uff zwei Syte.)
Schlaag uf Schlaag goohts daas Joor, will d Fasnach eso frieh isch. Scho hämmer gnait, d Larve aabrobiert und am letschte Wuchenänd sinn mir wider uff Himmelried go iebe.
Es isch e super Wuchenänd gsi: Au wenn s Iebe dr Hauptteil vom Wuchenänd ussgmacht het, hänn mir schnäädi-like jede Minute usskoschtet. Unter anderem mit emene fantastische kulinarische 4-Gänger vo dr ***-Chefköchin Sabine, emene Kinoobe mit dr Merinda und vyyl Gsang! :-)
D Bildli uff zwei Syte erinnere ans Pfyfferwuchenänd 2013.
(Doo starte d Bildli und uff dr zweite Syte göhn si denn wyter.)
No ei Daag und denn isch daas Joor au wider Vergangeheit. Was denn uff is wartet, isch s Jubileeumsjoor vo de Schnäädis! Wär hät daas dänggt, ass mir daas runde Jubileeum erlääbe.
Und mir wärde d Jubileeums-Fasnacht bsunders gniesse und au daas was unter em Joor no alles aastooht.
D Homepage uff jeede Fall isch fürs Jubileeumsjoor scho fascht barat!
Denn wünschi allne Schnäädis und de Schnäädi-Fans e guete Rutsch ins 2013!
10 Dääg isch es här sit em letschte Schnäädi-Aaloss im 2012: Dr Schnäädi-Waldwiehnacht in dr Hard. Und zum erschte Mool hets die ganzi Waldwiehnacht verrägnet. Dr Schnäädi-Santa und dr Schnäädi-Rudolph hänn aber e droggeni Waldwiehnacht unter de Zält aanezauberet. Und d Räägedropfe rund um d Zält hänn dr Stimmmig in keinere Art und Wyys gschaadet.
E tolle Jooresussklang isch es gsi!
(Doo goohts zu de Bilder vo dr Schnäädi-Waldwiehnacht 2012)
Es isch schon e baar Wuche här aber nodürlig no presänt in unserne Erinnerige: Dr Schnääderfraass 2012. Dr Marcel het uns ins Joggeli gfiehrt: Zerscht hets - schnäädilike - en Apéro gäh und denn e Fiehrig durch die Heilige Halle vom FCB. Mir hännis wie dr Frey oder Streller gfühlt, wo mir durch d Sänfduube ins Stadion yygloffe sinn.
Nochhärd hets denn vyyl zum Ässe gäh und für die, wo gaanz vyyl Hunger gha hänn, zerscht vyyl Gaable und spöter none grosses Vermicelles.
(Doo goohts zu de Bilder vom Schnääderfraass 2012)
Me merggts: Dr metreologischi Herbsch het aagfange!
Höggschti Zyyt zum dr Schnäädi-Summer 2012 Revue passiere z loo!
Und dr Schnäädi-Summer het denn aagfange. wo dr Petrus doch no en Yyseeh gha het und d Summersunne zuenis gschiggt het.
Durum hänn mir vyyl Wätterglügg gha bi allne unsere Aggtiviteete. D Föteli zum Schnäädi-Tattoo-Grill, zum Schnääder-Grill und zu unserer Schnääderreis zeiges!
Also luege
Genau vor ere Wuche hänn mir d Top Secret an dr Derniere vom Military Tattoo in Edinburgh gseh!
E grossi Schnäädi-Delegazion isch uff Edinburgh greist und het bi vyyl besserem Wätter als erwartet e tolls langs Wuchenänd, wo au s Kulinarische nid z kurz koo isch, gnosse.
Au en Ussfluug in d Highlands hets gäh.
Bim Aaluege vo de Bildli wärde sicher wider d Erinnerige aagreggt, bi deene, wo drby gsi sinn!
(Doo goohts zu de Bilder vo dr Schnääderreis 2012)
Vor emene Monet und eim Daag hänn mir uns bi herrligem Summerwätter zum tradizionelle Schnääder-Grill am Daag vor em 1. August droffe.
Leider hänn vyyl Passivi miesse absaage. Aber trotzdäm hänn mir e super Nommidaag im Baad, bim Apéro, bim Ässe und zum Schluss zoobe am Füürwärgg erläbt.
(Doo goohts zu de Bilder vom Schnääder-Grill)
Verwöhnt vom Wätter isch s Basel Tattoo daas Joor nid gsi. Aber mir hänn an dr Derniere ein vo de schööne aber e Bitz kiehle Ööbe verwütscht!
Zerscht hets aber no d Tattoo-Parade gäh und denn dr scho tradizionelli Schnäädi-Tattoo-Grill.
Bim Aaluege vo de Bildli ghöri grad wider vo Wytem d Duudelsegg uss dr Kasärne-Arena.
(Doo goohts zu de Bilder vom Schnäädi-Tattoo)
Dr Marcel het none baar tolli Foteli gliiferet, wo uff fascht allne Syte mit Fasnachtsbildli no en anderi Perschpeggtive zeige! Merci vyylmool!!
Immerhin hets eso noonemol 150 neui Bildli.
Die, wo also vo dr Fasnacht und de Schnäädis noonig gnueg hänn, wärde none baar neui Bilder finde.
Die, wo grad e Diät mache, sötte nid eso genau luege, denn dangg em Mercel isch ja jeedes Ässe vereewigt! :-)
Also: Eifach luege!
.JPG)
Genau 11 Mönet nach em letschte Bummelsunntig wird wider Morgestraich sii. Und denn e ganz bsundere: Dr fümfezwanzigschti vo de Schnäädis.
Bis denn goohts aber none Momänt.
E guete Grund also zum die verräägnete Bilder vom Bummselsunntig aazluege. Aber alli Schnäädis sinn dr gylche Meinig gsi: Lieber drey Daag Sunne an dr Fasnacht - wie in däm Joor - und drfür e nid ganz droggene Bummelsunntig. Ass mir glych e guete Bummel gha hänn imene Wykäller, im Adler in Schliegen und zoobe in dr Stadt, gseht me uff de Bilder.
Und denn wird au no s Rätsel uffglööst, was dr FCB und d Fasnacht gmeinsam hänn.
Die näggschte Bilder gits im Summer.
(Doo goohts zu de Bilder vom Bummel)
Es isch e ganz bsundere Mittwuch gsi: Ein vo de schönschte Friehligs-Fasnachtsmittwuch vo de letschte Joor. E Schaltdaag! Und - leider - dr letschti Daag vo dr Fasnacht vo däm Joor ... und villicht für immer, wenn's nach de Maya gooht.
D Seibi hännis zeigt, wie d Wält wird untergoo und dr Nääbel spöter het daas Schauspiil none mol widerholt. Und ganz ehrlig: Es git Schlimmers als bi Fasnachtsmusigg und Ändstraichstimmig unterzgooh.
Zu all dämm gist noonemol e baar Schnäädi-Bilder!
Adiee Fasnacht! Merci Petrus! Es isch eifach wunderbar gsi!!
(Doo goohts zu de Bilder vom Mittwuch (2 Syte))
Uff dr letscht Drugger. D Zyschdigs-Bilder
(Doo goohts zu de Bilder vom Zyschdig (2 Syte))
Mir sinn am Mändig uff em Cortége abhoobe - und daas ohni Drooge! S Gfühl vo schwääbe, hänn d Köch uss em Fasnachtshimmel gförderet. Der Petrus und d Frau Fasnacht zeige - wie d Schnäädis - was ussekunnt, wenn e Team zu Höggschtleischtige ufftrunpft!
Eifach numme als sensazionell ka me das Fasnachtswätter bezeichne. Und dr Strand vo Rimini isch e Drägg geege d Wettsteibrugg amene soone Mändig. Dört häts nämmlig nid emool me Platz gha für e Sunneschirm. Und ass si wirdgligg hebt, het si bi deene Menschemasse au bewiise.
Und d Schnäädis sinn eso probleemloos abghoobe. Me gsehts im Bild.
Und will bine soo Wätter dängg am Zyschidig e riisigi Druggete an dr Ladäärneussstellig wird herrsche, gits au vo dört scho erschti Bilde.
(Doo goohts zu de Bilder vom Mändig (2 Syte))
Nid numme d Schnäädis sinn abghoobe! Die ganzi Stadt schwäbt im Fasnachtshimmel.
Kei Wunder bi däm sensazionelle Wätter! Am vieri isch s Liecht pünggtlig abgange und sit denn ruessts und pfyffts uss allne Gasse in Basel.
E soone schöne Morgestraich hämmer scho lang nümm erläbt und eimool dörf me allne Gschäft in dr Stadt e Kränzli winde: Fascht alli Fänschter sinn dunggel gsi und s einzige, wo nääbe de Ladärne glüüchtet het, sinn d Stärne am wolggeloose Himmel gsi.
Ass mir dr Morgestraich uss tiefschte Züüg gnosse hänn, gseht me uff dr Homepage.
(Doo goohts zu de Bilder vom Morgestraich (2 Syte))
Jetzt goohts loos! Die herrligschte drey Dääg vom Joor stöhn vor dr Türe. Es gribblet im Buuch! In 6 Stund wirds dunggel.
Am Sunntig drvor hänn mir dr Ladärne yypfyyffe und den tradizionell dr Oobe vor dr Fasnacht kulinarisch im Cliquekäller gnosse!
Dr Zeedel hämmer ebeso s erschte Mool ghört wie au unseri Goschdüümutensilie bewunderet. Dr Zeedel ka me jetzt au uff dr Homepage lääse.
Jetzt goohts denn no kurz ins Bett.
Und denn heissts äääändlig: Morgestraich, vorwärts, marsch!
(Doo goohts zu de Bilder vom Yypfyyffe (uff 2 Syte))
Dr letschti Samschtig vor dr Fasnacht stooht bereits im
Zeiche vo dr Ladärne!
Zerscht hämme am Nommidaag dr Ladäärnewaage wider
uff Vordermaa brocht. Nochhärd sinn Batterie und none
Bitz Verpfläägig ins Stadtzentrum transportiert worde.
Und denn isch es koo: E wyters Vorfasnachts-Highlight!
Mit em Ässe im Klingeli het dr Värslibrinzle-Oobe aa-
gfange. Wie me um d Vermicelles kämpft, het gseht me
ebeso uff de Bilder und au wie d Värsli uff d Ladärne koo
isch.
Und jetzt none gueti Noochricht! Sit hüt zoone gits keini
Krüzlibilder meh!
Alli Bildli könne e Bitz meh als e Daag vor em Morgestraich aagluegt wärde!
(Doo goohts zu de Bilder vom Värslibrinzle.)
Joo, me ka sich vor dr Fasnacht au no wyterbilde!
Daas hänn daas Joor vor allem d Herre vo de Schnäädis am Herrenoobe gmacht: Imene mehrstündige Vordraag
hämmer erfahre, uff was me alles muess luege, wenn
me Kostüm möcht mache, wie die am Carneval in Rio!
Und will imene Joor d Fasnacht ganz frieh isch, vertraue
mir uff warms Wätter vom Petrus.
Nääbe Wyterbildig stooht dää Oobe au im Zeiche vo dr
Kulinarik!
Und d Herre hänn no uff d Linie gluegt: Numme dünni Pommes Alumettes und Fitnesställer hets gäh.
Und denn sinn mir heime gange!
(Doo goohts zu de Bilder.)
Die Wuche vor dr Fasnacht hets jo scho sunscht in sich.
Daas Joor wird die aber none bitz exklusiver als sunscht.
Am Äschemittwuch isch dr FCB no - sozusaage als
Amuse Bouche für die drey scheenschte Dääg - im Jog-
geli in Ring gstiige. Die erschti 1/8 Final Campions League Teilnahm vom FCB isch zumene sensazionelle,
grandioose, unvergässlige, unglaublige ..... Oobe worde!
Dr glai FCB het dr grossi FCB - dää in de Lääderhoose - mit emene 1:0 heime nach Münsche gschiggt. Und d
FCB- und d Fasnachts-Gniesser sinn schone halbi Wuche
vor em Morgestraich im Himmel!
Und dr Daag druff sinn mir denn no (scho) zur letschte
Marschiebig vo däm Joor uffbroche.
(Doo goohts zu de Bilder.)
Wie jeedes Joor sinn e baar Schnäädis au daas Joor bi
schönschtem Wätter an Monschter Corso in Luzärn go
luege. Und mir hänn ghofft - was me jo sunscht nie hofft - as mir vom Virus aagsteggt wärde: Vom Fasnachts-virus!
Und d Infektion het klappt!
Mir sinn barat und könne doo none baar Bildli vo Luzärn
am letschte Fasnachtsoobe vo däm Joor aaluege. Es het sogar zwei Syte Bilder.
(Doo goohts zu de Bilder.)
Nei, dr PC isch nid kapputt!!
Wenn duu uff diinere Homepage statt e Bildli bin e
paarne numme e Krützli (wie doo nääbe draa) gsehsch,
ligt daas mit gröschter Wohrschiinligkeit nid an diim
Computer!
Obwohl dr Rädäbäng kurz nach dr Wiehnacht ussekunnt
und är s Sujet scho vor uns kennt, gits doch none e paar
weenigi Bildli, wo z vyyl vo unserem Sujet zeige.
Durum sinn die Bildli noonig sichtbar.
Am Sunntig vor dr Fasnacht ka me denn die - wie au dr Fasnachtszeedel - uff dr Homepage aaluege!
Und dängg dra: D Schnäädi-Homepage isch eini vo de weenige Clique-Homepages in Basel, wo au an dr Fasnacht mit nummen e paar Stund Verspöhtig, aggtuelli
Cliquebilder zeige wird!
Rund um Basel duets scho drummle, pfyffe und vor allem
schränze! Dr Fasnachtsvirus breitet sich in dr Region scho uss.
Und d Schnäädis sinn voll im Zytplan!
Si miens jo au: Denn jetzt kömme die zwei gröschte
Wuche vom Joor, wo in däm Joor dangg em FCB no
spezieller als sunscht sinn.
Durum isch an däm Sunntig au d Homepage mit Bilder
uss dr Vorfasnachtszyt uffgrüschtet:
Goschdüümnaje, Larveaapasse, Marschiebige mit und
ohni Ysszäpfe und dr Bsuech vo de Vorfasnachtsveraa-
staltige sinn im Bild feschtghalte.
Und bevor duu dr PC, s Notebook oder dr iPad uss em
Fänschter willsch schiesse, liiss no dr Täggscht oobe-
draa!!! :-) :-)
(Für die aggtuellschte Bilder z finde, muesch uff e baar
Syte - au uff d Syte 2 - go ummeluege! Hesch jo none
Wuche Zyt!)
Zum zweite Mool sinn mir in däm Joor wider ins Iebigs-Wuchenänd! Will d Schnäädis s Joor duure gstresst sinn und s Piccolo und d Schleegel ammigs vernochlässigt wärde, hänn mir au daas Joor wider en Iebigs-Intensiv-Wuchenänd duurezooge!!
Ass es nääbenem Iebe au no Platz für s Gmietlige gha het seht me uff de Bilder: Sygs dr obligati Gin & Tonic, sygs d Vernichtig vo de Wiehnachtsguzzi, sygs d Apéro-Disco, sygs e feyns Fondue Bourgignon oder e luschtigs Spiil!
(Doo goohts zu de Bilder.)
E strängs aber schöns Wuchenänd für d Schnäädis!
Am Frytig isch es loos gange mit em Vogel Gryff. Und dr Petrus het wider emol bewiise, ass är e zimmlig guete Bebbi isch. D Wätterprognoose sinn uff jede Fall vyyl schlächter gsi!
Mir hänn dr Vogel Gryff uff jede Fall gnosse! Under anderem amene exzellänte Platz im Schlander!
(Doo zeigt sich dr Vogel Gryff, dr Lei und dr Wild Maa.)
Jetzt isch d Wiehnachtszyt ändgültig verby! Ei Daag het me sich noonemol als König oder Königin könne fühle. Ab jetzt stelle mir uns aber alli in d Dienscht vor dr einzig richtige Königin für uns: Dr Frau Fasnacht.
Durum isch sit hüt au unsere Fasnachtsplan online.
D Cliquemitgliider könne ihn wie immer unter em Menupunggt 'Nur fir uns' aaluege und aabelaade.
Es gooht numme no e Bitz mehr als siibe Wuche!!!
Fascht e Wuche isch es scho här: Der letscht Schnäädi-Event het wie jedes Joor in dr Hard stattgfunde. D Schnäädi-Waldwiehnacht hets scho zum säggste Mool gäh und obwohl s schlächt ussgseh het, het is schlussändlig dr Rääge verschoont. Es isch die wärmschti SWW je gsi.
Wie jedes Joor hets Gliehwyy gäh und vom Grillmeischter Mauro Schnitzelbroot.
(Doo sinn d Bilder vo dr Schnäädi-Waldwiehnacht)
D Altjoorwuche isch die, wo Vyyli ihr Büro dien uffruume. S Joor wird in Kischte verpaggt und es wird Platz gschaffe für s neue Joor.
Ich ha die Zyt bruucht zum einersyts d Homepage barat z mache für d Fasnacht, wo vor dr Türe stooht und anderersyts zum no die letschte Bilder vom Schnäädi-Joor 2011 uff d Homepage bringe.
Die Bilder hänn no gfählt: Die vo dr Mäss und die vom Schnääderfraass.
(Doo sinn die fählende Bilder)
Joo! Mir sinn - wie dr Jogi Löw - Züüge worde!!!!!!! Är isch wirgglig doo gsi! Und daas amenen gwöhnlige Donnschtig Zoobe! .....
Dr Schlaagergott, dr Dieter Thomas Kuhn, isch doo gsi und het uns verzauberet! Mir glaube an d Zuekunft vo de Schnulze und stelle in de näggschte 25 Joor unseres ganze Repetoir uff dää Sound um .... oder au nid! :-)
Uff jeedee Fall isch daas e sensazionelle Oobe gsi mit emene fantastische Abschluss im Schoofegg!
(Doo sinn d Bilder vo dr Audiänz)
Ei Ereignis jagt s näggschte! Und i kumm gar nid nooche mit em Doggumentiere uff dr Schnäädi-Homepage!
Nach em Bsuech uff de Wiesn in Münche isch nodürlig e Bsuech uff de erschte Volggshuus-Wiesn in Basel e Must gsi. Und denn hets grad no passt, will jo sowieso Herbschferie gsi sinn und mir kei Iebigsstund gha hänn. Denn hämmer halt s Mass-Stämme giebt!
(Doo gits e baar Bilder vo de Volggshuus-Wiesn)
E baar vo uns warte sicher scho ungeduldig...Und doo sinn sii: D Bilder vo dr daasjöhrige Schnääderreis.
Dört wo mir uff dr erschte Schnääderreis vor mehr als 15 Joo aane sinn, sinn mir jetzt zrugg koo: Uff Münche ans Oggtoberfescht!
S Wätter und d Stimmig sinn grandioos gsi und mir hänn jeedi Minute gnosse.
Daas zeige au d Bilder. Und wills eso vyyl sinn gits grad mehreri Syte vo Bilder, wo me über d Haupt-Schnäädireissyte 2011 ka usswähle.
(Also: Uff zu de Wiesnbilder 2011)
Isch es eigentlig dr Schluss vom letschte Fasnachtsjoor oder dr Start ins neue Fasnachtsjoor? Mir meine dr tradizionelli Schnäädi-Grill am 31. Juli.
Daas Joor hänn mir nach emene verräägnete Juli am letschte Daag vom Monet Wätterglügg gha. Und eso het nid numme d Summer-Boole zu dr guete Schtimmig biidreiht.
(Doo gits die patriotische Bilder vo de Schnäädis)
Scho isch es meh als e Wuche här: D Derniere vom Basel Tattoo, wo d Schnäädis immer zämme göhn go luege. Und will s sich bim Tattoo um en Open Air Veraastaltig handlet, mien mir uns für die näggschti Fasnacht guet überleege, öb mir überhaupt Larve wänn, denn: Dr strömendi Rääge an dr Derniere macht uss uns sehenswärti Naturschönheite! :-) :-)
Vor em Rääge hets aber none droggeni Tattoo-Parade gäh und e nid allzu droggene Grillplausch in de Gleeser.
(Doo gits Bilder vo däm Aaloss)
Dää Bummel gooht nid numme bi de Schnäädis in d Gschicht yy!
Wenn hets daas schonemol gäh? Ass me an Bummel in de Summerkleider ka go und eigentlig immer no z warm het?
Uns het dr Bummel zuedäm in eini vo de Sunnestuube in dr Umgäbig brocht: Ins Markgräflerland.
Daas, wo dört d Sunne s Joor duure fabriziert, hänn mir dörfe deguschtiere.
Nachemene bäumige Ässe sinn mir denn no go drummle und pfyffe.
Zoobe denn het dr Petrus noonemool zeigt, ass är en ächte Bebbi isch und blyybt! D Räägewolgge het är bis frieh am Mändigmorge zruggghebt und de Basler Fasnächtler so e grandios Abschluss von ere tolle und warme Fasnacht bscheert!
Ganz härzlig dangge wämmer em Bummel-Organisationscomitee. Mir hänn dr ganz Daag an die beide dänggt, wo leider nid hänn könne drby syy.
Dr Hompage-Baschtler danggt allne Schnäädis und de guete zuegwandte Schnäädi-Seele für e grossartigi Fasnacht 2011!!
Zum Glügg hänn mir e baar tolli Perschpeggtive für d Schnäädis dää Summer! Eso fallt s Warte vo deene 329 Dääg bis zem Morgestraich 2012 e Bitz liichter!
(Und doo gits die eimoolige Summerbilder)
No ei letschte Daag 'Fasnacht' wartet am näggschte Sunntig uff uns.
Zum Zyt bis denn e Bitz z verkürze, hets none baar neui Bilder uff de verschiidene Syte vo dr Fasnacht und vo de Vorbereitige.
Und denn hanni au no d Syte miesse uffdeile, ass eim wirgglig alli Bildli aazeigt wärde.
Also: Eifach emol iineschneugge!
Wie immer: Vyyl z schnäll isch es Donnschtig und vieri demorge worde.
In e paar Minute bricht die reali Fasnachtswält zämme und uss em jubilierende luute Basel wird eifach wider s normale Basel.
Was bliibt, sinn tolli Erinnerige und Dräum!
Zum d Fasnachtdespression in Griff griege, wird in de näggschte Dääg d Homepage none Bitz aggtualisiert mit Bilder vo all unserne Fründe, wo uns in de drey Dääg gseh hänn oder sälber drby gsi sinn.
S Iine-Luege lohn sich also!
PS. Und wenn denn, öber no weiss, wie me d Uhr und s Fasnachtslääbe am Donnschtig zrugg uff dr Mändig ka dreihe, gits en Erfinderpryys! :-)
Die neu BaZ-Redaggzion isch umstritte. Dr Titel uff dr Homepage isch aber träffend gsi: 'Der Himmel beweint das Fasnachtsende.'
Freud und Druurigkeit liige am dritte Fasnachtsdaag immer noch zämme und eso het denn au dr Petrus an däm Daag si lachends und si druurigs Aug s Wätter lo bestimme.
D Schnäädis hänn die fiechtere Momänt gnützt, zum s Schnäädi-Verpflägigskonzäpt voll könne usszteschte: Am Nommidag hets noonemol Würschtli vom Grill gsi und denn spooht Zoobe au no Raclette vom Grill.
(Was au sunscht no am Mittwuch passiert isch, ka me doo im Bild go aaluege.)
Wär ka bi eso Wätter deheime blyybe?
Daas isch vom Petrus die beschti Wärbig in eigener Sach gsi: Schnöer ka Kinderfasnacht nid sii!
Und will d Dääg scho rächt lang sinn, sinn d Nächt umso kürzer.
Trotzdäm hets scho Bilder uff dr Homepage - aber noonig gross sortiert.
(Doo gits aber glych scho Bilder vom Zyschdig.)
D Frau Fasnacht het Basel fescht im Griff und zämme mit em Petrus het si allne Fasnaächtler e Prachts-Mändig gschänggt!
D Wettstaibrugg isch grammlet voll gsi mit Zueschauer, wo s Sünnele und s im Fasnachttriibe zueluege mitenander verbunde hänn.
Und mir hänn dr Parademarsch gnosse und in dr Pause s erschte Mool unsere Grill in Betrieb gsetzt!
Zoobe denn sinn mir uff em Münschterplatz unseri Ladärne in dr gröschte Openair-Kunschtussstellig go parkiere und hänn die vyyle Kunschtwärg gnosse.
Und zimmlig genau 24 Stund nach em Start von däm Daag sinn mir denn heime und freuen uns uff e wyters Highlight vo dr Fasnacht: Dr Fasnachtszyschdig.
(Do gits jetzt aber zerscht d Bilder vom Mändig!)
E herrlige Morgestraich isch es gsi!
Zwar isch es Mitti März gly hell, aber die zwei Stund in dr völlige Dunggelheit sinn vom Feynschte gsi.
Uff dr Hompage gseht me e paar Bilder vom schönschte Momänt vo dr Fasnacht.
(Doo sinn d Bilder vom Morgestraich.)
Numme no 6 Schtund bis zum Morgestraich!
Hüt Nommidaag hänn mir d Ladärne montiert und nochhärd yypfyffe. En erschte magische Fasnachtsmomänt isch, wenns vo allne Syte fooht aa pfyffe.
Spöter sinn mir zrugg zumene alljöhrlige Fasnachts-Highlight vo de Schnäädis: Em Fasnachts-Yysirpfle.
Mir hänn wider e herrligs Nachtässe gnosse und is uff d Fasnacht zämme aafoo freue. Und jede isch no mit emene richtige Staubutensil heime gange: Emene richtige Staubwädel!
No in eigener Sach: Mir sinn au an de näggschte drey Dääg uff dr Homepage zimmlig aggtuell. Zum d Fasnacht richtig könne z gniesse, kanni aber leider d Bilder in deere Zyt nit kommentiere.
(Doo gohts zu de Bilder vom Ladärne-Yypfyffe.)
No 29 Stund bis zem Morgestraich.
Ab jetzt lauft alles nach de scho über zwanzigjeehrige Tradizione: Zerscht göhn mir zämme go dr Buuch fülle im Klingeli und nochhärd wartet d Ladäärne, ass si mit Värsli no verziehrt wird.
Daas Joor isch e guet Värslijoohrgang! Scho gly isch die ganz Ladäärne mit Väsli gfüllt. Und mir könne die letschti normaali Nacht go gniesse und noonemol richtig go Energie sammle.
(Doo gits Bilder vom Värslibrinzle.)
Wie be de Zünft - nach Gschlächter trennt - goht dr Frytig vor dr Fasnacht bi de Schnäädis über d Bühni.
Aagfange hets für beidi im Glaibasel. Die Einte sinn bim Lotti gsi, die Andere im Klingeli.
D Männer hänn drnoo dr renovierti Bruuni Mutz inspiziert. D Bar isch super. Und dört gits erscht no ein vo de günschtigschte G&T in dr Stadt!
(Doo gits e paar Bilder vom Damen- und Herrenoobe.)
Ändlig sinn si doo! Die schneenschte Dääg vom Joor in Basel.
S Vorbereite het en Änd! Jezt heissts numme no jedi Minute gniesse. Denn vyyl z schnäll sinn die Dääg verby. Jetzt löhn mir uns eifach numme no dryybe und alles uffsuuge, ass es denn wider für e Joor Warte längt.
Zerscht aber löhn mir doo d Vorbereitige Revue passiere und mir erinnere uns an die letschte säggs Wuche.
(Doo gits d Bilder vo unserne Vorbereitige.)
Dr hunderjeehrigi Kalender het nid rächt! Mitti Merz isch in Basel dr Friehlig doo! Bi deene herrlige Wätterbedingige sinn d Schnäädis uff die letschti Marschiebig.
Und unseri neui Vordräblerin het sich als Grillmeischter grossartig in Szene gsetzt.
D Fasnacht ka koo. Mir sinn vorbereitet und bis am Donnschtig am vieri am Morge wärde au alli Märsch wider richtig guet sitze.
(Doo gits Bilder vo allne drey Schnäädi-Marschiebige.)
Bi fantastischen Friehligswätter isch e Schnäädi-Delegazion wider uff Luzärn go Fansachtsluft schnuppere.
Während z Luzärn scho d Fasnacht ir Änd het miesse finde, freue mir uns uff unseri drey schneenschte Dääg. Obwohl d Guggemusiggklänk in Luzärn none Bitz schreeger sinn als die z Basel, kocht jetzt unsers Fasnachtsbluet.
(Doo ka me d Bilder vo dr Fasnacht in Luzärn aaluege.)
Jeedes Joor schruube mir e Bitz an unserne Termin, zum is no mehr uff d Fasnacht zfreue!
Durum hänn d Pfyffer die tolli Idee gha vomene Pfyffer-Trainings-Weekend. Und es isch grandios gsi: D Kulisse, d Hütte, s Iebe, s Ässe, d Färnsehüberdraagig .... Eifach alles.
Hoffentlig isch daas nid s letschte sottige Wuchenänd gsi.
(Doo ka me luege, wie mir giebt hänn!!)
Es isch fascht wie an dr Fasnacht: Bis e paar Minute vor em halbi elfi dropfts vom Himmel ooben aabe. Aber glychzytig mit em erschte Böllerschuss vom Floss vom Wilde Maa, dreiht dr Petrus dr Hahne zue! Immerhin hets Wätter villicht dr eint oder die ander vom Ussegooh abghalte und eso hänn mir e Bitz meh gseh als die letschte Joor.
(Was me hät könne gseh, ka me doo go luege.)
Und denn hanni none baar Bilder vo dr SWW uff em Fotiapperat gfunde.
(Die gits doo. :-) )
Geschter isch d Blagette für d Fasnacht 2011 vorgestellt worde. Es isch also höggschti Zyt zum Wiehnachtsgutzi und Wiehnachtskugele scho z vergässe und sich langsam aber sicher sich mit däm, wo in den näggschte Wuche passiert, aafoo ussenanderzsetze! Am 8. Januar kunnt d Blagette in Verkauf und vo denn goohts au bi de Schnäädis Schlag uff Schlag.
D Homepage, wo unseri wichtigschte und schönschte Momänt wider feschtghalte wärde, isch bereit für d Vorfasnacht und d Fasnacht 2011. D Bilder vo de vergangene Fasnachte ka me im Archiv finde.
Scho fascht e Wuche isch es här: Wie jedes Joor isch d SWW (d Schnäädi Waldwiehnacht) s letschte Grossereignis vom Schnäädi Cliquejoor. Als kleine Huffe hänn mirs in dr Hard wider gnosse: Und daas bi glych vyyl Gliehwyy wie im letschte Joor (obwohl mir e baar weeniger gsi sinn) und bi Schnitzelbroot. Au dr Wiehnachtsbaum, d Faggle und d Gschänggli hänn nid dörfe fähle. Und wie jedes Joor schmeggts au e Wuche nach dr SWW no nach deere uff em Eschterigg, wo d Windjagge no am Usslüfte sinn! :-))
(Doo gits e baar Bilder)
Si isch verby: D Schnääderreis 2010.
Ich isch e spezielli Schnääderrreis gsi: Nonie sinn mir eso wyt furt gange und nonie eso lang wäg gsi. D Steigerig wäre Schnääderferie! :-)
Die vier Dääg hänn sich gloohnt: Mir hänn eso vyl gseh wie anderi in mehr als ere Wuche ... und e baar Sache hätte die meischte nid emol könne gseh: Zum Byspiil d Royal Box am Royal Edinburgh Tattoo!
(Doo gits e baar Bilder :-) :-) )
Für daas muess e none Bitz Zyt gäh: I bi im Ruggschtand mit dr Homepage und due jetzt no die beide Summer-Highlights vo de Schnäädis noochedokumentiere.
Wie immer dräffe mir uns am 31. Juli zum tradizionelle Schnäädergrill. S Wätter het passt...joo, eigentlig isch es schlicht sensazionell gsi.
Und au dr Grill und d Fläsche hänn daas produziert, wo si hätte sötte.
Leider hänn au e baar Aggtivi unfreywillig miesse fähle! :-( Mir wünsche ganz gueti Besserig und für s näggschte Joor hänn mir scho wider schöns Wätter bschtellt!
(Doo gits d Bilder vom Schnäädergrill)
Scho mehr als ei Wuche isch es här, ass s Basel Tattoo für daas Joor wider dr Vorhang gschlosse het.
Nümm ganz eso warm wie d Wuche duure isch es an dr Derniere gsi, aber s Wätter het gschtumme.
Mir hännis scho am Nommidaag an dr Parade uff d Derniere iigschtimmt und sinn denn an Schnäädergrill.
Und denn hets zoobe none Morgestraich zmitts im Summer gäh ..... dangg em Tattoo!!
(Doo gits d Bilder vom Schnäädertattoo)
Scho isch es e Wuche här! Und vor ere Wuche hänn mir noonig gwüsst, ass unseri Fuessballer d Spanier schlöhn und alli vo de Schwyzer in Südafrika reede.
Also, am Samschtig vor ere Wuche hänn sich d Schnäädis bi für dää Summer usserordentlich guetem Wätter zum Schnääderfraass droffe.
Doo gits e baar Bilder vo däm Aaloos inkl. de Bilder vom Menu für d Sammlig vom Marcel.
Die Bilder gits exklusiv uff dr Homepage vo de Schnäädis am irem neue Ort: http://www.schnaeaedi.ch
(Doo gits d Bilder vom Schnääderfraass)
Dritte Bummelsunntig! Für d Schnäädis für daas Joor wirgglig dr letschti Oobe mit Fasnachtsmusigg dusse uff de Stroosse in Basel.
Zerscht hänn mir aber könne erfahre, ass es in Olte nid numme e Bahnhof git sondern au none baar Hüüser - also eigentlig e kleini Stadt. Leider het sich dr Aadrang in Olte vo Stadtbsuecher zimmlig im Rahme ghalte. Drfür hets denn in Basel noonemol eso richtig gfäggt. Und an dr Freye Strooss sinn d Spalier vo Zueschauer wider mehrreihig gsi! Kei Wunder: S Wätter isch wider vyl besser gsi als aakündet - wie eso hüffig an dr Fasnacht 2010! Zum Glügg!!!
(Doo gits Bilder vo unserem Bummel uff Olte.)
D Fasnacht verruume - öbbis vom druurigschte, wos git! Und trotzdäm: Genau denn spührt me siin noonemool in de Händ und me ka si aaluege.
Was gäbt i drumm, grad jetzt d Zyt noonemool e Wuche zruggzdreihe! Denn hätte mir no alles vor uns und d Schtimmig wär uff em absolute Höhepunggt.
Jetzt aber isch die Schtimmig zimmlig uff em Nullpunggt! Immerhin het der FCB sis Beschte gäh und hüt zoobe kunnt no dr Querschnitt im Färnseh.
Und denn ka me immer wider Bilder aaluege.
Langsam dröpfele au no anderi Bilder ii. Und eso gits mit de Bilder vom Schlussoobe über 150 neui Bilder über die ganzi Vor- und Fasnachtszyt 2010 zum aaluege!
Au daas isch scho fascht e Tradizion: Am Samschtig nach dr Fasnacht goohr e Schnäädi-Delegazion an Schlussoobe vo de Comité-Schnitzelbängg. Daas Joor sinn mir e rächti Blootere gsi und hänn is noonemool an Fasnacht zruggversetzt. Nach drey Schtund sinn denn die letschte Larve ändgültig für daas Joor verschwunde.
(Doo gits Bilder vom Schlussoobe)
Nid gnueg, ass d Fasnacht vyyl z schnäll verby gange isch!
Dr Hammer isch, ass mir bis zur näggschte Fasnacht 381 Dääg warte mien!
I wünsch mir, ass mir die Zyt bis denn in dr Clique zämme in beschter Stimmig könne überbrücke und dr eint oder anderi 'Fasnachtsstimmig-Daag' bis denn dörfe erlääbe.
Wenn daas au öbber vo de Lääser möcht erlääbe, hänn mir en attraggivs Aagebot: Mir suech dringen no Versteergigg im Vordraab!! Also mälde und ussbrobiere!
PS. In de näggschte Dääg, wenn d Föteli vo unserne Fans au no doo sinn, wird d Homepage immer wider aggtualisiert! Eso fallts s Plange uff die näggschti Fasnacht nid ganz eso schweer (aber numme ganz e Bitz!).
Dr Mittwuch isch, wenn me vo hinde här luegt (also eigentlig vom Donnschtig) numme der drittschönschti Fasnachtsdaa. Alles het finale und unumkehrbare Charakter: Dr letscht Cortège, s letschte gmeinsame Nachtässe, dr letschti Oobe und denn dää unsääglich deprimierendi Ändstraich am Donnschtig am Vieri demorge.
Mir hänn au dir Mittwuch, wo eigentlig vom Petrus rächt Baslerisch bedient worden isch gnosse, falle aber jetzt in e Fasnachtsdepression. Isch eifach viel z schön gsi, zum eifach eso wider dr Alldaag z akzeptiere.
(Doo gits Bilder vom Mittwuch)
Au dr Zyschdig isch scho wider Vergangeheit.
Mit Kinderfasnacht, Ladärneusstellig, Guggekonzärt und Gässle bietet dää Daag alli Facette vo dr Fasnacht aa.
Mi hänn dää Daag - bi beschte Wätterbedingige - wider gnosse.
Und ganz am Aafang vom Nommidaag, hänn mir unseri Sujet-Heldin no aatroffe.
Dr einzig Daag übrigens, wo s Zueluege, wie d Räppli vo dr Stadtreinigung uffgruumt wärde, no kei Buuchweh macht.
(Doo gits Bilder vom Zyschidg)
Bi phantastischem Wätter isch dr Mändig vyyl z schnäll verby gange.
Schnäll hänn sich alli Fasnächtler mit em Petrus wider versöhnt. Ass är am Morgestraich uff dr falsch Wätterknopf druggt het, het dr Petrus nämmlig schnäll korrigiert und uns e tolle Mändig gschänggt!
Und denn hänn mi au no e garndiosi Jubileeums-Zugsblagette vom Comitee bikoo.
Alles was mir sunscht no am Mändig bis frieh in Zyschdigmorge erläbt hänn, ka me bis unsere Bilder go aaluege.
(Doo gits Bilder vom Mändig)
Sit am vieri am Morge regiert d Frau Fasnacht in Basel. Zwar isch es nid ganz drogge bliibe, aber was sölls: Schön isch es uff jede Fall wider gsi.
D Ladäärne hänn gfungglet und d Stadt isch in d Tön vo Picollo und Drummle yytaucht!
Eifach numme schööööön!!!
(Doo gits Bilder vom Morgestraich)
Jetzt goohts no genau 6 Schtund und denn regiert nümm dr Guy Morin die Stadt sondern e Frau!
Nodämm mir hüt zmittag d Ladäärne montiert hänn sinn mir denn bi beschtem Wätter d Ladäärne go yypfyffe. Wääge dr Baustell vor em Cliquekäller sinn mir e Bitz en anderi Route gloffe. D Pfyffer hänn beschtens duureghebt.
Denn am Oobe hänn mir tradizionell d Fasnacht im Cliquekäller yygsirpflet.
Und jetzt warte mir!
(Will jetzt d Zyt im Flug vergooht, spaare mir d Kommentär bis nach dr Fasnacht. Während dr Fasnacht sötts aber immer wider aggtuelli Bilder gäh!
(Doo gits Bilder vom Ladäärneyypfyffe)
Jetzt isch die heissi Phase vo dr Fasnacht yyglüttet! Es gooht no 28 Schtund bis zum Morgstraich!
Sit hüt zoobe hets uff dr Ladäärne Värsli.
Vorhärd hämmer am Nommidaag dr Ladäärnewaage zämmebaut und dr Käller vorbereitet und geschter zoobe sinn mir gschlächtertrennt unterwäggs gsi.
Zu all deene Aggtiviteete und zu de Fasnachtsvorbereitige gits jetzt vyyl neui Bilder. Bim Aaluege vo deene ka me d Vorfreud uff d Fasnacht no e Bitz steigere.
Zu all deene Bilder kunnt em über d Linggs, wo rächts uff deere Syte stöhn.
Z Basel wartete me no uff die drey scheenschte Dääg und in Luzärn isch d Fasnacht scho verby. Um daas beniid i d Luzärner gar nid, drfür aber um d Tatsach, ass in Luzärn d Fasnacht 6 Dääg (!!!) gooht!
Wie scho in de letschte Joor sinn e baar Schnäädis in Luzärn am Monschtercorso e Bitz Fasnachtsluft go schnuppere. Zwar isch es rächt kalt gsi aber d Stimmig het passt.
Jetzt kaas denn bi uns in Basel wirgglig loosgooh ..... und eifach nümm uffhöre.
(Doo gits Bilder vom Monschtercorso... teilwyys mit Kommentar)
Sit hüt isch an vyylne Ort in dr Schwyz aber au sunscht uff dr Wält Fasnacht!
Und dangg em Geburtsdaag vom Comitee und ere grandiose Idee het me hüt au in Basel e Bitz Fasnachtsluft könne schnuppere: S erschte Mool hets e groosse Schuelfasnachtsumzug in dr Basler Innestadt gäh! Und was me doo gseh het isch eifach sensazionell! Wenn me daas gseh het, muess me eigentlig um d Zuekunft vo dr Fasnacht kei Angscht ha! Und s Tolle: Fasnacht in de Schuele isch - eso gsehts uss - eins vo de schönschte und beschte Integrationsmittel! E riisigs Danggschön an die, wo dää Umzug organisiert hänn (vo mir uss könnt s Comitee wäge däm jedes Joor e groosse Geburtsdaag fyyre). Und en ebeso grosses Danggschön an die, wo dr Lehrplaan Lehrplaan löhn blyybe und mit de Kinder zämme Zyt uffwände zum daas wyterzpflääge, wo die Stadt ganz bsunders macht: D Fasnacht!!!
Es isch trotz dr Keelti eifach grossartig gsi!
(Doo gits Bilder... no ohni Kommentar)
Dr Winter het Basel und die Langi Erle im Griff. Daas hinderet d Schnäädis aber nid, dreyehalb Wuche vor dr Fasnacht uff die erschti Marschiebig z goo.
Und s Pfyffe und Drummle funggzioniert no.
(Doo gits die erschte Bilder...)
Wills an däm Daag s erschte Mool im Joor in dr Stadt drummlet kunnt im Januar immer e Bitz Fasnachtsstimmig uff, wenn dr Vogel Gryff durch s Glaibasel zieht. Mir sinn am Morge und zoobe go luege und hänn im Schalander e sensazionelle Platz gha, zum dr Danz vo de drey Ehrezeiche könne z gseh.
(Doo gits mehr...)
D Jubileeums-Blagette isch hütte vorgestellt worde.
Doodrmit isch dr Startschuss für d Vorfasnacht 2010 definitiv gfalle.
Au unseri Homepage isch für d Fasnacht 2010 barat. D Linggs sinn aapasst und im Archiv findetet me jetzt d Bilder vo dr letschte Fasnacht und em Schnäädi-Joor 2009. Und für die Aggtive isch dr Terminplan für d Fasnacht 2010 eebefalls abgleggt.
Jetzt heissts no 'guet Rutsche' und denn könne d Fasnachtsvorbereitige eso richtig loos goo.
Am letschte Donnschtig es wider eso wyt gsi. Genau e Wuche vor em Heilige Oobe hänn d Schnäädis in dr Hard Waldwiehnacht gfyrt. S Wätter isch eso gsi wie s sii muess: Kalt und drogge! Und es sich sogar wyss gsi!
Uff de Bilder gseht me, wiso an däm Oobe d Würschtli Rauchwürschtli und mir Rauch-Schnäädis gheisse hänn.
Mit dr Waldwiehnacht gooht daas Schnäädi-Joor z Änd.
Und in e baar Daag startet si denn: Die zweitschönschti Zyt vom Joor: D Vorfasnacht!
(Doo gits mehr...)
Am letschte Samschtig vom Oggtober hänn mir daas Joor e bsundere Schnääderfraass gnosse. Nodäm mir vor emene Joor imene Turm gässe hänn, sinn mir daas Joor in Undergrund! In e ganz spezielle Undergrund: In e Wykäller! Nääbere Palette von verschiidenem italiäni-schem Wyy hänn mir aber au öbbis in Buuch griegt.
Ass für e paar von uns dää Daag scho am Morge mit ere erschte Deguschtazion gstartet het, zeige d Bilder au.
(Doo gits mehr...)
Am letschte Wuchenänd isch es ändlig wider eso wyt gsi: Schnäädi-Reis! Nach em letschjööhrige Erhoole am Meer isch daas Joor wider Kultur pur uff em Reiseprogramm gstande!! Und daas in Amsterdam!
Und d Neu-Farme unter uns hänn vyyl Aaschauigsuntericht gha: Bluemeziible, Hanfsoome und Banaane-Studie!
(Doo gits mehr...)
Am Morge hets no nach Rääge gschmeggt. Aber scho bim Uffstelle vo de Zält sinn d Schweissdropfe gloffe und grad uff dr Start isch denn au d Sunne doo gsi. Bi mehr als 20 Grad (die gfühlti und gmässeni Temparatur sinn nid glych gsi) het me sich sogar no im Wasser könne abkiehle.
Es het gnueg z Ässe und z Dringge gha und eine vo de Höhepünggt isch am viertel ab elfi zoobe s Führwärgg uff em Rhy gsi.
Ussklunge isch den dr Schnäädergrill 2009 scho am 1. Auguscht im Zält!
(Doo gits mehr...)
Es isch schone Bitz wie Summerfasnacht: S Basel Tattoo. Inere Zyt, wo d Zytige mit 'suure Gurke' mien überlääbe (und ammigs kunnts mir vor als wär die blöödi Schweinegrippe au soone Gurke!), styygt jetzt z Basel scho zum vierte Mool s Basel Tattoo. Äs het alles, wo für e Gänsehuut-Feeling sorgt und isch durum ebbe scho fascht e Bitz wie Summerfasnacht.
D Schnäädis sinn nodürlig in verschidenschter Mission am Tattoo drby gsi: An dr Parade und em Pipefescht, in dr Tattoo Street und an dr Tattoo-Derniere: Däm Höhepunggt vom Tattoo! Gschtartet hänn mir d Tattoo-Derniere in de neue Zält bi Spiis vom Grill und Trank uss dr Fläsche (in d Gleeser nodürlig).
(Doo gits mehr...)
Dr Friehlig hets Land eroberet. Vo däm hänn au mir am Bummel profitiert.
D Räppli am Boode hänns zeigt: Mir sinn in e Stadt, wo für d Fasnacht en offes Ohr het: Solothurn. Nach emene herrlige Daag dört sinn mir denn zoobe zrugg uff Basel: D Freyestrooss isch daas Joor schlicht überwältigend gsi! D Zueschauer sinn mehrreihig Spalier gstande und es schyynt sich iizbürgere: D Gugge überlöhn d Freye bis öbben am achtig de Clique und denn schränze si e letschts Mool zum Märtplatz! Merci!
Am zähni isch es denn halt eso wyt gsi: E letschts Mool hets gheisse: Abschiid näh vo dr Fasnacht 2009. Numme nid für alli Schnäädis isch denn Schluss gsi. Noonemol sind mir ins geografische Härz vo dr Fasnacht: Am Rümmeliplatz in Schnaabel und spöter denn no in Baggestooss.
E schöni Fasnacht het in de friehe Morgestund e würdige Abschluss gfunde.
Nodürlig gits au vom Bummel wider Bilder. Im Momänt no ohni Täggscht. Trotzdäm wünsche mir vyl Vergniege.
(Doo gits mehr...)
Es isch no kei Wuche här, ass mir d Drummle und d Piccolo hänn könne ussenäh und d Stadt für drey Dääg in d Fasnachts-Wälthauptstadt hänn könne verwandle.
Jetzt isch d Fasnacht wider verruumt und läbt nur no in de Gedangge und in dr Fasnachtsseel wyter.
Immerhin stooht s ganze Joor über dr Waggis mit em Kopfladärnli hinter mir und erinneret mi doo dra, uff was i mi s ganze Joor wider ka freue.
Und für alli die, wo morn am morge am vieri verwache gits e Troscht: Es gooht denn numme no 350 Dääg bis zem näggschte Morgestraich!
Uff dr Homepage het sich au no einigs doo. Es het noonemol neue Bilder druff und fascht alli Syte vo dr daasjährige Fasnacht sinn jetzt au fascht alli kommentiert (nur s Yypfyffe und dr Fasnachtszyschdig sinn noonig fertig).
Denn gits au none paar Bilder vom letschte Fasnachtsaalooss vo däm Johr mit Larve: Em Schlussoobe vo den Comité-Schnitzelbängg.
(doo gits mehr...)
D Fasnacht 2009 isch leider scho wider Vergangeheit und spötischtens am Mändig het is dr Alltag vollständig zrugg.
D Zyt bis denn nütze mir no, zum unseri Homepage z aggtualisiere mit zuesätzlige Bilder vo unserne verschiidene Cliquefotografe und d Bilder z kommentiere. I brobier au mögligscht vyl vo de kleine Fähler uff dr Homepage z korrigiere.
S Wichtigschte isch aber, ass d Homepage uns an d Fasnacht erinneret und grad, wenn s am schwerschte fallt, sich mit dr Alltagswält miesse z ussenandersetze, e Hort isch mit guete Gedangge an die scheenschte drey Dääg vom Joor.
Der Mittwuchscortège het dr Mändig toppt! S guete Wätter het d Lüüt in Schaare aagloggt und mir hänns gnosse, Teil vo dr Fasnachtsfamilie dörfe z syy.
Au zoobe hänn mir denn no lang Wätterglügg gha und erscht wo s Datum uff dää dummi Fasnanchtsdonnschig gsprunge isch, sinn d Schleuse am Fasnachtshimmel uff gange. Trotzdäm hänn mir d Fasnacht bis zum Schluss und none Bitz drüber uss gnosse und freuen uns jetzt no uff dr Bummel, unser Schnäädijoor und denn uff dr 22. Hornig 2010: Dr näggscht Morgestraich!
(doo gits mehr...)
Kei Dropfe Rääge!
Dr Daag vo de Kinder, de Gugge und de Ladärne isch unter emene guete Stärn gstande! Alli die, wo am Mändig nid uff dr Gass sind gsi, sinn hüt dusses gsi. Durum hets in dr ganze Stadt e grossi Druggede gäh - wie sich s für d Fasnacht ghört.
Mir sinn au wider unterwäggs gsi und sinn uff bekannti und weniger bekannti Lüüt gstosse.
(doo gits mehr...)
20'000 Fasnächtler trotze em Rääge und gwünne!
Doo gits Bilder vom Cortège und au vo dr Ladärneussstellig hets scho erschti Bilder.
(doo gits mehr...)
Sit guet 9 Schtund regiert in Basel d Frau Fasnacht!
Punggt vieri isch mit em Abschalte vom Liecht für drey Dääg dr Alltag öbbis ganz Speziellem gwiche.
S Wasser vom Himmel het sich im Rahme ghalte, eso ass mir nid emol d Räägeschütz bruucht hänn.
Und mir hänn vom Morge vo de Mörge au e paar Bilder gmacht!
(doo gits mehr...)
Die letschte Dääg sinn wie im Flug vergange und in fümf Schtund starte für mi die 72 schönschte Schtund vom Joor.
Nodürlig möcht i die weenige Schtund so vollständig wie möglich gniesse. Und sälbstverständlig möchte mir au d Lääser vo dr Homepage an dr Basler Wiehnacht loo teilhaa.
Durum lueg i au daas Joor wider, ass mir aggtuelli Bilder während dr Fasnacht uff unseri Homepage bringe.
S Usskommentiere muess aber bis no dr Fasnacht - woni gar nid will dra dängge - warte.
I dangg für s Verständnis und mir Schnäädis wünsche allne in Basel und de Heimwehbasler, wo immer si grad sinn, e wunderscheeni Fasnacht, wo hoffentlig nie wird verby goo!
Mit em Yypfyffe findet d Vorfasnacht dr Abschluss oder d Fasnacht e liislige Aafang.
Ohni ei Räägedropfe isch s Yypfyffe über d Bühni gange. Die gröschti Herusforderig isch s Dach vo dr Ladärne gsi.
Nochhärd hets wider e fantastischs Znacht im Cliquekäller gäh.
Jetzt goohts none Bitz ins Bett und denn startet d Fasnacht richtig!
(doo gits mehr...)
Mir sinn grüschtet. Und durum löhn mir jetzt und morn zoobe die eint oder anderi Katz uss em Sagg.
Ab jetzt ka me uns zueluege, wie mir d Goschdüm gnajt hänn und wie uss emene neue groosse Holzgstell die daasjöhrigi Ladäärne entstande isch.Morn denn gits no Informazione zum Sujet und dr Zeedel zum lääse.
Mir wünsche allne scho jetzt e scheeni Fasnacht.
32 Schtund vor dr Fasnacht erwiist is jedes Joor no dr Goethe siini Reminiszänz: Uff d Ladärne kömme jetzt none paar säberdichtet Värs.
Vorhärd am Nommidaag hänn mir dr Ladäärnewaage uff Vordermaa brocht. Und dr Cliquekäller isch für s Ysirpfle vorbereitet worde.
Dzwüsche sinn mir no ins Klingeli go Znacht ässe.
(doo gits mehr...)
Dr einzig Oobe vo de Schnääderfräässige, wo d Schnäädi-Gschlächter trennti Wääg göhn.
Beidi Gruppe hänn im Glaibasel gstartet (sogar no gmeinsam) und am Schluss sinn alli wider deheime gsi!
Aagäblig isch drungge, gässe, diskutiert und gsunde worde: Also en ächte intelektuelle Oobe. Ass mir au wider dr Peter Maffay ghört hänn ('Ich war 16') isch nid mehr als en nid bestätigts Grücht.
(doo gits mehr...)
Zweimool hänn mir dr neu Marsch an dr letschte Marschiebig drummlet und pfyffe. Will mir am Frytig nüt über verwirrti Hisch in dr Langen Erle glääse hänn, meine
mir, ass dr neu Marsch nid eso schlimm tönt het.
Nach dr Marschiebig hänn mir denn none bsundere Apéro
- der Geburtagsabpéro vo dr Coni - mit ganz bsunderem
Service-Personal könne gniesse.
Jetzt goohts wirgglig nümm lang! :-))
(doo gits mehr...)
Es isch scho e Tradizion, ass e Schnäädi-Delegazion e gueti Wuche vor dr Fasnacht s Fasnachtsfieber in Luzärn gooht go aaweerme.
D Fasnacht in Luzärn het e baar Gmeinsamkeite aber au e baar Unterschiid zu unserer Fasnacht. Mir sinn uff jede Fall eimool mehr überzügt gsi vo dr Sujetvielfalt, em Uffwand, wo für d Goschdüüm gmacht wird und em Fasnachtsbluet, wo s glyche isch wie unsers.
Uf jede Fall het dr Petrus generell für d Fasnächtler e Härz und het nach e baar Dropfe bim Yydunggle nochhärd dr Wasserhahne zudreiht.
Zum euch uff d Fasnacht e Bitz vorzfreue, hänn mir au Bilder heime brocht.
(doo gits mehr...)
En erschti mit Termin gfüllti Vorfasnachtswuche goht z Änd. Zyt zum alli Fotispeicher z leere und e baar Bilder no uff d Homepage uffezlaade.
Es git none baar Bilder vo unserem Pfyfferlibsuech vor ere Wuche und denn au no Bilder vom Oobe vom Vogel Gryff.
Jetzt wartet nonemol e ruehigeri Wuchen uff is und denn gohts denn richtig loos.
(doo gits mehr vom Vogel Gryff)
(doo gits e Bitz Öbbis vo unerem Pfyfferli-Bsuech)
Dr höggschti Glaibasler Fyrtig het mit de erschte Böllerschüss vom Wild Maa Floss kurz nach em halbi elfi gschtartet. Gly druff aabe het dr Zug vo de drey Ehrezeiche bim Glaine Klingetal aagfange und gooht bis nach em halbi elfi zoobe.
Mir hänn die erschte Impressione uff dr Homepage feschghalte und scho bald göhn mir au wider uff d Gass! Denn d Stäggeladäärne und s Pfyffe und Drummle erinnere dra: Es gooht numme no 40 Dääg bis an Morgestraich!
(doo gits mehr...)
Dr letschti Daag vom alte Joor (2008) isch zuegliich dr 20. Geburtsdaag vo de Schnääderfräässige gsi. Genau dört, wo mir vor 20 Joor unseri Clique gründet hänn, hänn mir zämme unsere runde Clique-Geburtsdaag gfyrt.
D Höhepunggt vom Oobe sinn e Ständeli von ere Stammclique-Delegazion gsi und die gsanglige Daarbietige vo kommende Stars und Stärnli! Für alli die, wo nid hänn könne drby si und für die, wo dää Oobe wider in Erinnerig wänn riefe, hänn mir dä Aaloss mit e baar Bilder feschtghalte.
(doo gits mehr...)
Mir wünsche allne alles Gueti und vyl Glügg im neue Joor.
Wenn au vyli daas Joor scho jetzt wänn schwarz-moole, wüsse mir ass es gar nid eso schlimm ka wärde.
Denn scho in zwei Mönet isch z Basel Fasnacht!
Doodrfür hänn mir au unseri Homepage wider barat gmacht: In de näggschte Dääg und Wuche ka me doo wider s Einte und Andere lääse und gseh über d Voorbereitige vo dr Schnäädi-Fasnacht und denn im Merz, wie mir d Fasnacht erlääbe dien.
Wäägenem Schnäädi-Jubileeum isch die dritti SWW (Schnäädi-Waldwiehnacht) noonig s letschte Ereignis in dr Schnäädi-Jooresagända 2008 gsi.
Au daas Joor hets an dr SWW e neui Überraschig gäh: S erschte Mool hänn mir daas Joor in dr Hard en ächti wyssi Wiehnacht könne erlääbe. Noonemol het dr Petrus in däm für d Schnäädis wätterverwöhnte Joor voll mitgspiilt.
Mir hänn d Waldwiehnacht au wider bildlig feschtghalte. Und wenn 's denn emol no Gschmaggs-Internet git, wärde mir au dr SWW-typisch Waldwiehnachts-Rauch-Gschmagg übermittle.
(doo gits Bilder...)
Dr Summer 2008 het fir uns gstimmt. An jedem vo unserne Summer-Events het s Wätter wie scho an dr Fasnacht beschtens gschtumme.
E baar Impressione vom Schnäädisummer sinn jetzt uff den entsprächende Syte abgleegt.
D Erinnerige an Summer feehn sich aafoo vermische mit dr Vorfraid uff die näggschte drey scheenschte Dääg, denn schliesslig foohts langsam aa: Vorbschtellig vo de Larve, Comitée-Information, Pfyfferlivorverkauf etc.
Jedes Joor zwische de Fasnachte isch es e Highlight: D Schnääderreis. Wie sichs gheert isch d Jubileeumsreis ebbis bsunders gsi: S erschte Mool sinn mir mit em Fkugzüüg uff d Reis. Gnauer gseit sinn mir uff Nizza und hänn zwei Dääg lang noonemol dr Summer und daas erscht no am Meer kenne gniesse. Mehr iber unseri Haute Cuisine Erläbnis erfahrt me uff der entschprächende Syyte vo dr Homepage
(mehr gits do...)
Es isch e Tradizion: Dr Schnäädergrill - unseren Aaloss fir die Passive und au Aggtive vo de Schnääderfrässige am Voroobe vom Nazionalfyyrtig vo dr Schwyz. Und will mi jo zmitts in dr Stadt kenne grilliere ischs so grosse Fyyrwärgg vom Rhy au e Teil vom Schnäädergrill.
(mehr gits do...)
Nur knapp drey Wuche nach em Final vo dr Euro08 feschtet Basel wider sälber. S Basel Tattoo und dr Umzug am Samschtig zieht d Lyyt wider in d Stadt.
Mir sinn au am Umzuug gsi und speeter denn au an dr Derniere vom Tattoo.
Deerte und au bi uns im Garte isch es dailwyys rächt exotisch zuegange. Während s Tattoo mit ere Steelband uss dr Karibik Exotischs het loo yyfliesse, hänn mir mit Polynesischem konteret.
(mehr gits do...)
Schnääderfraass amene bsundere Daag!
Scho im Winter, wo mir dr Termin fir dr Schnääderfraass abgmacht hänn, hämmer gwisst, ass an däm Samschtig Euro-1/4-Final-Samschtig in Basel isch. Was aber niemerds gwisst het, isch ass dää Samschtig als greeschts Fescht vo Basel in d Gschichtsbiecher wurdi yygoo! D Oranjes hänns meeglig gmacht und fir ei Daag richtigi Euro-Stimmig uff Basel brocht.
Doo hänn mir s Einte mit em Andere verbunde und sinn in Oranje an Schnääderfraass!
(mehr gits do...)
Trotz unsichere Wätterprognose het sich dr Petrus au am dritte Bummelsunntig als ächte Bebbi goutet: Au in Neuchâtel hets noonemol Sunnestrahle gäh. Eso hänn d Schnäädis in deere schöne Stadt, wo fürs Gässle wie gschaffe isch, dr letschti Heehepunggt vo dr Johrhundertfasnacht erläbt.
Zoobe denn sinn mir ohni vo vorne zooge und vo hinde gstosse z wärde d Freye Strooss durab, wo au e letschts Mool d Lyt in mehrere Reihe Spalier gstande sinn. Dr definitiv Schluss hänn mir hinter dr Barfiesserkirche mit em Ohremygelli und em Wettstaimarsch usspfyffe. Und denn isch es no e Wyyli gange, bis die letschte Schnäädis uff dr Heimwääg sinn!
Will dir sicher scho uff d Feeteli wartet, duen i si jetzt grad kommentaarloos uff unseri Homepage laade. In de näggschte Dääg sett denn dr Kommentar au no drzue koo.
Und jetzt fooht wider s Warte aa: Es gooht no genau 364 Dääg! (mehr gits do...)
Vor zwai Wuche isch Basel d Fasnachtsstadt gsi und mir Teil drvoo.
Eigentlig mergg i erscht jetzt, wieviel Fasnachtsenergie die scheenschti Fasnacht, woni je erläbt ha, ibrig gloh het. Gärn dängg i jede Daag an die drey scheenschte Dääg zrugg und jede Daag paggts mi, irgend ebbis z mache, wo mi an d Fasnacht 08 erinneret. Durum hann is scho gschafft: Ab em Ladärneyypfyffe sinn d Bilder scho kommentiert. Und dr Räscht kunnt au no. Nach em näggschte Wuchenänd gits denn au no d Bilder vom Bummel.
Allne vyl Spass bim Pflääge vo den Erinnerige.
Alles isch verruumt! Nai, fascht alles, denn d Morgestraichlarve wird s ganze Joor in miim Büro blyybe stooh, als Zaiche fir daas, wo gsi isch und wider wird koo.
Nääbe ire blyybe aber numme no d Erinnerige, wo aim niemerds ka näh. E Dail vo deene Erinnerige sinn au d Bilder uff dr Homepage und alli die, wo denn uff unseri DVD kemme. S ainte oder andere Bild bruucht en Erklärig. Die mach i im Momänt. S Bild nääbe dra isch Programm: I start mit de Kommentär vo hinde bim Fasnachtsmittwuch und hoff, ass i irgendwenn bis zu de Fasnachtsvorbereitige vordring.
Bis jetzt isch also dr Fasnachtsmittwuch komplett kommentiert.
Scho isch es fascht zwai Dääg sit em Ädstraich!
No wehr i mi, eifach eso in Alldaag zrugg z koo.
Und zem d Fasnachtsdepression einigermasse in Griff z kriege gits numm eins: Sich zrugg erinnere an die drey scheenschte Dääg vom Joor.
Mir mache daas mit dr Uffbereitig vo dr Homepage: Unsere treue Ladärnemooler het uns mit vylne Feeteli versorgt, woni jetzt auf uffs Netz due laade.
Eso gseht me zem Byspiil, wie unseri daasjeerige Ladäärne im Januar vom lyynig wysse Stoffquader zer Schnäädi-Wunder-Ladäärne worden isch.
Als näggschts kemme den no d Kommentär zu de Bildli.
Und denn hoffi, ass i mi am Mändig wider an Alltag gweehnt ha (und weiss scho jetzt, dass daas nid dr Fall wird si)
S isch verby!
E schlichtwäg fantastischi und gschichtsträchtigi Fasnacht isch hitte am Morge z Änd gange!
Und will dr Fasnachtsdonnschtig eso vyl Bebbi ins Eeländ stritzt, sette mir en Inizative schaffe fir d Abschaffig vo däm Daag. Är würd nid gschriche sondern ersetzt durch e vierte Basler Fasnachtsdaag. Guet, daas blyybt ebeso e Draum wie mir jetzt nur no Dräum an d Fasnacht 2008 blyybe.
E Dangg gebyrt allne wo die Fasnacht zu däm gmacht hänn, wo si gsi isch!
Aber Aine mien mir bsuders usseheebe, will är dr Vogel abgschoosse het: Dr Petrus!! Das Wätter won är is bescheert het, isch eifach nur fänomenal gsi!
Und jetzt foohts aa: S ganz lange Warte uff d Fasnacht 2009, wo am 2. Merz (leider erscht im 2009) wird starte. Zem Gligg lääben aber d Schnäädis s ganze Joor. Eso kenne mir s Warte erträglig mache.
Im Momänt aber isch eifach alles leer..... :-(
Und irgendnaim gheer is no pfyffe und drummle: Aimool no vom Spalebärg zu miim Fischmärt und zum Rhy...
Dr letschti Daag hänn Basler noonemol richtig ussgspiilt. Dr zwait Cortège isch riibigsloos iber d Biihni - und durum adyrlig au vyl z schnäll! Bis zer letschte Sekunde hänn denn d Ladäärne d Stadt verzauberet und d Piccolo- und Drummelkläng die ächti Basler Fasnachtsstimmig vermittlet.
Au d Schnäädis sinn noonemol abghobe und sinn nach em Radio-Interview am Mändig mit em Interview bi dr Konkuränz zu klein(scht)e Mediestars worde. Alles hänn mir uff Bilder feschtghalte! (mehr gits do...)
S het Bilder! (mehr gits do...)
Es git au fir erfahreni Fasnachtläre immer wider Neys an dr Fasnacht z erlääbe.
Daas Joor nadyrlig öbbis wätterbedingts. D Wettstaibrugg isch in dr Reegel nid grad dr attraggtivschti Ort uff em Cortège. An däm Mändig isch daas aber anders. Wenn me vom Wettstaiplatz zum Grossbasel uffegluegt het, isch me sich vor koo, wie in dänne Zyte, wo me sich no genau het miesse überleege, wo me aanestooht zem d Fasnacht go luege, ohni ass me verdruggt wird. In fimf- oder no mehr-reihige Spalier sinn d Zueschauer uff dr Brugg gstande und hänn sicher wie mir e fantastische Cortège miterläbt.
Zoobe isch es denn doch scho gly (am vieri am Morge) in dr Stadt ruehig worde. (mehr gits do...)
Dr Morgestraich gheert zur Vergangheit. Scheen isch är gsi und e bitz plange mir scho uff dr näggscht.
Jetzt aber mache mir uns barat fir dr Cortège, wo im sunneiberfluetet Basel in knapp 90 Minute wird starte.
Morn denn - wenns dr Webmaster heime schafft - ka me uff unserer Homepage Bilder vo uns uff em Cortège gseh.
Riisigi Menschemasse sinn vor em vieri in d Stadt gstreemt.
Mit em vierte Schlaag isch denn s Liecht in dr Stadt abgange und duusigi vo Fasnächtler hänn sich mit em Morgestraich fir drey Dääg vom Alltag verabschiidet.
Will d Fasnacht eso frieh im Hornig wie fascht nie gstartet het, isch uns fascht e Stund mehr dunggli Innerstadt gschänggt worde.
Wo s hell worden isch, het d Frau Fasnacht zämme mit dr Sunne s Zepter ibernoo.
Bis zem letschte Momänt hänn mir dää unvergässlig Morgestraich gnosse. (mehr gits do...)
Es gooht nid emol me säggs Stund bis zem Morgestraich. I maag mi nid erinnere, ass i nid irgendnaim none Räägeschutz barat glegt hät. Daas Joor bruuche mir dää nid. Durum fraie mir uns uff e fantastischi Jubileeumsfasnacht.
Mir winsche allne e ganze e scheeni Fasnacht!
Es isch jo erscht dr 10. Hornig - also eigentlich zmitts im Winter. S daasjeehrige Yypfyffe het aber an aim vo den erschte Friehligsdääg in däm Joor stattgfunde. Bin ere heerrlige Oobesunne hän d Schnäädis ihri Ladärne yypfyffe.
Nach em Yypfyffe hänn mir denn im Cliquekäller bimene fantastische Ässe uns in d Fasnacht yygstimmt. (mehr gits do...)
Eigentlich isch alles barat für e tolli Fasnacht! Immer mehr hanni aber s Gfühl, ass die scheenschti Zyt vom Joor immer schnäller und schnäller verby gooht. Durum bin uff dr Suechi nach em Ai vom Kolumbus, wo sell hälfe die Zyt z verlangsaame. I has aber noonig gfunde!
D Homepage vo de Schnäädis gheert zu uns wie dr Räschte vo dr Fasnacht. Es git si scho 13 Joor!
Laider gooht die schnälli Zyt au an ire nid spurloos verby. Durum längst halt ammigs nid, zem alli Bilder z kommentiere. I brobier aber daas no noochezhoohle und bitt ums Verständnis vo de Homepage-Bsuecher. I bi aber dr Meinig, ass grad d Bilder vo dr Fasnacht mehr saage als vyyli Wort.
Und s Wichtigschte für uns alli isch doch, ass mir jedi Schtund vo de drey scheenschte Dääg uff dr Gass kenne erlääbe.
I winsch allne e ganz e scheeni Fasnacht!
Merci für eyer Verschtändnis.
D Ladäärne schtooht en erschts Mool im Zentrum vo de Fasnachtsaggtiviteete vo de Schnääderfräässige. Hüt zoobe hänn mir Väsli brinzlet und dr Ladäärne so no dr letschti Schliff gääh. Vom Aalooss, wo sich d Hobby-Goethes und -Schillers kenne mässe, gits doo e baar Impressione.
Jetzt sinn mir eigentlich barat.
Es ka loss goo mit dr wättermässige Joorhundertfasnacht. (mehr gits do...)
Dr Ladäärnewaage wird zämmebaut
Wenn mir und zwai Joor dien zrugg erinner: Dr Daa, wo dr grooss Schnee koo isch. Und hitte: Am ene strahlende Friehligsdaag im Hornig hänn mir mit em Zämmebaue vom Ladäärnewaage aagfange.
E Neyerig am Waage gits au no: Mir hänn jetzt zwai Klapptisch, wo no mehr Komfort an dr Fasnacht - nääbe de Klappschtiehl vom letschte Joor sell bringe. Doo die erschte Bilder vo dääre Inscheniöör-Maischterlaischtig (mehr gits do...)
Dr Damen- und Herrenoobe
Daas isch e Tradizion: Mir miesste in unserer Cliquechronik go steebere, zem ussezfinde, wenn eigentlich dr erschti Herrenoobe stattgfunden het.
Daas Joor sinn d Herre und au d Dame uff dr Pischte gsi - aber wie s sich gheert getrennt. Und vo beide Aaleess gits es baar Bilder. (mehr gits do...)
An dr letschte Marschiebig isch dr neyi Marsch im Zentrum gschtande. Um dr See in dr Grien 80 - die isch jetzt zum em letschte Fasnächtler dr Garuss z mache no verdungglet worde - hänn mir s Ohremyggeli hi und zrugg giebt.
Zem Schluss denn sinn no d Larve verdailt worde.
Langsam gooht d Vorfasnacht z Änd und mit styyre uff dr Heehepunggt zue. (mehr gits do...)
Scho fascht e Tradizion! Zum vierte Mool sinn mir uns emozional in Luzärn für d Fasnacht in dr näggschte Wuche go uffweerme. Dr Fritschi-Raub zeigts: Basel und Luzärn sinn e fasnächtligi Gmeinschaft. D Fasnachtsgen sinn vylne Fasnächtler glyych.
Mit e paar Bilder erinnere mir an dää tolli Oobe. (mehr gits do...)
Bi Prachtswätter hänn ai Wuche vor em Ladäärneyypfyffe z Basel in dr Region vyli Fasnachte mit de groosse Umzyyg ire Zenit erraicht.
Wie scho in den letschte Joor sinn e baar Schnäädis in Allschwil an Umzug gange und hänn so s Fasnachtsbluet wyter uffgwärmt.
Mir hänn au e baar Bilder gmacht. Die ka me jetzt aaluege (mehr gits do...)
Die scheenschte zwai Wuche vom Joor hänn d Schnäädis mit dr Drummeli-Derniere gstartet.
Im Foyer het unter anderem e Ladäärne vo uns fir e bitz fasnächtligi Schtimmig gsorgt.
Clique, d Gugge, Schnitzelbängg und Rähme gheere zum tradizionellschte Vorfasnachtsaalooss.
Mir hänn s Drummeli und nochhärd die grandiosi Derniere-Schtimmig in dr Drummelibar gnosse.
Aigentlig gheere d Bilder vom Drummeli zu de Vorberaitigsbilder. Will mir die aber erscht am Sunntig vor dr Fasnacht zaige (es git deerte jo au unsers Goschdym gseh), hänn d Drummeli-Bilder momentant e Blätzli bi dr Allschwiler Fasnachts-Bilder gfunde. (mehr gits do...)
No gits ai Marschiebig vor dr Fasnacht. Trotzdäm kenne mir schone erschts Resumee vo unsere Marschiebige zieh: S Ohrmyggeli wärde mir bis am Fasnachtsmändig-Zoobe im Griff ha. Und die räschtlige Märsch sinn bis denn au wider presänt.
D neije Läärmreegelig in der Grien 80 - wider emol e Fidlebirger- und Amtsschimmel-Geniestraich - und au die aimoolig chaotischi Bediehnig im Seepark - s Sälbschbedienigsrestaurant het me au gschlosse zum de Fasnächtler d Ehr z'erbiete - hänn is zune baar Improvisazione zwunge. Dr guete Schtimmig schadet daas nid. Und wääge dr tolle Schtimmig und dr Tatsach, ass mir nur vier Wuche im Joor uff em Kibel deerfe drummle und dusse deerfe pfyffe, geehn mir glych go drummle und pfyffe. (mehr gits do...)
Tatsächligg sind die Schnääderfräässige daas Joor am Drummeli verdrätte. Aber s muess niemerd von is Angschtschweiss schwitze, denn nid mir sälber sondern e Ladärne vo uns uss em Joor 1992 verziert daas Joor dr Ygang ins Drummeli. Mir sinn gspannt und gsehn denn d Ladärne erscht an dr Derniere. Mehr gits denn also in dr näggschte Wuche.
D Stäggeladäärne zaiges aa: S ka nimme lang bis zer Fasnacht goo.
Am 12. Januar fyyrt aber z erscht emol s Glaibasel si heegschte Fyyrtig: Der Vogel Gryff. Während s Wätter um Basel umme und in de Bärge fir e baar Kapriole gsoorgt het, isch dr Vogel Gryff, dr Lai und dr Wild Maa vo Räägedreepf zem greeschte Dail verschoont bliibe.
Zoobe denn sinn die drey Ehrezaiche vo dr jubilierende Olympia uff iirem Rundgang beglaitet worde.
Well d Olympia daas Joor hundert Joor alt wird, sinn im Vordraab 100 Stäggeladäärne vo Buebe uss de iiberigbliibene Männerclique in Basel drait worde.
Und eso het dää Aaloss, wo aigentlig nyt mit dr Fasnacht z tue het, daas Joor vor allem am Oobe none Bitz Fasnachtsflair als sunsch verbraitet.
Fir uns heisst s no vier Wuche warte. (mehr gits do...)
S neye Joor isch noonig ganz 24 Schtund alt. Für die Schnääderfräässige (kurz: d Schnäädis) isch es e bsunders Joor: Einersiits sinn mir Dail vo einere vo de friehschte Fasnachte, wo s je gää het und wird und anderersiits fyyre mir daas Joor unser 20-jeerigs Jubileeum.
Uff daas muess me aaschtoosse!
Mir winsche allne e guets Neys!
Und doo, wo hitte dr letschti Daag d Wiehnachtsbelychtig brennt het, drummle und pfyffe mir in fimf Wuche und säggs Dääg scho.
Fir die Momänt, wo jetzt Schlag uff Schlag kemme, isch au unseri Homepage barat. Au dr dichtgedrängti Fasnachtsplan isch fir die Aggtive bereit.
Die Wiehnacht 07 isch verby! Es sell d Fasnacht 08 lääbe!!
Bim aggtualisiere vo dr Homepage fir d Fasnacht 08, bini noonemool s Fotiarchiv go durchschteebere und ha none baar unvereefentlichti Bilder vom letschte Schnäädi-Joor gfunde.
Als letschts Gschänggli vo deere Wiehnachts- und Neyjoorszyt gits also none e Bilderpäggli.
S Wiehnachtsbild linggs zaigt ibrigens s verruggtischte Wiehnachtshuus in dr Regio Basel. Fascht e Bitz wiene Ladäärne an dr Fasnacht. (mehr gits do...)
Am 20. Dezämber 2007 isch es eso wyt gsi: Dr letschte Cliqueaalooss vom 2007 isch die 2. Schnäädi-Waldwiehnacht gsi. Wie im letschte Joor hänn mir uns wider in dr Hard droffe. S Wätter het wider voll mitgschpiilt: D Stäärne hänn vom Himmel gfungglet und dr Mond het is daas Joor dr Wääg in Wald belychtet. Es isch none Bitz keelter gsi als vor emene Joor. Sogar s Chrischtkindli isch verby koo und het noo Gschänggli unters Baimli glegt. Ebbe gege die Elfi sinn mir denn duuregfroore und graicht wie gueti Schinggli und Schiifeli haime gange. (mehr gits do...)
